Appearances of Klingon: on television - in movies - in the news - in commercials - in politics - in literature - Translations

The Psalms

The Psalms (bommey) serve as the hymnbook of the Hebrew Bible or Old Testament (mab'a' ngo') and were used primarily for the purpose of corporate worship in ancient Israel. They belong to the section known as the Writings (ghItlhmey), the other two sections being the Law (chut) and the Prophets (maQ rItwI'pu').

Translation

This project is not completed yet.

paq 1

bom 1

1 Quchqu'taH ghotvam
mIghwI' qeSDaq yItQo'
'ej yemwI'pu'Daq QamQo'
'ej vaqwI'pu' quSDaq ba'Qo'
2 'ach joH'a' chut HaD 'ej tIv
qaStaHvIS pem ram je chutDaj buStaH
3 bIQtIqDaq Sor pochlu'pu'bogh rur
'ej qaSDI' poHDaj naH lIng
'ej Heghbe' naQHommeyDaj
'ej chepqu' ta'meyDaj
4 Sor rurbe' mIghwI'pu'
DI'e' woDqu'bogh SuS rur chaH.
5 vaj vaS'a'Daq tay'be' mIghwI'pu'
'ej QaQwI' rIpDaq lujeS'be' yemwI'pu'
6 QaQwI' He Sovchu' joH'a'
'ej QIHna'Daq ghoSbej mIghwI' He

bom 2

1 qatlh Qay' nughmey 'ej Doch qey lunab ghotpu'?
2 joH'a' 'atwI'Daj je qaDmeH Qam qo' ta'pu' 'ej nItebHa' cher'egh che'wI'pu', 'ej jatlh:
3 “Ha' maHvo' pumnujchaj DIghorjaj 'ej mIrchaj DIwoDjaj.”
4 chalDaq ba' joH'a' 'ej Hagh 'ej chaH vaq.
5 ngugh QeHtaHvIS chaHvaD jatlh 'ej Qay'taHvIS DuqmoH.
6 “'ach tlhI'yon HuDwIj quvDaq ta'wI' vISughta'.”
7 vep vIja'. jIHvaD jatlh joH'a': “puqloDwI' SoH. DaHjaj qaboghmoHpu'.
8 chotlhobchugh, vaj nughmey qa'atmoH 'ej qengHoDlIj moj qo' HeHmey.
9 'uSqan naQ Dalo'DI' chaH Daghor 'ej Datap. DabqI' 'un lurur.”
10 DaH ta'pu', peval'eghmoH; peqIm, qo' che'wI'pu'.
11 joH'a' botoy'taHvIS penguqHa''eghmoH 'ej SujeltaHvIS peQuch'eghmoH.
12 puqloD boquvmoHbe'chugh, vaj QeHchoH 'ej HeDaq boQaw'lu', nom meQchoHmo' QeHDaj. vay' lulIgh Dachugh, vaj Do' vay'vetlh.

bom 3

1 bomvam qon DawID, 'abSalom puqloDDajvo' Haw'DI'.
'o joH'a', law'qu' jaghpu'wI'! muqaDmeH Hu' ghotpu' law'
2 qa'wIj lurIch ghotpu' law' 'ej jatlh: not ghaH toD Qun'a'. SelaH
3 'ach jIHvaD yoD DaDa, 'o joH'a', ngay'wIj, nachwIj pepwI' je DaDa.
4 joH'a'vaD jIjachpu', 'ej HuDDaj quvvo' mujangpu'. SelaH
5 jIQotpu' 'ej jIQongpu' 'ej jIvemqa'pu' mutaHmoHmo' joH'a'.
6 mughIjbe' muDechbogh netlh law'.
7 yIHu', 'o joH'a'! HItoD, 'o Qun'a'wI'! qevpobchajDaq Hoch jaghpu'wI' DaqIp. jIvvo'pu' Ho'Du' Daghor.
8 toD peS joH'a'. ghotpu'lI' tIchepmoH. SelaH

bom 4

1 QoQpInvaD bomvam qon DawID; HurDagh chu'lu' [bomlu’taHvIS].
jIrItDI' HIjang, 'o ruvwIj Qun'a'.
jISotDI' chochurHa'moH. jIHvaD tlhoqtlhal yIturneS 'ej jItlhobDI' HIQoy.
2 'o Humanpu', qaStaHvIS poH 'ar jItuH; jIquv 'e' qa'?
qaStaHvIS poH 'ar mu'mey qey bomuSHa' 'ej mu'mey nepwI' bonej? SelaH
3 'ach joH'a'vaD quvwI'pu' chevpu' 'e' yISov.
joH'a' vIrItDI' muQoy.
4 peQeH'eghmoH 'ej peyemQo'.
QongDaqrajDaq tIqrajvaD pepaQ 'ej petam. SelaH
5 batlh pe'anmoH 'ej joH'a' yIvoq.
6 jatlh ghotpu' law': “Doch QaQ nuleghmoH 'Iv? maHvaD qablIj tamghay yIpep, 'o joH'a'.”
7 tIqwIj Quch law', vey'DI' tIr HIq je tIqchaj Quch puS.
8 jIghanHa' jIQotDI' 'ej jIQongDI'. juHwIjDaq choQan, 'o joH'a' neH.

bom 5

1 QoQpInvaD Dov'agh chu'lu'meH bomvam qon DawID.
mu'meywIj yI'Ij, 'o joH'a', bepwIj yIpaQ.
2 beywIj wab yIbuS, ta'wI' Qun'a'wI' je, qaqoy'mo'
3 'o joH'a', qaSDI' po SoHvaD jImuch 'ej jIjIH.
4 yemwI' tIvbogh Qun'a' SoHbe'. DaqlIj Dabbe' mIghwI'.
5 mInDu'lIj tlhopDaq Qambe' nguqwI'pu', Hoch mIghwI'pu' DamuS.
6 nepwI'pu' DaQaw', 'Iw 'ojbogh 'ej tojbogh loD muSqu' joH'a'.
7 'ach pung'a'lIjmo' law' juH qach vI'el.
qavuvmo' chIrghlIj quv lurghDaq jItor.
8 jaghpu'wI'mo' ruvlIj HItlha'moH, 'ojoH'a',
jIH tlhopDaq HelIj yIwanmoH.
9 nujchajDaq vIt tu'lu'be'. naH tIqchaj. mol poS Hughchaj. naD yuD lujatlh jatDu'chaj.
10 bIjchaj tISIQmoH, 'o Qun'a', nabmeychajmo' tIlu.
woghqu'mo' tIghIm, nIqaDmeH lotlhpu'.
11 'ach SoHvaD lulIgh luDambogh Hoch lopjaj. Quchmo' reH bomjaj, DaHubmo'. ponglIj muSHa'wI'pu' Quchqu'jaj.
12 ruv ta'wI'pu' DachepmoH, 'o joH'a'. chaH vel bellIj; yoD rur.

bom 6

1 QoQpInvaD bomvam qon DawID; SemI'nIt lo'lu'taHvIS ‘ej HurDagh chu'lu'taHvIS [bomlu’].
'o joH'a', bIQeHtaHvIS HIqunQo', 'ej bIQay'taHvIS HImupQo'.
2 jIHvaD tlhoqtlhal yItur, 'o joH'a', jIpujmo'. HIpIvmoH, 'o joH'a', Sotmo' HomDu'wIj.
3 'ej Sotqu' qa'wIj. 'ach SoH, 'o joH'a', poH 'ar?
4 yIthe', 'o joH'a', yInwIj yItoD. pung'a'lIjmo' HitoD.
5 Duqawbe'mo' vay' HeghDI'. Se'olDaq DunaD 'Iv?
6 jIjachtaHmo' jIDoy', qaStaHvIS Hoch ram, mIn 'onroSmeymo' QongDaqwIj vISoD, quSlabwIj vIHaH jISaQmo'.
7 jI'IQmo' ragh mIn. Hoch jaghpu'wI'mo' pujchoH.
8 HImej, mIghwI'pu'. wabwIj Qoypu' joH'a' jIjachDI'.
9 jIqoy'DI' Qoy joH'a'. jItlhobDI' mulaj.
10 tuH Hoch jaghpu'wI' 'ej Sotqu'. pay' tlhe' 'ej tuH.

bom 7

1 joH'a'vaD SIgha'yon 'IngSav bom DawID. quS benyamIn tuq mu'mey.
'o joH'a' Qun'a'wI', SoHvaD lulIghwIj vIDam. Hoch wampu'wI'vo' HItoD 'ej HInge'.
2 chotoDbe'chugh, vaj qa'wIj luvIrgh, vIghro'a' lurur, 'ej vIghorchu'lu', 'ej mutoD pagh.
3 'o joH'a' Qun'a'wI', Dochvam vIta'chugh, yemchugh ghopDu'wIj,
4 jupwI' vIQIHchugh, pagh meqmo' jagh qengHoD vItlhapchugh,
5 vaj qa'wIj tlha'jaj jagh 'ej mujonjaj, 'ej yavDaq yInwIj tapjaj, 'ej Say'qISDaq quvwIj lanjaj. SelaH
6 bIQeHtaHvIS, 'o joH'a' yIHu'. jaghpu'wI' QeHqu' DaqaDmeH yIpep'egh. jIHvaD yIvem. yoj Dara'ta'.
7 DuDechjaj nughmey rIp. yIchegh 'ej yIjen.
8 nughmey noH joH'a'. HInoH, 'o joH'a', ruvwIjmo' batlhwIjmo' je.
9 jIvvo'pu' ta'mey mIgh ghanglu'jaj. rev ta'wI'pu yIcher.
tIqmey yabmey je Datob, 'o ruv Qun'a'.
10 Qun'a' tlhej yoDwIj. tIq QaQ ghajwI' toD.
11 ruv noHwI' ghaH Qun'a''e'. qaStaHvIS Hoch jaj QeHqu' Qun'a'.
12 tlhe'be'chugh vay', vaj yanDaj jejmoH. nuHDaj 'ob QIqrup.
13 nuHmey HeghmoHwI' ghuS. qul tIHmey rur naQjejHommeyDaj.
14 yIlegh, ta' mIgh 'oH yemwI' raS'IS'e'. Seng qeng. mu'mey nepwI' boghmoH.
15 QemjIq chenmoH 'ej ghaw. ghIq taSmanDaq pum.
16 nachDaj chegh SengDaj. DughrI'Daj lughIr ta'meyDaj ral.
17 tlho'wIj qotlh joH'a' ruv. joH'a' jenwI’’a’ pong vInaD.

bom 8

1 QoQpInvaD ghI'tIt jan chu'lu'meH bomvam qon DawID.
'o joH'a', pIn'a'maj, Hoch qo'Daq povqu' ponglIj. chal DungDaq ngay'lIj Dalanpu'.
2 jaghpu'lI'mo' ghupu' puqHompu' je nujDu' DaHoSmoHpu'. jagh noDwI' je DamevmoH.
3 challIj nItlhDu'lIj ta'mey je, maS Hovmey je vIlegh.
4 loD nuq? Daqel. Human nuq? DaQorgh.
5 'ach loQ Qun'a' bIngDaq Dalanpu', 'ej quv ngay' je mIv'a' Danobpu'.
6 ghopDu'lIj ta'mey Dache'moHpu', 'ej qamDu'Daj bIngDaq Hoch Dalanpu':
7 Hoch DI'raqmey yotlh Ha'DIbaHmey je,
8 chal bo'Deghmey je , bIQ'a' ghotI'mey je, bIQ'a' Hemey chIqbogh Hoch je.
9 'o joH'a', pIn'a'maj, Hoch qo'Daq pov'qu' ponglIj.

bom 9

1 QoQpInvaD mutlaben jan chu'lu'meH bomvam qon DawID.
joH'a' vItlho'DI' Hoch tIqwIJ vIlo'. Hoch boqHarmeylIj vImaq.
2 SoHmo' jIQuchqu' 'ej jItIv. ponglIjvaD naD vIbom, 'o jenwI'’a’.
3 tlhe'DI' jaghpu'wI', SoH tlhopDaq pum 'ej Qaw'lu'.
4 yovwIj DIbwIj je Data'pu'. ruv yoj DanobtaHvIS quS'a'Daq bIba'pu’.
5 nughmey DaHuppu'. jIvvo'pu' DaQaw'pu'. Hochlogh pongchaj Dabaqpu'.
6 reH taHbogh pIgh mojpu’ jagh; vengmeychaj DaQaw’pu’. chaH qaw net mevpu’.
7 reH quS'a'Daq ba' joH'a'; ruv ta'meH quS'a'Daj cherpu'.
8 batlh qo'vaD yoj nob; nughmey yoj bonDI' quv.
9 vay' QIHlu'DI', jem'IHDaj Da joH'a'. qaStaHvIS Seng poHmey jem'IH Da.
10 ponglIj SovDI' vay', Duvoq. Dunejchugh vay', 'o joH'a', vaj Dalonbe'.
11 joH'a'vaD naDmey yIbom. tlhI'yon HuDDaq ba'. Nughmey jojDaq ta'meyDaj yIjatlh.
12 chaH qel 'Iw noDwI'. jachDI' vay' QIHlu'bogh, lIjbe'.
13 jIHvaD tlhoqtlhal yIturneS, 'o joH'a'! muQIH jaghpu'wI' 'e' yIlegh. Hegh lojmItvo' chopep.
14 Hoch naDmeylIj vItogh. thI'yon HuD puqbe' lojmItDaq toDlIjmo' jIQuchqu'.
15 QemjIq lughaw nughmey; 'oHDaq 'oq. SIr'o' chenmoH; 'oHDaq qamchaj tlhurlu'.
16 Sov'eghmoH joH'a'; yoj ta'. jIvvo'pu' von ghopDu'chaj ta'mey. HIgha'yon. SelaH.
17 Se'ol luchegh jIvvo'pu', Qun'a' lulIjbogh nughmey je.
18 reH Do’Ha’wI' lIjlu'be', 'ej reH tulbogh mIpHa'wI' Qaw'lu'be'.
19 yIHu', 'o joH'a', HoSbe'jaj loD. SoH tlhopDaq nughmey lunoHlu'jaj.
20 tIghIj, 'o joH'a'. loDpu' neH ghaH 'e' nughmey tISovmoH. SelaH

bom 10

1 qatlh, 'o joH'a', bIHop? qaStaHvIS Seng poHmey, qatlh bISo'?
2 mIpHa'wI'pu' tlha'chu' jIvvo'pu' nguq; nabmey tlhInDaq luvonlu'jaj.
3 vay' neHDI' jIvvo' qa', mIy, 'ej joH'a' lajQo' qurwI'pu' 'ej mu'qaDmey jatlh.
4 HemDI' qabDaj, nejbe' jIvvo'. Qun'a' tu'lu'be' 'e' reH Qub.
5 reH chep HeDa. jen yojmeylIJ; leghbe'. Hoch jaghpu'Daj tlhopDaq Qoghogh.
6 tIqDajDaq jatlh, “muvIHmoH pagh; qaStaHvIS Hoch puq poH Seng vIghombe'.”
7 nujDaj luteb mu'qaDmey mu'mey nepwI' je mu'mey QIHwI' je.
jat bIngDaq Qob ta'mey yemwI' je.
8 vengHommeyDaq ghach; Daqmey peghDaq chunwI'pu' HoH. Do'Ha'wI'pu' lughoch mInDu'Daj.
9 So'taHvIS ghach, DISDaq vIghro''a' rur. mIpHa'wI'pu' jonmeH ghach. SIr'o'Daq ngel 'ej jon.
10 HoSmo' Do'Ha'wI'pu' taplu' 'ej 'oq 'ej pum.
11 jatlh tIqDaj: “lIjpu'Qun'a'. qabDaj So'pu'; not wIlegh.”
12 yIHu', 'o joH'a', ghoplIj yIpep, 'o Qun'a'. vay' QIHlu'DI', yIlIjQo'.
13 qatlh Qun'a' lajQo' jIvvo' 'ej jatlh tIqDaj: “bIqelbe'”?
14 'ach bIlegh. 'oy'DI' vay' 'ej SotDI', DaqIm; ghopDu'lIjDaq Datlhap. SoHvaD Hoch lon Do'Ha'wI'. vav Hutlhchugh vay', vaj DaboQ.
15 jIvvo' mIghwI' je DeS yIghor. pagh DaSammeH ta'meyDaj yemwI' tInej.
16 Hochlogh ta'’a’ ghaH joH'a''e'. puHDajvo' nughmey Qaw'lu'.
17 'o joH'a', QIHchugh vay', vaj chabalDaj DaQoy. tIqDaj DaHoSmoH; teSlIj Danob.
18 vav Hutlhchugh vay' 'ej QIHlu'chugh, vaj ruv Data'. HajmoHtaHbe'jaj puH loD.

bom 11

1 QoQpInvaD [bomvam qon] DawID.
joH'a'vaD lulIgh vIDam. chay' qa' Dajatlh: “bo'Degh yIrur; HuDDaq yIHaw';
2 yIlegh, nuH 'ob luQIqrup jIvvo'pu'; SIrghDaq naQjejHom lulanta'; HurghtaHvIS, tIq QaQ ghajwI'pu'Daq bachrup;
3 qappammey luQaw'lu'chugh, vaj nuq luta'laH quvwI'pu'?”
4 chIrghDaj quvDaq ghaHtaH joH'a''e'; chalDaq 'oH joH'a' quS'a''e'.
legh mInDu'Daj, Humanpu’ nuD mInyoDDu'Daj.
5 quvwI' nuD, 'ach jIvvo' ralwI' je muS qa'Daj.
6 jIvvo'pu'Daq ghav naghmey SISmoHjaj; HIVje'chaj lubuy'moHjaj qul no'negh je SuS meQwI' je.
7 quv joH'a'; ta'mey quv muSHa'; qabDaj lulegh quvwI'pu'.

bom 12

1 QoQpInvaD bomvam qon DawID; SemI'nIt lo'lu'taHvIS [bomlu’].
yItoD, 'o joH'a'; mevpu' batlh vangwI'; Humanpu' jojvo' ngabpu' quvwI’pu'.
2 jIlDajvaD nep Hoch; bochmoHwI' wuSDu', 'o'wen tIq je lo'taHvIS, jatlh.
3 Hoch bochmoHwI' wuSDu', jat mIywI' je pe'chu'jaj joH'a'.
4 jatlh ghotpu'vam: “jat wIlo'taHvIS maQap; nuHub wuSDu'maj; nuche' 'Iv?”
5 “mIpHa'wI'pu' QIHmo', Do’Ha’wI'pu' beymo', DaH jIHu',” jatlh joH'a', “Qanlu' neHchugh, vaj vIQan.”
6 mu'mey nIt bIH joH'a' mu'mey'e'; puH vIncha'Daq SIrlIy waHlu'bogh lurur; Sochlogh watlhmoHlu'.
7 chaH DaQan, 'o joH'a', reH puq poHvamvo' Dachoq.
8 Hoch DopDaq ghach jIvvo'pu; jaSHa' Humanpu’ jojDaq lo'laHbe'ghach loplu'.

bom 13

1 QoQpInvaD [bomvam qon] DawID.
qaS poH 'ar, 'o joH'a'? reH cholIJ? qaStaHvIS poH 'ar jIHvo' qablIj DaSo'?
2 qaStaHvIS poH 'ar qeS nej qa'wIj? qaStaHvIS jaj naQ, jach tIqwIj 'e' ghorgh mev? qaStaHvIS poH 'ar jaghpu'wI' jen law', jIjen puS?
3 HIqel 'ej HIjang, 'o joH'a' Qun'a'wI'; mInDu'wIj DawovmoHbe'chugh, vaj Hegh vIQong.
4 'ej jatlh jaghwI': “vIcharghpu'!” 'ej jIjelmo' tIv jaghpu'wI'.
5 'ach pung'a'lIj vIvoqpu'; tuDlIjmo' tIv tIqwIj.
6 joH'a'vaD jIbom, pop munobmo'.

bom 14

1 QoQpInvaD [bomvam qon] DawID.
jatlh qoH tIq: “Qun'a' lu'lu'be'.” qal chaH; ta'mey 'up luta'. ta' QaQ ta'bogh vay' tu'lu'be'.
2 chalvo' Humanpu' legh joH'a'. yajbogh, Qun'a' nejbogh je vay' tu'lu' 'e' legh neH.
3 Haw' Hoch; nItebHa' qalchoHpu'. ta' QaQ ta'bogh vay' tu'lu'be'. ghobe', pagh.
4 Sovbe''a' Hoch mIghwI'pu'? ghotpu'wI' Sop; tIr ngogh lurur ghotpu'wI' 'ej joH'a' lurItbe'.
5 pa' Hajqu', quvwI' puq poH tlhejmo' Qun'a'. mIpHa' nab botuHmoH boneH, 'ach lulIghDaj ghaH joH'a''e'.
6 tlhI'yon HuDvo' ghoSjaj yISra'el toD! ghotpu'Daj cheghmoHDI' joH'a', lopjaj ya'qov, Quchjaj yISra'el.

bom 15

1 bomvam qon DawID.
'o joH'a', jo'ley'lIjDaq Dab 'Iv? HuDlIj quvDaq Dab 'Iv?
2 batlh yItbogh vay'. ruv ta' 'ej vIt tIqDaj.
3 jatDaj lo'taHvIS mu'mey nepwI' joSbe'; jIlDaj QIHbe'; jupDaj tuHmoHbe'.
4 vum lumuSqu' mInDu'Daj, 'ach joH'a' vuvwI' quv. vabDot 'oy'DI' 'IpDaj pab.
5 nojDI', qav'ap poQbe'. chunwI' qaDmeH Huch lam tlhapbe'. not jel Dochmeyvam ta'wI'.

bom 16

1 mIqtam bom qon DawID.
HItaHmoH, 'o joH'a', SoHvaD lulIghwIj vIDammo'.
2 joH'a'vaD vIjatlh: “joHwI' SoH; qaghajbe'chugh, pagh QaQ vIghaj.
3 puHDaq quvwI'pu''e', Dunqu'. chaHDaq 'oH Hoch belwIj.
4 latlh Qun tlha'chugh vay', vaj ghur vay'vetlh Hampongmey. mumuchbogh Soj vIlIchQo', 'ej pongmeychaj jatlhQo' wuSDu'wIj.
5 pop vI'atbogh HIvje'wIj je ghaH joH'a''e'; San naghwIj Da'uch.
6 Daqmey belmoHwI'Daq jIHvaD pumpu' tlheghmey, 'ej 'IH pop vI'atbogh.
7 muqeSbogh joH'a' vIquvmoH; 'ej qaStaHvIS ram mughojmoH tIqwIj.
8 reH jIH tlhopDaq joH'a' vIlanta'; nIHwIj ghopDaq ghaHtaHmo', jIjelbe'.
9 vaj Quch tIqwIj, 'ej tIv ngay'wIj; 'ej DabtaHvIS 'oynotwIj Qanlu'.
10 Se'olDaq qa'wIj Dalonbe'; 'ej qalchoHghach quvwI'lI' DaleghmoHbe'.
11 yIn He choSovmoH; vey' DaqlIj 'ej muQuchmoH; reH nIH ghoplIjDaq bIH belmey'e'.

bom 17

1 Qun'a' tlhobmeH DawID bomvam lo’.
ruv DIb yIQoyneS, 'o joH'a'; beywIj yIbuS! qatlhobDI', teSlIj yInobneS, yuDHa'mo' wuSDu'wIj.
2 SoHvo' ghoSjaj yojwIj; Dochmey QaQ bejjaj mInDu'lIj.
3 tIqwIj DanuD; qaStaHvIS ram choSuch; chotobpu' 'ej pogh DaSam; woghbe' nujwIj 'e' vIHechta'.
4 loD ta'mey vIrIch: wuSDu'lIj mu'meymo' HI' Hemey vIjunpu'.
5 tawmeylIj 'uchpu' qamDu'wIj; tangbe'pu'.
6 qarIt, chojangmo', 'o Qun'a'; jIHvaD teSDu'lIj tItlhe'moHneS; mu'meywIj tIQoyneS.
7 pung'a'lIj Dun vI'ang; nIH ghoplIjDaq jaghpu'chajvo' lulIgh nejchugh vay', vaj vay'vetlh tuDwI' SoH.
8 mIn 'epIl naH vIrurmeH HIpolneS; telDu'lIj QIbDaq HISo'neS.
9 muHIv jIvvo'pu'; muDech jaghpu'wI' HeghmoHwI'.
10 vupbe'meH SoQ tIqDu'chaj; mu'mey nguq jatlh nujDu'chaj.
11 DaH qamDu'maj Dech; yavDaq nupummoHmeH mInDu'chaj lan.
12 vIrghrupbogh vIghro''a' rur; ghachbogh vIghro''a' Qup rur.
13 yIHu', 'o joH'a', ghaH yIqaD 'ej yIpummoH; yanlIj Dalo'taHvIS jIvvo'vo' qa'wIj yItoD.
14 qo' loDpu'vo' [HItoDmeH] ghoplIj yIlo', 'o joH'a'. yInvamDaq 'oH popchaj'e'; chorchaj buy'moH qengHoDlIj; puqpu'chajmo' yon chaHv; ghupu'chajvaD chuv luratlhmoH.
15 jIH'e', ruvmo' qablIj vIleghchu'; jIvemDI', muyonmoH tu'qomlIj.

bom 18

1 QoQpInvaD bomvam qon DawID, joH'a' toy'wI'. Hoch jaghpu'Daj ghopvo', Sa'ul ghopvo' je toDDI' joH'a', joH'a'vaD bomvam mu'mey jatlh. jatlh: qamuSHa', 'o joH'a', HoSwIj.
2 naghwIj jem'IHwIj je toDwI'wI' je ghaH joH'a''e'; Qun'a'wI', naghwIj, lulIghwIj, yoDwIj, toDwIj gheb, chalqach'a'wIj.
3 joH'a' vIrIt. ghaH naDlu' 'e' qotlh 'ej jaghpu'wI'vo' vItoDlu'.
4 muDech Hegh tlheghmey; mulImmoH lo'laHbe'ghach bIQtIqmey;
5 muDech Se'ol tlheghmey; muqaD Hegh ngelwI'mey.
6 jISotDI' joH'a' vIrIt; muboQmeH Qun'a'wI'vaD jIjach. chIrghDajvo' ghoghwIj Qoy, 'ej teSDu'DajDaq ghoS beywIj.
7 'ej jel yav 'ej Qom, 'ej wal HuDmey qappammey 'ej jel, QeHmo' ghaH.
8 tlhonDu'Dajvo' Sal tlhIch; 'ej nujDajvo' Sopchu' qul; ghaHvo' meQ ghav naghmey.
9 chal SIHmoH 'ej ghIr; qamDu'Daj bIngDaq 'oH QIb'a''e'.
10 che'rub lIgh 'ej puv; SuS telDu' DungDaq chung.
11 ghaH So'meH QIb lan; Dechbogh jo'ley' bIH bIQmey Hurgh'e' 'engmey jeD'e' je.
12 bochtaHghajDajvo' 'engmeyDaj tol chuch 'aplommey, qul naghmey je.
13 chalDaq tuD joH'a', 'ej ghoghDaj nob jenwI'’a’; lutlhej chuch 'aplommey, qul naghmey je.
14 'ej naQjejHommey ngeH 'ej ghomHa'; 'ej pe'bIl rawmoH 'ej chaH lImmoH.
15 'ej bIQtIqmey leghlu', 'ej qo' qappammey So'Ha'lu' bIqunDI', 'o joH'a', tlhuHDI' tlhonDu'lIj.
16 Daq jenvo' ngeH 'ej mutlhap; bIQmey law'vo' muQIq.
17 jaghwI' HoSvo', muSwI'pu'wI'vo' je mutoD, tlhoy HoSmo' chaH.
18 qaStaHvIS QIHwIj jaj muqaD, 'ach ngaqwIJ ghaH joH'a''e'.
19 Daq vaSDaq muqem 'ej mutoD, belDaj jIHmo'.
20 ruvwIjmo' muQIHHa' joH'a'; ghopDu'wIj Say'mo' jIHvaD nobHa';
21 joH'a' tIghmey vIpabpu'mo', 'ej jIvvo' vIDameH Qun'a'wI'vo' jItlheDpu'be'.
22 jIH tlhopDaq bIH Hoch yojmeyDaj'e', 'ej jIHvo' chutmeyDaj vIwoDpu'be'.
23 ghaH tlhopDaq jIpup, 'ej jImIghmeH jIbot'egh.
24 vaj ruvwIjmo' nobHa' joH'a', ghopDu'wIj Say' leghmo'.
25 matlhwI'vaD bImatlh; pupwI'vaD bIpup.
26 nItwI'vaD bInIt, 'ej ghob QaQ pabQo'wI'vaD bI'uplaw'.
27 chuD nguqHa' DatoD, 'ach mInDu' nguq Da'eSmoH.
28 SechwIj DawovmoH SoH'e', joH'a' Qun'a'wI'; QIbwIjDaq tamghay Daqem.
29 SoHmo' jIqettaHvIS QaS vIjuSlaH, 'ej Qun'a'wI'mo' reD DungDaq jISup.
30 pup Qun'a'vam He; joH'a' mu' toblu'; ghaHvaD lulIgh luDambogh Hoch yoD ghaH.
31 Qun ghaHbe'chugh joH'a''e', Qun ghaH 'Iv'e'? nagh ghaHbe'chugh Qun'a'ma', nagh ghaH 'Iv'e'?
32 muHoSmoH Qun'a' 'ej HewIj pupmoH.
33 ngem Sargh qamDu' rur qamDu'wIj 'e' qaSmoH, 'ej DaqmeywIj jenDaq mulan.
34 ghobmeH ghopDu'wIj ghojmoH; jey' Sorpuq nuH 'ob luSIHmoHlaH DeSDu'wIj.
35 toDlIj yoD munobpu' 'ej mutaHmoH nIHlIj ghop 'ej muDunmoH nguqHa'ghachlIj.
36 qamDu'wIjvaD taw DavaSmoH, vaj tangbe' qamDu'wIj.
37 jaghpu'wI' vItlha' 'ej vIjuS 'ej luQaw'lu'pa' jIcheghbe'.
38 chaH vIghID vaj Hu'laHbe'; qamDu'wIj bIngDaq pum.
39 ghobmeH HoS mupeS; jIH bIngDaq muqaDbogh Hoch Da'oqmoH.
40 jIHvaD jaghpu'wI' mongDu' Danob 'ej muSwI'pu'wI' vIQaw'.
41 luboQlu'meH jach chaH, 'ach chaH toDbogh vay' tu'lu'be'. joH'a'vaD jach chaH, 'ach chaH jangbe'.
42 chaH vItap; SuSDaq Say'qIS lurur. chaH vIwoD; tawDaq DabqI' lurur.
43 SolDI' ghotpu', chaHvo' chotoD; nughmey nach vImojmeH choSugh. mutoy' ghotpu' vISovpu'be'bogh.
44 muQoyDI' mulob; jIH bIngDaq mulan'eghmoH novpu'.
45 toDujchaj luweS novpu' 'ej jeltaHvIS jem'IHmeychajvo' ghoS.
46 yIn joH'a' 'ej chepjaj naghwIj 'ej toDwIj Qun'a' peplu'jaj.
47 bortaS munob Qun'a' 'ej jIH bIngDaq ghotpu' lan,
48 jaghpu'wI'vo' mutoD; HISlaH, chopep vaj jIH jen law' qaDwI'pu'wI' jen puS; loD ralvo' chotoD.
49 meqvammo' nughmeyDaq qatlho', 'o joH'a', 'ej ponglIjvaD jIbom.
50 ta'DajvaD toD Dun nob 'ej 'atwI'DajvaD pung'a' 'ang, reH DawIDvaD nortlhampu'DajvaD je.

bom 19

1 QoQpInvaD bomvam qon DawID.
Qun'a' ngay' lumaq chalmey, ghopDu'Daj ta'mey maq muD moQbID.
2 QIch lIch pem pem qubbID 'ej Sov 'ang ram ram qubbID.
3 QIch tu'lu'be', mu'mey tu'lu'be', ghogh Qoylu'be'.
4 Hoch qo' ghoS tlheghchaj 'ej qo' HeHmey ghoS mu'meychaj.
bIHDaq julvaD jo'ley' cher ghaH;
5 pa'Daj mejbogh SawwI' rur. Quch'eghmoH; HeDajDaq qetbogh Sub rur.
6 chalmey HeHvo' 'oH jajlo'Daj'e' 'ej HeH latlhDaq 'oH ghoDaj'e' 'ej tujDajvo' So' pagh.
7 pup joH'a' chut. qa' rIHqa'. nguHDI' joH'a', DIch 'oH. napwI' valmoH.
8 poQDI' joH'a', lugh. tIq Quchqu'moH. ra'DI' joH'a', nIt. mInDu' wovmoH.
9 joH'a' vuvlu'DI', Say'. reH taH. teH joH'a' yujmey 'ej ruv lupabchu'.
10 bIH lo'laH law' qol'om lo'laH puS; qol'om'a' nItqu' lo'laH puS.
wIblaw' na'ran 'e' luqaSmoH; wIblaw' Su'ghar qutmey je.
11 bIHmo' ghuH toy'wI'lI' je 'ej lupablu'DI' pop Dun tu'lu'.
12 Qaghmey yajlaH 'Iv? pIchmey peghvo' HIchunmoH.
13 ta'mey nguqvo' toy'wI'lI' yIchoq je; muche'be'jaj! vaj jIpup 'ej jIwoghbe'meH jIchun.
14 bIbejtaHvIS nujwIj mu'mey, tIqwIj buSHachmey je tIlaj, 'o joH'a', naghwIj toDwI'wI' je.

bom 20

1 QoQpInvaD bomvam qon DawID.
qaSDI' Seng jaj Dujangjaj joH'a'! DuQanjaj ya'qov Qun'a' pong!
2 chIrghvo' SoHvaD QaH ngeHjaj, 'ej tlhI'yon HuDvo' bItaHmeH ngaq nobjaj.
3 Hoch Da'anmoHbogh qawjaj 'ej Hoch DameQbogh lajjaj! SelaH
4 Hoch neHbogh tIqlIj nobjaj 'ej nabmeylIj naQmoHjaj!
5 toDlIjmo' majachjaj 'ej malopjaj, 'ej Qun'a'ma' pongvaD joqwI'meymaj DIcherjaj! Hoch Datlhobbogh ta'jaj joH'a'!
6 DaH joH'a' 'atwI' Sughbogh toD ghaH 'e' vISov; chalDaj quvvo' ghaH jang 'ej toDmeH nIHDaj ghop HoS lo'.
7 Dujmey voq 'op 'ej Sarghmey voq 'op, 'ach joH'a' Qun'a'ma' pong wIvoq.
8 Dej 'ej pum chaH, 'ach maHu' 'ej maQam.
9 'o joH'a', ta' yItoD! nujangjaj marItDI'.

bom 21

1 QoQpInvaD bomvam qon DawID.
'o joH'a', HoSlIjmo' lop ta', 'ej toDlIjmo' Quchqu'.
2 vay' neHDI' tIqDaj, ghaHvaD vay'vetlh Danob. tlhobDI' wuSDu'Daj, bIvarbe'. SelaH
3 DaghomDI' qengHoD QaQ Daqem. nachDajDaq qol'om'a' yughbogh mIv'a' DatuQmoH.
4 yIn 'e' Dutlhob 'ej Hochlogh ghaHvaD jajmey nI' Danob.
5 toDlIjmo' Dun ngay'Daj; ghaHvaD quv woQ je Danob.
6 reH DaquvmoH; bISaHDI' DaQuchmoH.
7 joH'a' voq ta'. jenwI'’a’ pung'a'mo' jelmoHlu'be'.
8 Hoch jaghpu'lI' Sam ghoplIj; muSwI'pu'lI' Sam nIHlIj ghop.
9 bInarghDI' qul qerjIq lurur 'e' DaqaSmoH; QeHDI' joH'a', chaH ghup 'ej Sop qul.
10 tera'vo' puqpu'chaj DaQaw' 'ej Humanpu'vo' nortlhampu'chaj DaQaw'.
11 nIqaDmeH ta'mey mIgh nab 'ej Seng lu'ogh 'ach Qapbe'.
12 DaHaw'moH. nuHmeylIj 'ob Dalo'taHvIS qabmeychaj DaQeq.
13 HoSlIjmo', 'o joH'a', Dapepqu'lu'jaj. woQlIj wIbom 'ej wInaD.

bom 22

1 QoQpInvaD bomvam qon DawID. jajlo' Sarghbe' tIgh pab 'oH.
Qun'a'wI' Qun'a'wI' qatlh cholonpu'?
qatlh chotoDmeH jIjachDI' bIHopqu'?
2 'o Qun'a'wI', qaStaHvIS pem jISaQ 'ach bIjangbe'. qaStaHvIS ram jIleSlaHbe'.
3 'ach bIquv. yISra'el naDmeyDaq Daba'.
4 nIvoqpu' no'ma'. nIvoqpu' 'ej DatoDpu'.
5 SoHvaD jachpu' 'ej lutoDlu'pu'. nIvoqpu' 'ej tuHpu'be'.
6 'ach qagh jIH 'ej loD jIHbe'. muvaq loDpu' 'ej mumuSqu' ghotpu'.
7 munuS Hoch muleghchugh. mon wuSDu'chaj 'ej ron nachDu'chaj.
8 “joH'a' voq! ghaH toDjaj! ghaH narghmoHjaj, belDaj ghaHmo'!”
9 'ach chI'IDvo' cholel. SoSwI' ngob'atDu'Daq chovoqmoH.
10 jIboghDI' SoHvaD mujaDlu' 'ej SoSwI' chI'IDvo' Qun'a'wI' SoH.
11 jIHvo' yIHopQo', Summo' Seng 'ej muQaHmeH pagh tu'lu'.
12 muDech tangqa'mey law'; muSev baSan tangqa''a'mey.
13 jIHDaq nujDu'chaj poSmoH; vIrghbogh 'ej jachbogh vIghro''a' lurur.
14 jIghIt; bIQ vIrur. Hoch HomDu'wIj luchevlu'. req rur tIqwIj. qoDwIjDaq tetlu'.
15 QaD HoSwIj; DabqI' 'un rur. ghapqa'Du'wIjDaq ngam jatwIj. Hegh Say'qISDaq choQotmoH.
16 muDech targhmey; muSev mIghwI'pu' wey; ghopDu'wIj qamDu'wIj je ghIDpu'.
17 Hoch HomDu'wIj vItoghlaH; mubej chaH 'ej mulegh.
18 chaHvaD SutmeywIj wav; yIvbeHwIjvaD naghmey SuD.
19 'ach SoH, 'o joH'a', yIHopQo'! choQaHmeH yImoD, wuywI'wI'.
20 yanvo' qa'wIj yItoD; targh HoSvo' yInwIj yItoD!
21 vIghro''a' nujvi' yItoD! tangqa'mey tlhay'Ha' pu'Du'vo' chojangpu'.
22 loDnI'pu'wI'vaD ponglIj vIrIch; yej jojDaq qanaD.
23 tlhIH, joH'a' vuvwI'pu', yInaD! Hoch ya'qov nortlhampu', ngay' yInob! Hoch yISra'el nortlhampu', yIHaj!
24 vay' QIHlu'chugh vaj vay'vetlh muSbe' 'ej parbe', 'ej vay'vetlhvo' qabDaj So'be', 'ach ghaHvaD SaQDI' Qoy ghaH.
25 SoHvo' yej'a'Daq 'oHtaH naDwIj'e'. SaHDI' vuvwI'pu'Daj 'IpmeywIj vIpab.
26 Sop nguqHa’wI'pu' 'ej yon; joH'a' naD nejwI'pu'Daj! reH yInjaj tIqDu'raj!
27 joH'a' luqaw qo' HeHmey 'ej ghaHDaq tlhe' 'ej SoH tlhopDaq tor Hoch nughmey tuqmey.
28 joH'a'vaD 'oH wo''e' 'ej nughmey che'.
29 Sop Hoch qo' chepwI'pu' 'ej naD; Say'qISDaq ghIrchugh vay', qa'Daj yIn polbe'chugh vay', vaj ghaH tlhopDaq tor vay'vetlh.
30 lutoy' nortlhampu'; puq poH vebvaD joH'a' rIchlu';
31 ghoS chaH 'ej wej boghbogh ghotpu' ja' 'ej chaHvaD ruvDaj lumaq. jatlh: ta'ta'.

bom 23

1 bomvam qon DawID.
QorghwI'wI' ghaH joH'a''e'; pagh vIHutlh.
2 yotlhmey SuDDaq muQotmoH, bIQmey ghanHa'Daq muDev.
3 qa'wIj rIHqa'.
pongDaj meqvaD ruv tawmeyDaq muDev.
4 Hegh QIb ngechDaq jIyItchugh, mughIj pagh mIgh, chotlhejmo'.
murach jeqqIjlIj naQlIj je.
5 jIHvaD 'uQ'a' raS Dacher 'ej ghu'vam lutu' jaghpu'wI'.
nachwIjDaq watrIn DangoH. vey' HIqwIj; ngaSlaHbe' HIvje'wIj
6 mutlha'bej Qapla' pung je, qaStaHvIS yInwIj Hoch jajmey
'ej reH joH'a' juH qach vIDab.

bom 24

1 bomvam qon DawID.
joH'a' yer 'oH tera''e' buy'moHbogh Hoch'e' je; qo''e' nganpu'Daj'e' je.
2 bIQ'a'mey DungDaq chermo'; bIQtIqmey DungDaq chenmoH.
3 joH'a' HuDDaq Sal 'Iv? 'ej DaqDaj quvDaq Qam 'Iv?
4 ghopDu' Say' tIq watch ghajbogh vay'; Doch ngebvaD qa'Daj pepbe' 'ej 'IpDI' tojbe'.
5 joH'a'vo' pop Hev 'ej toDDaj Qun'a'vo' ruv Hev.
6 ghaH nejbogh puq poH 'oH puq poHvam'e'. ya'qov Qun'a' qab lunej. SelaH
7 nochDu'raj yIpep, 'o lojmItmey! bopeplu'jaj, 'o DInmey tIQ, 'ej 'el ngay' ta'.
8 ngay' ta'vam 'Iv? joH'a', HoS HoSghaj je, joH'a', vIqDaq HoSghaj.
9 nochDu'raj yIpep, lojmItmey! yIpep, DInmey tIQ, 'ej 'el ngay' ta'.
10 ngay' ta'vam 'Iv? mangghom joH'a' ghaH ngay' ta''e'! SelaH

bom 25

1 [bomvam qon] DawID.
SoHvaD, 'o joH'a', qa'wIj vIpep.
2 Qun'a'wI', qavoq. jItuH 'e' yIqaSmoHQo'; muchargh jaghpu'wI' 'e' yIqaSmoHQo'.
3 tuHbe'bej Hoch loSwI'pu'lI'; batlhHa' maghchugh vay', vaj tuHjaj vay'vetlh.
4 tIghmeylIj HISovmoH; HemeylIj HIghojmoH.
5 vItlIjDaq HIDev 'ej HIghojmoH, toDwIj Qun'a' SoHmo'; qaStaHvIS pem Hoch qaloS.
6 punglIj yIqaw, 'o joH'a', 'ej pung'a'lIj yIqaw, tIQmo' bIH.
7 HojnIy jIHtaHvIS jIyem 'ej jIwogh 'e' yIqawQo'; pung'a'lIjmo' HIqaw, bIQaQmo', 'o joH'a'.
8 QaQ joH'a' 'ej wan; vaj tIgh yemwI'pu' ghojmoH.
9 ruvDaq nguqHa’wI'pu' Dev 'ej nguqHa’wI'pu'vaD tIghDaj ghojmoH.
10 mabDaj, chutmeyDaj je pabwI'pu'vaD pung'a' vIt je bIH Hoch joH'a' Hemey'e'.
11 ponglIjmo', 'o joH'a', jIDIv 'e' yIqeHHHa', jIDIvqu'mo'.
12 joH'a' vuvbogh loD ghaH 'Iv'e'? He wIvmeH ghaH ghojmoH.
13 yIntaHvIS qa'Daj chep 'ej qo' lu'at nortlhampu'Daj.
14 vuvwI'pu'DajvaD ghIntaq gheS joH'a' 'ej chaHvaD mabDaj SovmoH.
15 reH joH'a' luQeq mInDu'wIj, SIr'o'vo' qamDu'wIj luHmo'.
16 jIHDaq yItlhe' 'ej jIHvaD tlhoqtlhal yIturneS, jI'ubmo' 'ej vIQIHlu'mo'.
17 tIqwIj Sengmey lutInmoHlu'; jISotDI' HItoD.
18 vIQIHlu'DI' 'ej jIDoy'DI' HIqel 'ej jIyemDI' reH HIqeHHa'.
19 jaghpu'wI' law' 'e' yIqel 'ej mumuSmeH ral 'e' yIqel.
20 qa'wIj yI'av 'ej HItoD! jItuH 'e' yIqaSmoHQo', SoHvaD lulIghwIj vIDammo'.
21 mupoljaj batlh ruv je, qaloSmo'.
22 Hoch yISra'el Sengmeyvo' ghaH yIje'qa', Qun'a'.

bom 26

1 [bomvam qon] DawID.
HInoHneS, 'o joH'a', batlh jIyItpu'mo', 'ej joH'a' vIvoqtaHvIS jItangpu'be'.
2 HInuDneS, 'o joH'a', 'ej HIchovneS; tIqwIj yabwIj je tItobneS.
3 pung'a'lIj lutu' mInDu'wIj 'ej vItlIjDaq jIyIt.
4 jIba'DI' loDpu' tojwI' vItlhejbe' 'ej jIghoSDI' QaqwI'pu' vItlhejbe'.
5 mIghwI'pu' yej vImuS 'ej jIba'DI' jIvvo'pu' vItlhejbe'.
6 ghopDu'wIj vISay'moH jIchunmo' 'ej 'anmoHmeH raSlIj vIbav, 'o joH'a'.
7 tlho'meH ghogh Qoylu' 'e' vIqaSmoH 'ej Hoch boqHarmeylIj vImaq.
8 'o joH'a', juH qachlIj vImuSHa' 'ej Daq'e' Dabbogh ngay'lIj vImuSHa'.
9 yemwI'pu' tlhejmeH qa'wIj yIlIqneSQo'. 'Iw lu'ojbogh loDpu' tlhejmeH yInwIj yIlIqneSQo'.
10 ghopDu'chajDaq bIH nabmey mIgh'e'. nIHchaj ghopDu' buy'moH Huch qal.
11 'ach jIH'e', batlh jIyIt; HIje'qa' 'ej jIHvaD tlhoqtlhal yIturneS.
12 puH beQDaq Qam qamwIj; yejmeyDaq joH'a' vIquvmoH.

bom 27

1 [bomvam qon] DawID.
tamghaywIj toDwIj je ghaH joH'a''e'; mughIj 'Iv? yInwIj lulIgh ghaH joH'a''e'; muHaj 'Iv?
2 'oynotwIj luSopmeH mughoSDI' mIghwI'pu', jaghpu'wI' gholpu'wI' je, tang chaH 'ej pum.
3 muqaDmeH raQ cherchugh mangghom, vaj tIqwIj ghIjlu'be'; muqaDmeH Hu'chugh noH, vaj jIbaw'.
4 joH'a' vItlhob; wa' Doch vInej: qaStaHvIS Hoch yInwIj jajmey, joH'a' juH qach vIDab; joH'a' 'IH vIbej 'ej chIrghDajDaq jIpaQ.
5 qaSDI' Seng jaj, raywalDajDaq muSo'; jo'ley'Daj peghDaq muvel; naghDaq mupep.
6 'ej DaH nachwIj peplu'; muDechbogh jaghpu'wI' DungDaq 'oHtaH; jo'ley'DajDaq jIQuchtaHvIS jIjach 'ej jI'anmoH. joH'a'vaD jIbom 'ej jInaD.
7 'o joH'a', ghoghwIj bey yIQoyneS; jIHvaD tlhoqtlhal yIturneS 'ej HIjangneS!
8 Dajatlh: “qabwIj yInej.” SoHvaD jatlh tIqwIj: “'o joH'a', qablIj vInej.”
9 jIHvo' qablIj yISo'neSQo'. bIQeHDI' toy'wI'lI' yIwoDneSQo', QaHwI' SoHmo'. HIlonneSQo' 'ej HIchoSneSQo', toDwIj Qun'a'.
10 pulonpu' vavwI' SoSwI' je, 'ach muHev joH'a'.
11 tIghlIj HIghojmoHneS, 'o joH'a', 'ej taw beQDaq HIDevneS jaghpu'wI'mo'.
12 gholpu'wI' ghopDu'vaD HInobneSQo'; muqaDmeH Hu'pu' nguHwI'pu' nepwI' 'ej ralmeH rech.
13 yInwI'pu' puHDaq joH'a' QaQ vIlegh 'e' vIHar.
14 joH'a' yIloS, yIHoS, 'ej tIqlIj Subjaj; joH'a' yIloS!

bom 28

1 [bomvam qon] DawID.
qarIt, 'o joH'a'; naghwIj, teSDu'lIj tISoQmoHneSQo'. jIHvaD bItamchugh, vaj wutlh lughIrbogh ghotpu''e' vIrur.
2 tlhoqtlhal vItlhobDI' ghoghwIj yI'IjneS, choQaHmeH jIjachDI', chIrghlIj qoD'a' lurghDaq ghopDu'wIj vIpepDI'.
3 jIvvo'pu' vItlhejmeH HIluHQo'. ta'mey mIgh ta' chaH; jIlpu'chajvaD roj lujatlh 'ach tIqDu'chajDaq mIgh chaH.
4 vay' qotlhchugh nuv ta'meychajmo' mIgh, vaj vay'vetlh yInobneS. vay' qotlhchugh ghaH ghopDu'chaj ta'meymo', vaj popchaj yInobneS.
5 joH'a' ghopDu' ta'mey qImHa'mo' chaH pej ghaH 'ej chenQo'.
6 quvjaj joH'a'! pung vItlhobDI' ghoghwIj Qoy ghaH.
7 HoSwIj yoDwIj je ghaH joH'a''e'; ghaH voq tIqwIj 'ej vIQaHlu';
Quchqu' tIqwIj 'ej jIbomtaHvIS ghaH vItlho'.
8 ghotpu'DajvaD HoS ghaH joH'a''e'; 'atwI'DajvaD toD lulIgh ghaH.
9 ghotpu'lI' tItoDneS 'ej quHlIj yIquvmoHneS; reH QorghwI'chaj yIDaneS 'ej tIqengneS.

bom 29

1 bomvam qon DawID.
joH'a'vaD, Qunpu' puqloDpu', joH'a'vaD ngay' HoS je tInob.
2 joH'a'vaD ngay''e' qotlhbogh pongDaj yInob.
'IHqu'mo' quvDaj joH'a' yInaD.
3 bIQmey DungDaq 'oH joH'a' ghogh'e'; tuD ngay' Qun'a'; bIQmey law' DungDaq 'oH joH'a''e'.
4 HoSghaj joH'a' ghogh; 'IHqu' joH'a' ghogh.
5 'ereS Sormey ghor joH'a' ghogh; leva'non 'ereS Sormey ghor joH'a'.
6 Sup leva'non; tangqa'Hom rur 'e' qaSmoH ghaH; 'ej tangqa' Qup rur SIryon.
7 qul QInmey pan joH'a' ghogh.
8 puH chIm jelmoH joH'a' ghogh; qa'deS puH chIm jelmoH joH'a'.
9 boghmoH ngem Sarghmey 'e' qaSmoH joH'a' 'ej ngemmey tuQHa'moH joH'a' 'ej chIrghDaq ngay' lujach Hoch.
10 SoD DungDaq quS'a'DajDaq ba' joH'a'; reH quS'a'DajDaq ba'taHvIS ta' Da.
11 nughDajvaD HoS nobjaj joH'a'! nughDaj quvmoHtaHvIS chaHvaD roj nobjaj joH'a'!

bom 30

1 chIrgh SeQmoHmeH bomvam qon DawID.
qanaDqu', 'o joH'a', chopeppu'mo', 'ej muvoq jaghpu'wI' 'e' Dachaw'be'pu'.
2 'o joH'a' Qun'a'wI', choQaH 'e' vItlhobpu' 'ej chopIvmoHpu'.
3 'o joH'a'. Se'olvo' qa'wIj Dapeppu' 'ej QemjIq vIghIrbe'meH yInwIj Darachqa'pu'.
4 joH'a'vaD naDmey yIbom, 'o quvwI'pu'Daj, 'ej pongDaj quv yItlho'.
5 ngaj QeHDaj, 'ach nI' belDaj; yIn rur. qaStaHvIS ram SaQlu' 'ach qaSDI' po Quchlu'.
6 jIH'e', jIcheptaHvIS, “not jIjel” vIjatlh.
7 bellIjmo', 'o joH'a', HuDwIj HoS DaQammoHpu'. qablIj DaSo'DI' jISot.
8 SoHvaD, 'o joH'a', jIjach; joH'a'vaD pung vItlhob.
9 nuq Suq HeghwIj, QemjIq vIghIrchugh? DunaD'a' Say'qIS? vItlIj rIch'a'?
10 yI'IjneS, 'o joH'a', 'ej jIHvaD tlhoqtlhal yIturneS! 'o joH'a', jIHvaD QaH yIDaneS!
11 jImI'; jI'IQ 'e' qa' 'e' DaqaSmoH; weSjechwIj ghegh chotuQHa'moH 'ej lop Sut chotuQmoH.
12 naDlIj bom ngay'wIj 'ej tambe'. 'o joH'a' Qun'a'wI', reH qatlho'!

bom 31

1 QoQpInvaD bomvam qon DawID.
SoHvaD, 'o joH'a', lulIgh vIDam. not jItuH 'e' DaqaSmoH. ruvlIjmo' HItoDneS.
2 jIHDaq teSlIj yItlhe'moHneS; nom HItoD! jIHvaD nagh HoS yIDaneS; chotoDmeH Hub jem'IH yIDaneS.
3 naghwIj jem'IHwIj je SoH; ponglIjmo' choche' 'ej choDev.
4 muvonmeH SIr'o' So'lu'; 'oHvo' cholel. lulIghwIj SoH.
5 ghoplIjDaq qa'wIj vIlan; chotoDpu', 'o joH'a', vIt Qun'a'.
6 DavHam buSchugh vay', vaj vay'vetlh vImuS; ach joH'a' vIvoq.
7 pung'a'lIjmo' jIlop 'ej jIQuch. QIHwIj Dalegh; Sot qa'wIj 'e' DaSov.
8 jagh ghopvaD chonobbe'; puH beQDaq qamDu'wIj Dalanpu'.
9 jIHvaD tlhoqtlhal yIturneS, 'o joH'a', jISotmo'; jImoghmo' ragh mInwIj; ragh qa'wIj porghwIj je.
10 jI'IQmo' yInwIj natlhlu'; jIjachmo' DISmeywIj lunatlhlu'. jIyemmo' luj HoSwIj 'ej ragh HomDu'wIj.
11 Hoch gholpu'wI'mo' vIvaqlu' 'ej jIlpu'wI'vaD vIvaqqu'lu' 'ej muSovbogh Hoch vIlImmoH 'ej tawDaq jIHvo' Haw' muleghbogh Hoch.
12 vIlIjlu'pu'; Heghpu'bogh vay' vIrur. 'un ghorlu'pu'bogh vIrur.
13 tlhup ghotpu' law' 'e' vIQoy: Hoch Daqvo' ghIjlu'. muqaDmeH QuS chaH; yInwIj lutlhapmeH nap.
14 'ach qavoq, 'o joH'a'; vIjatlh: “Qun'a'wI' SoH.”
15 ghoplIjDaq bIH poHmeywIj'e'; jaghpu'wI' ghopvo' wamwI'pu'wI'vo' je HItoD!
16 toy'wI'lI'vaD qablIj yIbochmoHneS; pung'a'lIjmo' HItoD!
17 'o joH'a', jItuHbe' 'e' yIqaSmoHneS, qarItmo'; tuH jIvvo'pu' 'e' yIqaSmoHneS; tamtaHvIS Se'ol lujaHjaj.
18 jatlhlaHbe'jaj wuSDu' nepwI'; quvwI'pu' lurIchtaHvIS nguq 'ej vuvHa'.
19 toH! vuvwI'pu'lI' DaQorghqu'. voqwI'pu'lI' DaQorgh 'ej ghu'vam lutu' Hoch 'aDam puqloDpu'! 20 loDpu' nabmeyvo' lulIghlIj peghDaq chaH DaSo'; SoltaHvIS jatDu', jo'ley'lIjDaq chaH DaQan.
21 joH'a' quvmoHlu'jaj; veng SotDaq jIHtaHvIS jIHvaD pung'a'Daj Dun 'angpu'.
22 jIghumtaHvIS vIjatlh: “mInDu'lIjvo' vIpe'chu'lu'.” 'ach pung vItlhobDI', choQaHmeH jIjachDI', ghoghwIj DaQoy.
23 joH'a' yImuSHa', 'o Hoch quvwI'pu'Daj! matlhwI'pu' choq joH'a' 'ach nguqwI'pu' bIjqu'.
24 yIHoS 'ej Subjaj tIqDu'raj, 'o joH'a' luloSbogh Hoch!

bom 32

1 maSqIl'e' qonbogh DawID 'oH bomvam'e'.
yemDI' vay' 'ej qeHHa'lu'chugh, vaj Quchqu' vay'vetlh. woghchugh, vaj vellu'.
2 mawDI' loD 'ej qelbe'chugh joH'a', vaj Quchqu' loDvetlh; qo'DajDaq tojbe'.
3 jItamtaHvIS ragh HomDu'wIj; qaStaHvIS jaj Hoch jIjach.
4 qaStaHvIS pem ram je jIH DungDaq 'ugh ghoplIj. QaDchoHpu' HoSwIj; qImroq tuj rur ghu'vam. SelaH
5 jIyem SoHvaD 'e' vIchIDpu'; jIwogh 'e' vIvelbe'pu'. vIjatlh: “jIyem joH'a'vaD 'e' vIDIS,” 'ej choqeHHa'. SelaH
6 Dochvammo' DaSamlaHlu'taHvIS Duvanjaj Hoch quvwI'. qaSDI' bIQmey law' SoD, ghaH luSIchbe'bej chaH.
7 jIHvaD So'meH Daq SoH. Sengvo' chochoq; muDech toDlIj beymey. SelaH
8 yItmeH He Dangu'meH qavalmoH 'ej qaghojmoH; DubejtaHvIS mInwIj qaqeS.
9 yajbe'bogh vummeH Sargh yIrurQo'. 'oH SeHlu'meH chopmeH naQ, nach qogh je lulo'lu'. bIH lulo'be'lu'chugh, vaj ratlhQo' Sargh.
10 law' jIvvo' Sengmey, 'ach joH'a' voqbogh ghot Dech pung'a'.
11 joH'a'mo' peQuch 'ej pelop, 'o quvwI'pu', 'ej SuQuchtaHvIS pejach, 'o tIq QaQ lughajbogh Hoch!

bom 33

1 joH'a'mo' pejach, 'o quvwI'pu'! ghob quv pabwI'pu'vaD mIt naD.
2 joH'a' botlho'meH HurDagh yIlo'; ghaHvaD SubommeH tIngDagh yIlo'.
3 ghaHvaD bom chu' yIbom; ngItHel bochu'taHvIS pepo' 'ej bey'a'mey yIjach.
4 QaQ joH'a' mu', 'ej vItDaq bIH Hoch ta'meyDaj'e'.
5 ruv yoj je muSHa' ghaH; puH buy'moH joH'a' pung'a'.
6 chal chenmoHmeH joH'a', mu' lo', 'ej Hoch neghDaj chenmoHmeH, nujDaj tlhuH lo'.
7 bIQ'a' bIQmey lIq; Doj lurur. polmeH pa'meyDaq bIQmey jaQ lan.
8 joH'a' vuvjaj Hoch puH; luquvmoHjaj Hoch qo' DabwI'pu'.
9 jatlh' ghaH 'ej chen 'oH; ra' ghaH 'ej Qam 'oH.
10 Sepmey ngoQmey Sang joH'a'; nughmey nabmey bot ghaH.
11 reH Qam joH'a' ngoQmey; qaStaHvIS Hoch puq poHmey, Qam tIqDaj nabmey.
12 joH'a'vaD Qun'a'Daj Damchugh Sep, vaj Quchqu' Sepvetlh. quHDaj chaH ghotpu'vetlh'e' 'e' wIvpu'!
13 chalvo' bej joH'a'; Hoch Humanpu' legh.
14 DabmeH DaqDajvo' Hoch puH DabwI'pu' bej;
15 Hoch tIqDu'chaj chenmoH 'ej Hoch ta'meychaj tu'.
16 mangghomDaj Dunmo' ta' choqlu'be'; HoSDaj Dunmo' SuvwI' toDlu'be'.
17 toDmeH qey vIq Sargh; HoSDaj Dunmo' toDlaHbe'.
18 yIlegh, Hoch vuvwI'pu'Daj legh joH'a' mIn; pung'a'Daj tulbogh Hoch legh.
19 Heghvo' qa'chaj toD; ghungqu'DI' chaH yInmoH ghaH.
20 joH'a' loS qa'maj; QaHmaj yoDmaj je ghaH.
21 ghaHmo' Quch tIqmaj; pongDaj quv wIvoq.
22 pItultaHvIS pung'a'lIj gho'ang.

bom 34

1 qaSDI' wanI’vam, bomvam qon DawID: 'abI'meleH tlhopDaq DI'onDaj choH ghaH, 'ej ghaH vuj 'ej mej ghaH.
reH joH'a' vInaD : quvDaj jatlhtaHqu' nujwIj
2 joH'a'mo' mIy qa'wIj : Qoylu'DI' mIpbe'wI'pu' Quch
3 joH'a' quv wItInmoHjaj : pongDaj wInaDjaj
4 joH'a' vInejta' 'ej muQoyta' 'ej Hoch ghIjwI'meyvo' mutoDta'
5 ghaHDaq luleghqu' 'ej wov : vaj tuHbe' qabDu'chaj
6 jachta' mIpHa'wI'vam 'ej Qoy joH'a' 'ej SengDajvo' toD
7 joH'a' vuvwI' 'av joH'a' De'qengwI' 'ej DatoD
8 yIlargh 'ej QaQqu' joH'a' 'e' Datu' : Quch voqwI'
9 joH'a' yIvuv ghotpu'Daj : neHQo' vuvwI'pu'
10 chu' 'er 'e' neH 'ej ghung: 'ach joH'a' Danejchugh vaj SumIp
11 jIHDaq peghoS puqpu' 'ej yI'Ij : joH'a' vuvtaH 'e' SaghojmoH
12 'Iv yInqang 'ej jajmey law' neH maj leghmeH?
13 mIghtaHghachmo' yI'av jatraj 'ej wuSDu'raj lo'taH yInepQo'
14 mIghtaHghachvo' yImej 'ej yIQaQ! roj yInej 'ej yItlha'
15 QaQwI'pu' legh joH'a' mInDu' 'ej jachDI' Qoyqu'
16 mIghwI'pu' muS joH'a' qab vaj chaH lIjmeH Hoch
17 jach QaQwI'pu' 'ej Qoy joH'a' 'ej Sengchajvo' toD
18 'IQchu'wI' cholqu' joH'a'; qa' QoStaHghach toD
19 law' QaQwI' QatlhtaHghachmey 'ach Hoch toD joH'a'
20 Hoch HomDu'Daj pol ; ghorpu' pagh
21 qabwI'pu' HoH mIghwI'pu' ; mobchu' QaQwI'pu' muSwI'pu'
22 toy'wI'Daj qa' choq joH'a'; mobQo' pagh voqwI'pu'

bom 35

1 [bomvam] qon DawID.
'o joH'a', muqaDbogh ghotpu' yIqaDneS; muSuvbogh ghotpu' yISuvneS!
2 yoDwIj, may' SutwIj je tI'uchneS 'ej choQaHmeH yIHu'neS!
3 tlha'wI'pu'wI' DaqaDmeH naQjej, chonnaQ je tIQIqneS! qa'wIjvaD yIjatlhneS: “toDlIj jIH!”
4 tuHjaj yInwIj nejwI'pu' 'ej quvHa'jaj! QIHwIj nabwI'pu' luDoHmoHlu'jaj 'ej belHa'jaj!
5 SuSDaq tIr yub lururjaj; chaH vujjaj joH'a' HoSDo'!
6 Hurghjaj Hechaj 'ej 'Ichjaj; chaH tlha'jaj joH'a' HoSDo'!
7 meq luHutlh, QemjIqDaq [mujonmeH] SIr'o' luSo'DI'; meq luHutlh, yInwIj [lutlhapmeH] tlhanDI'.
8 Sovbe'DI' ghaH ghoSjaj QIH! ghaH jonjaj SIr'o' So'bogh! ghaH Qaw'meH 'oHDaq pumjaj!
9 'ej joH'a'mo' Quch qa'wIj 'ej toDDaj lop.
10 jatlh Hoch HomDu'wIj: “'o joH'a', Durur 'Iv? HoSwI'vo' mIpHa'wI' DatoD; HejwI'vo' mIpHa'wI', nguqHa’wI' je [DatoD].
11 Hu' nguHwI'pu' Qaq; Dochmey vISovbe'bogh mughel.
12 batlh jIvangDI' muQIH; Sot qa'wIj.
13 'ach jIH'e'—ropDI' chaH—weSjech ghegh vItuQ 'ej 'jISopQo' 'ej pe'vIl Qun'a'vaD jIqoy'.
14 jupwI', loDnI'wI' joq rur ghaH; ghu'vam vIDa. pe'vIl jI'eS'eghmoH; SoS HutlhchoHwI' vIDa.
15 'ach jISotDI' Quchqu' chaH 'ej ghom; muqaDmeH ghom HIvwI'pu' 'ej vISovbe'. muvIrgh 'ej mevbe'.
16 'uQ'a'Daq vaqwI'pu' HoQ rur; muyIvmeH Ho'Du'chaj lo'.
17 'o joH'a'wI', qaStaHvIS poH 'ar bIlegh? QIHmeychajvo' HItoDneS; vIghro''a'meyvo' yInwIj yItoDneS.
18 yej'a'Daq qatlho'; ghotpu' law' jojDaq qanaD.
19 jIHmo' Quchqu'jaj jaghpu'wI'; meq luHutlhDI' mumuSchugh, wangbe'jaj.
20 roj lujatlhbe'; puHDaq tamwI'pu' tojmeH nab chaH.
21 nujDu'chaj poSqu'moH 'ej jatlh: “toH, toH, leghpu' mInDu'maj.”
22 Daleghpu', 'o joH'a'; yItamtaHQo'; 'o joH'a', jIHvo' yIHopQo'.
23 yIvem 'ej yojwIjmo' yIHu', qaDwIjmo', 'o Qun'a'wI', joH'a'wI' je.
24 ruvlIjmo' HInoH, 'o joH'a', 'ej jIHmo' Quchqu'jaj chaH.
25 jatlhbe'jaj tIqDu'chaj: “toH, wIneHchugh, vaj wIghaj.” jatlhbe'jaj: “ghaH wIghuppu'.”
26 vIQIHlu'DI' Quchqu'chugh, vaj tuHjaj 'ej mISjaj. muqaDmeH pep'eghchugh, vaj tuQmoHjaj quvHa'ghach.
27 ruvwIjmo' belchugh vay', vaj Quchqu'jaj vay'vetlh 'ej jachjaj. jatlhtaHjaj: “joH'a' quvmoHlu'jaj; chepmo' toy'wI'Daj, bel ghaH.”
28 qaStaHvIS jaj Hoch, ruvlIj, naDlIj je jatlh jatwIj.

bom 36

1 QoQpInvaD [bomvam] qon DawID, joH'a' toy'wI'.
waghDI' jIvvo', tIqDajDaq jatlh; joH'a' qelDI', vuvbe'.
2 qel'eghDI', naD'egh; vaj yem 'e' muSbe'.
3 yemmeH 'ej tojmeH nujDaj mu'mey lo'; valQo' 'ej QaQQo'.
4 QongDaqDajDaq yemmeH nab; He QaQbe'Daq cher'egh; ta' mIgh muSqu'be'.
5 chal'a'Daq 'oHtaH pung'a'lIj, 'o joH'a'; 'engmey SIch tIvlIj.
6 Qun HuDmey rur ruvlIj; bIQ'a' lurur yojmeylIj; loD, Ha'DIbaH je DatoD, 'o joH'a'.
7 povqu' pung'a'lIj, 'o Qun'a'! telDu'lIj QIbDaq QaD Humanpu'.
8 juH qachlIj tlhaghmo' yonchu' chaH 'ej belmeylIj bIQtIqvo' DatlhutlhmoH.
9 SoHDaq 'oH yIn ghItmoHwI''e'; tamghaylIjDaq tamghay wIlegh.
10 SovwI'pu'lI'vaD pung'a'lIj yItaHmoHneS; tIq QaQ ghajwI'pu'vaD ruvlIj yItaHmoHneS.
11 mughoSbe'jaj qam nguq; munge'be'jaj jIvvo'pu' ghop.
12 pa' pumpu' mIghwI'pu'; lujaDlu' 'ej Hu'laHbe'.

bom 37

1 bomvam qon DawID.
nIghIjbe'jaj mIghwI'pu' 'ej yemwI'pu' tIghalQo'.
2 tugh lupe'lu'; magh lurur. tugh QaDchogh; tI SuD lurur.
3 joH'a' yIvoq 'ej batlh yIvang; puH DaDab 'ej DaQorghlu'bej.
4 joH'a' DatIvchugh, vaj tIqlIj chabalmey Dunob.
5 joH'a'vaD HelIj yInob; Davoqchugh, vaj [ghu'vam] qaSmoH ghaH.
6 ruvlIj ruchmoH ghaH; tamghay rur. DungluQ rur yojlIj.
7 joH'a'mo' yIleS 'ej yIloSchu'; vay' He tlhInDaq chepchugh, vaj yIQay'Qo', batlhHa' vangchugh.
8 bIQeH 'e' yImev 'ej bIQay' 'e' yImej. bIQeHqu'chugh, vaj bImIgh neH 'e' qaSmoH.
9 mIghwI'pu' lupe'chu'lu' 'ach puH lu'at joH'a' loSwI'pu'.
10 tugh taHbe' jIvvo'; DaqDaj Dabej 'ach taHbe'.
11 'ach puH lu'at nguqHa'wI'pu' 'ej roj vItlh lutIv.
12 quvwI' qaDmeH nab jIvvo' 'ej tapmeH Ho'DuDaj lo'.
13 'ach jIvvo'mo' Hagh joH'a'; paw jajDaj 'e' legh.
14 yan luQIqpu' jIvvo'pu' 'ej naQjejHom nuH lughuSpu'; mIpHa'wI', Do’Ha’wI' je lupumrupmoH chaH 'ej tIgh QaQ pabwI' lupeqrup.
15 tIqchaj tlhIn 'el yanchaj 'ej naQjejHom nuHmeychaj lughorlu'.
16 quvwI' mIp puS QaQ law' jIvvopu' mIp law' QaQ puS.
17 jIvvo'pu' DeSDu' lughorlu' 'ach quvwI'pu' taHmoH joH'a'.
18 tIgh QaQ pabwI'pu' jajmey Sov joH'a'; reH taH nob lu'atbogh.
19 qaStaHvIS poH mIgh, tuHbe' chaH; ghungqu'taHvIS Hoch, yon chaH.
20 jIvvo'pu' luQaw'lu'. yotlhmey 'IH rur joH'a' jaghpu'. ngab; tlhIch lurur.
21 ngIp jIvvo' 'ej DIlqa'be', 'ach varHa' quvwI' ej nob.
22 puH 'at ghotpu' quvmoHbogh, 'ach ghotpu' quvHa'moHbogh lupe'lu'chu'.
23 loD He cher joH'a' 'ej tIghDaj tIv.
24 tangchugh, pumchu'be', ghopDaj 'uchmo' joH'a'.
25 jIQuppu'; DaH jIqan. 'ach quvwI' lonlu' 'e' vIleghpu'be' 'ej tIr ngogh [luSopmeH] qoy' puqpu'Daj 'e' vIleghpu'be'.
26 reH tlhoqtlhal tur 'ej noj 'ej puqpu'Daj luquvmoHlu'.
27 yImIghQo' 'ej yIQaQ; vaj reH bItaH.
28 ruv muSHa' joH'a'; quvwI'pu'Daj lonbe'. reH chaH choq 'ach jIvvo'pu' puqpu' pe'chu'.
29 puH lu'at quvwI'pu' 'ej reH luDab.
30 jatlhDI' quvwI' nuj, val [mu'meyDaj] 'ej ruv rIch jatDaj.
31 tIqDajDaq 'oH Qun'a'Daj chut'a''e'; yIt'DI', tangbe'.
32 quvwI' bej jIvvo' 'ej ghaH HeghmoH 'e' nID.
33 ghopDajDaq ghaH lonbe' joH'a' 'ej noHlu'DI', qIchlu' 'e' qaSmoHbe'.
34 joH'a' DaloSchugh 'ej tIghDaj Dapabchugh, vaj puH Da'atmeH DuquvmoH; jIvvo'pu' lu'pe'lu'chu' 'e' Dalegh.
35 ghotpu' mIgh, HoSghaj je vIleghpu'. rIb'eghmoH; Sung Sor SuDqu' lurur.
36 'ach juS; yIqel, taHbe'. ghaH vInejpu' 'ach tu'lu'be'.
37 tIgh QaQ pabwI' yIbej 'ej yIqel; rojbogh loDvaD 'oH tuch'e'.
38 'ach woghwI'pu' luQaw'lu'chu' 'ej jIvvo'pu'vo' tuch pe'lu'chu'.
39 joH'a'vo' 'oH quvwI'pu' toD'e'. qaStaHvIS Seng poHmey, lulIghchaj ghaH.
40 chaH QaH joH'a' 'ej toD; jIvvo'pu'vo' chaH toD, ghaHvaD lulIgh luDammo'.

bom 38

1 qawmoHmeH bomvam [qon] DawID.
'o joH'a', HIqunneSQo' bIQeHDI'; HIbIjneSQo' bIQay'DI'.
2 mu'elpu' naQjejHommeylIj; mughIrpu' ghoplIj.
3 naQbe' 'oynotwIj belHa'ghachlIjmo'; pIvbe' HomDu'wIj jIyempu'mo'.
4 nachwIj lujuSpu' ta'meywIj mIgh; tep 'ugh lurur; tlhoy 'ugh.
5 He'So' HampongmeywIj 'ej nonchoH, qoH jIHmo'.
6 jISot 'ej vI'eSmoHlu'chu'; qaStaHvIS pem Hoch, jI'IQmo' jIjach.
7 meQqu' qoDwIj 'ej naQbe' 'oynotwIj.
8 jIpuj 'ej vItaplu'; jIghughugh tIqwIj Sengmo'.
9 'o joH'a', SoH tlhopDaq bIH Hoch chabalmeywIj'e'; jIghughughDI', SoHvo' So'be'.
10 pe'vIl joq tIqwIj; muluj HoSwIj. jIHDaq mInDu'wIj tamghay tu'lu'be'.
11 ropwIj luDoH juppu'wIj, bangpu'wIj je; Hop'eghmoH chuDpu'wIj.
12 vonmeH SIr'o'mey cher yInwIj nejwI'pu'; lotmey jatlh QIHwIj nejwI'pu' 'ej qaStaHvIS pem Hoch, tojmeH nab chaH.
13 'ach QoylaHbe'bogh loD vIrur; nuj poSmoHlaHbe'bogh loD tam vIrur. 14 QoylaHbe'bogh loD vIrurchoHpu'; nujwIjDaq qunmeH mu'mey tu'lu'be'.
15 SoH, 'o joH'a', qaloS; bIjang, 'o joH'a'wI' Qun'a'wI'.
16 vIjatlh: “jIHmo' Quchbe'jaj mIywI'pu', tangDI' qamwIj.”
17 jIpumrup 'ej reH reH 'oy'taHghach vIbam.
18 jIwogh 'e' vIDIS; jIyemmo' jIQoS.
19 'ach qu' jaghpu'wI' 'ej HoSghaj; law' mumuSbogh QIHwI'pu'wI'.
20 jIQaQDI' muDIlmeH ta'mey mIgh tur ghotpu'; tIgh QaQ vIpabmo' mupum chaH.
21 HIlonneSQo', 'o joH'a'! 'o Qun'a'wI', jIHvo' yIHopneSQo'!
22 tugh! HIQaHneS, 'o joH'a'wI', toDwIj!

bom 39

1 QoQpInvaD bomvam qon DawID; yeDu’tun lo’lu’taHvIS [bomlu’].
vIjatlh: “jIyembe'meH jatwIj vIlo'DI', HemeywIj vI'av. nujwIj vI'avmeH nach qogh vIlo'. ghu'vam tu' jIvvo'.”
2 jItampu' 'ej jIjatlhbepu' 'ach qey ghu'vam ej 'jISotqu'choH.
3 qoDwIjDaq tujchoH tIqwIj; jIqeltaHvIS, meQ qul; vaj jIjatlhmeH jat vIlo':
4 “'o joH'a', SIbI'Ha' Dor yInwIj 'ej jajmeywIj lujuvlaHlu'; ghu'vam HIghojmoHneS. jIru' 'e' vISovjaj.
5 yIqel, 'ujmey puS rur jajmeywIj 'e' DaqaSmoHpu'. pagh rur yInwIj 'e' Datu'. tlhuH neH rurbej Hoch nuvpu'. SelaH
6 yIttaHvIS loD, QIb rurbej; ghughughtaHvIS vI'laSHom rurbej. mIp SuqmeH vum loD 'ach 'oH boS 'Iv 'e' Sovbe'.
7 DaH, o 'joHa', nuq vIloS? SoH qatul.
8 reH jIwoghDI' HItoDneS. muvaq qoH 'e' yIqaSmoHneSQo'.
9 jItam; nujwIj vIpoSmoHbe', Data'pu'mo' SoH.
10 chomup 'e' yImevneS; naHmo' ghoplIj, vItlhuchlu'.
11 loDvaD Sun DaghojmoHDI', yemmo' ghaH Daqun. Hoch Qejbogh Danatlh; Su'wanHom ghew Darur. tlhuH neH rurbej Hoch loD! SelaH
12 qaqoy'DI', HIQoyneS, o 'joH'a', 'ej jIjachDI' teSlIj yInobneS; jISaQDI' yItamneSQo'! novlIj, meblIj je jIH; Hoch 'emrIghpu'wIj vIrur.
13 jImonqa'meH, jIHvo' mInDu'lIj tItlhe'moH, jImejpa' 'ej vItu'lu'be'pa'.

bom 40

1 QoQpInvaD bomvam qon DawID.
joH'a' vIloStaHvIS jItuv; jIHvaD tlhe' ghaH 'ej beywIj Qoy.
2 QIH QemjIqvo' muwoH; DabqI' puHvo' nagh'a'Daq qamDu'wIj lan; jIyItDI' mungaDmoH.
3 nujwIjDaq bom chu' lan; Qun'a'maj naDmeH bomvam vIbom. lulegh ghotpu' law' 'ej vuvqu' 'ej joH'a' luvoqchoH.
4 Quchqu' joH'a' voqbogh loD'e'. nguqwI'pu'Daq nepwI'pu'Daq je tlhe'be'.
5 maHvaD law' ta'meylIj Dun, buSHachmeylIj je, 'o joH'a' Qun'a'wI'; DururlaH pagh! bIH vImaq 'ej vIrIch, 'ach law'qu' bIH; lutoghlaHlu'be'.
6 'angmoHghach, nobmey SeQ je DatIvbe'pu', 'ach teS poS chonobpu'. nobmey meQlu'bogh, yemwI' nobmey je DapoQbe'pu'.
7 ghIq vIjatlh: yIqelneS, jIghoSpu'; mubopbogh paq Qumran ghItlhlu':
8 chaballIj vItur 'e' vItIv, 'o Qun'a'wI'; qoDwIjDaq 'oH chut'a'lIj'e'.
9 yej'a'Daq ruv bopbogh De' vImaqpu'; yIqelneS, wuSDu'wIj vIngaQbe'pu' 'e' DaSov, 'o joH'a'.
10 tIqwIj qoDDaq toDlIj vISo'be'pu'; vItlIj, toDlIj je vIrIchpu'; yej'a'vo' pung'a'lIj, vItlIj je vISo'be'pu'.
11 SoH'e', 'o joH'a', jIHvo' punglIj Da'otbe'. reH muchoq pung'a'lIj, vItlIj je!
12 muDechpu' ta'mey mIgh; lutoghlaHlu'be'. mujuSpu' yemmeH ta'meywIj 'ej jIleghlaHbe'. ta'meyvam law' nachwIj jIbDu' puS; muluj tIqwIj.
13 'o joH'a', HItoDqangneS! 'o joH'a, choQaHmeH yImoDneS!
14 yInwIj bI'chu'meH tejchugh vay', vaj tuHjaj 'ej mISjaj; QIHwIj tIvchugh vay', vaj HeDmoHlu'jaj 'ej quvHa'jaj.
15 Duqjaj tuHmo' chaH. mujatlh: “toH! toH!”
16 'ach lopjaj nItejbogh Hoch 'ej SoHmo' Quchjaj; toDlIj muSHa'chugh vay', vaj reH jatlhjaj: “Dun joH'a'!”
17 jImIpHa' 'ej jIDo’Ha’, 'ach muqel joH'a'wI'. QaHwI'wI', toDwI'wI' je SoH; yImImneSQo', 'o Qun'a'wI'!

bom 41

1 QoQpInvaD bomvam qun DawID.
Quchqu' pujwI' qelbogh nuv! qaSDI' Seng poH, ghaH toD joH'a.'
2 ghaH Qan 'ej yInmoH joH'a'; puHDaq Quchqu'moHlu'. jaghpu'Daj ghopDu'Daq Danobbe'.
3 rop QongDaqDajDaq ghaH HoSmoH joH'a'. ropDI' DarIHqa'.
4 jIH'e', vIjatlh: “'o joH'a', jIHvaD tlhoqtlhal yIturneS; qa'wIj yIrachneS, qaqaDmeH jIyempu'mo'!”
5 batlhHa' murIch jaghpu'wI' 'ej lujatlh: “ghorgh Hegh ghaH 'ej ngab pongDaj?”
6 muleghmeH ghoSchugh vay', mu'mey chIm jatlh 'ej tIqDajDaq lobHa'ghach boS; mejDI', HurDaq 'oH jatlh.
7 nItebHa' tlhuptaHvIS murIch Hoch muSwI'pu'wI'; QIHwIj lunab.
8 lujatlh: “HeghmoHbogh rop ghaj; QottaH 'ej not Hu'qa'.” 9 vabDot muqaDmeH jupwI' matlh, va'nuchDaj peppu'. 'ach ghaH vIvoqpu' 'ej tIr ngoghwIj Soppu'.
10 'ach SoH'e', 'o joH'a', jIHvaD tlhoqtlhal yIturneS 'ej jInoDmeH HIHu'moH!
11 jIHmo' bIbel 'ej meqvammo' vISov: mucharghbe' jaghwI'.
12 'ach ruvwIjmo' chongaDmoHta' 'ej reH qablIjDaq cholanta'.
13 reH joH'a', yISra'el Qun'a', quvmoHlu'jaj! qaSjaj 'ej qaSjaj.

paq 2

bom 42

1 QoQpInvaD maSqIlvam luqon qo'raH puqloDpu'.
'o Qun'a', DuneHqu' qa'wIj; bIQtIqmey neHqu'bogh Sargh rur.
2 yInbogh Qun'a' 'oj qa'wIj. ghorgh Qun'a' vIghoS?
3 qaStaHvIS pem ram je, SojwIj bIH mIn 'onroSmeywIj'e'. qaStaHvIS jaj Hoch, mujatlh chaH: “nuqDaq ghaH Qun'a'lI''e'?”
4 Dochmeyvam vIqaw, qa'wIj vIlIchDI': qev vItlhejpu'; Qun'a' juH qach wIghoSpu'; beymey Quch DIjachpu' 'ej naDmey DIbompu'; yupma' loppu' ghom'a'.
5 qatlh bI'It, 'o qa'wIj? qatlh qoDwIjDaq bISot? Qun'a' yItul, mutoDbogh Qun'a'wI' vInaDqa'mo'.
6 qoDwIjDaq 'It qa'wIj; meqvammo' yarDen puHvo', Hermon puHvo', mItlh'ar HuDvo' je qaqaw.
7 jach bIQ'a'mey 'ej bIQ notronmeylIj wab vIQoy; mujuS Hoch yu'eghmeylIj.
8 qaStaHvIS pem, pung'a'Daj ra' joH'a'; qaStaHvIS ram, mutlhej bomDaj. muyInmoHbogh Qun'a' vItlhobmeH bomvam vIbom.
9 Qun'a'wI'vaD, naghwIjvaD vIjatlh: “qatlh cholIjpu'? qatlh jISaQtaH muQIHmo' jagh?”
10 muvaq gholpu'wI'; HomDu'wIjDaq bep'a' lurur. qaStaHvIS jaj Hoch, mujatlh: “nuqDaq ghaH Qun'a'lI''e'?”
11 qatlh bI'It, 'o qa'wIj? qatlh qoDwIjDaq bISot? Qun'a' yItul, mutoDbogh Qun'a'wI' vInaDqa'mo'.

bom 43

1 HInoHneS, 'o joH'a', 'ej muqaDbogh nugh quvHa'vo' HIHubneS. loD tojwI'vo' QIHwI'vo' je HItoDneS!
2 lulIghwIj Dabogh Qun'a''e' SoH. qatlh chowoDpu'? qatlh jISaQtaH muQIHmo' jagh?
3 tamghaylIj vItlIj je tIngeHneS; muDevjaj bIH; HuDlIj quvDaq, juHlIjDaq je muqemjaj.
4 'ej muQuchqu'moHbogh Qun'a'vaD 'anmoHmeH raS vIghoS 'ej qanaDmeH HurDagh vIlo', 'o Qun'a', Qun'a'wI'.
5 qatlh bI'It, 'o qa'wIj? qatlh qoDwIjDaq bISot? Qun'a' yItul, mutoDbogh Qun'a'wI' vInaDqa'mo'.

bom 44

1 QoQpInvaD maSqIlvam luqon qo'raH puqloDpu'.
'o Qun'a', Qoypu' teSDu'maj; maHvaD ta'mey Data'ta'bogh rIchpu' vavpu'ma'; qaSDI' jajmeychaj, qaSDI' jajqmey tIQ, ta'meyvam Data'ta':
2 nughmey DaDoHmoHmeH ghoplIj tlhIn Dalo'ta', 'ach vavpu'ma' Dapochta'; ghotpu' DaQIHta', 'ach chaH DatlhabmoHta'.
3 puH luSuqmeH yanchaj tlhIn lulo'be'pu' 'ej chaH toDbe'pu' DeSchaj tlhIn 'ach toDpu' nIHlIj ghop, DeSlIj, qablIj tamghay je, chaH DatIvpu'mo'.
4 ta'wI' SoH, 'o Qun'a'; ya'qovvaD toD yIra'neS!
5 SoHmo' gholpu'ma' DIyuvchu'; ponglIjmo' nuqaDbogh Hoch DIbeQmoH.
6 naQjejHom nuHwIj vIvoqbe' 'ej mutoDbe' yanwIj.
7 'ach gholpu'ma'vo' jutoDta' 'ej muSwI'pu'ma' DatuHmoHta'.
8 Qun'a'mo' mamIytaH 'ej reH ponglIj wItlho'. SelaH
9 'ach juwoDta' 'ej juwebmoHta' 'ej neghmaj Datlhejbe'ta'.
10 ghol wIDoHpu' 'e' DaqaSmoHta'. qengHoD luSuqpu' muSwI'pu'ma'.
11 peqmeH DI'raqmey jururmoHta'; nughmeyDaq jughomHa'moHta'.
12 ghotpu'lI' Dangevta' 'ej ram DIlmeH Huch. DangevmeH Huch vItlh DapoQbe'.
13 nuvaq jIlpu’ma’ ‘e’ DaqaSmoHta’; nutIch nuDechbogh Hoch.
14 maHvaD taHqeqpu’ Da nughmey; nunuS ghotpu’.
15 qaStaHvIS jaj Hoch, quvHa’ghajwIj vbam. jItuH; qablIj vel.
16 qaS wanI’vam, vaqwI’, tIchwI’ je vIQoyDI’ ‘ej jagh, noDwI’ je vIleghDI’.
17 qaSpu’ Hochvam, ‘ach pIlIjQo’ ‘ej mablIj wImaghQo’.
18 DoHbe’pu’ tIqmaj ‘ej HelIjvo’ mamejbe’pu’.
19 ‘ach Deb targhmeyDaq jughorta’ ‘ej nuvel Hegh QIb ‘e’ DaqaSmoHta’.
20 Qun’a’ma’ pong wIlIjpu’chugh, ‘ej Qun novvaD ghopDu’maj DIpeppu’chugh,
21 vaj ghu’vam tu’be’’a’ Qun’a’? tIq peghmey Sov ghaH.
22 ‘ach SoHmo’ qaStaHvIS jaj Hoch, wIHoHlu’; maHvaD peqmeH DI’raqmey luDalu’.
23 yIvemneS! qatlh bIQongtaH, ‘o joH’a’?
24 yIHu’neS! reH ghowoDneSQo'!
25 Say’qISDaq qa’maj ‘eSmoHlu’; yavDaq ngam chormaj.
26 yIHu’neS! ghoQaHneS! pung’a’lIjmo’ ghotoDneS!

bom 45

1 QoQpInvaD maSqIlvam luqon qo'raH puqloDpu’; Su’Sanmey lulo’lu’taHvIS [bomlu’]. bang bom Da.
meq belmoHwI’mo’ ghItchu’ tIqwIj; ta’ lubopbogh ta’mey vIqonpu’; bIH vIjatlh; qonrupbogh qonwI’ ghItlhwI’ rur jatwIj.
2 Human’e’ SoH ‘IH law’ Hoch ‘IH puS. wuSDu’lIjDaq tlhoqtlhal lIchlu’pu’; vaj reH DuquvmoHpu’ Qun’a’.
3 ‘uS nev’oblIjDaq yItuQmoH, ‘o Sub’a’, bI’IHqu’mo’ ‘ej ngay’ Daghajmo’.
4 ngay’lIjmo’ bIchepmeH yIlIgh, vItmo’ nguqHa’ghachmo’ ruvmo’ je; ta’mey qu’ DughojmoHjaj nIHlIj ghop.
5 ta’ jaghpu’ tIqDu’Daq jej naQjejHommeylIj; SoH bIngDaq pum ghotpu’.
6 ‘o Qun’a’, Hochlogh taH quS’a’lIj. ruv naQ’a’ ‘oH wo’lIj naQ’a’.
7 ruv DamuSHa’pu ‘ej mIghwI’ DamuSpu’; meqvammo’ nachlIjDaq lopmeH watrIn lIchpu’ Qun’a’lI’. vInDa’pu’lI’ moch Damojpu’.
8 He’ Hoch SutmeylIj; ‘aDanjI’, vIychorgh por, paSjav je rur. ‘e’levan pu’ yughbogh DuHmormeyvo’ nIQuchmoH HurDaghmey;
9 ta’pu’ puqbe’pu’ yugh chuQun be’pu’lI’. nIHlIj ghopDaq Qam ta’be’; ‘o’vIr veng qol’om tuQ.
10 yIQoy, ‘o puqbe’, ‘ej yIqel, ‘ej teSlIj yItlhe’moH: nughlIj, vavlI’ tuq tIlIj.
11 bI’IHmo’ ta’ chabal SoH. joHlI’ ghaH, vaj ghaHvaD yItor.
12 SoHvaD nobmey qem tlhor veng; tlhoqtlhallIj lunej mIpqu’wI’pu’.
13 pa’DajDaq ngay’ cha’ ta’ puqbe’; qol’om luyugh SutmeyDaj.
14 Sut chum tuQtaHvIS, ta’Daq qemlu’; ghaH ‘emDaq pagh ngaghpu’bogh juppu’Daj’e’ lughoSmoHlu’.
15 ta’ DuHmor lu’eltaHvIS, Quchqu’ chaH.
16 vavpu’lI’ qa’ puqloDpu’lI’; tera’ HochDaq che’wI’pu’ mojmeH chaH DaSugh.
17 Hoch puq poHmeyvaD ponglIj vIqawmoH; meqvammo’ Hochlogh nInaD ghotpu’.

bom 46

1 QoQpInvaD bomvam luqon qo'raH puqloDpu’; ‘ala’mot lulo’lu’taHvIS [bomlu’].
lulIghmaj Hosmaj je ghaH Qun’a’’e’; Seng wIbamDI’ nuQaHmeH SaHqu’.
2 vaj wIghIjlu’be’ QomDI’ puH, ‘ej bIQ’a’Daq pumDI’ HuDmey,
3 ‘ej jachDI’ bIQmeyDaj pubDI’, ‘ej luntaHvIS ‘oH jelDI’ HuDmey. SelaH
4 bIQtIq tu’lu; Qun’a’ veng, jenwI’’a’ juH quv luQuchmoH bIQmeyDaj.
5 vengvetlh qoDDaq ghaH Qun’a’’e’; vIHmoHlu’be’; qaSDI’ jajlo’, ‘oH QaH Qun’a’.
6 Qay’ nughmey ‘ej jel wo’mey; ghoghDaj jatlh ‘ej tet puH.
7 nutlhej mangghom joH’a’; lulIghmaj ghaH ya’qov Qun’a’’e’. SelaH
8 Ha’, joH’a’ ta’mey tIqel; tera’Daq QIHmey ta’pu’.
9 Hoch puH HeHDaq noHmey mevmoH; naQjejHom nuH ghor ‘ej naQjej ghorchu’; Sargh Dujmey meQmeH qul lo’.
10 “pevIHQo’ ‘ej Qun’a’ jIH ‘e’ yISov. SepmeyDaq jIjenqu’; tera’Daq jIjenqu’!” 11 nutlhej mangghom joH’a’; lulIghmaj ghaH ya’qov Qun’a’. SelaH

bom 47

1 QoQpInvaD bomvam luqon qo'raH puqloDpu’.
pe’ev, Hoch ghotpu’! Qun’a’vaD pejach ‘ej bommey Quch yIbom!
2 joH’a’, jenwI’’a’, vuvqu’lu’jaj. tera’ HochDaq ta’ Dun ghaH.
3 maH bIngDaq ghotpu’ charghta’ ‘ej qamDu’maj bIngDaq Sepmey charghta’.
4 maHvaD quHmaj wIvta’. ya’qov le’yo’ muSHa’bogh maH. SelaH
5 jachtaHvIS Sal Qun’a’ ‘ej nItlh gheb SuSlu’DI’ Sal joH’a’.
6 Qun’a’vaD naDmey tIbom! ta’’a’ma’vaD naDmey tIbom! tIbom!
7 tera’ HochDaq ta’’a’ ghaH Qun’a’’e’; naDmey bobommeH maSqIl yIlo’!
8 Sepmey che’ Qun’a’; quS’a’Daj quvDaq ba’.
9 ghom ghotpu’ che’wI’pu’; chaH yugh ‘avraHam Qun’a’ ghotpu’. tera’ yoDmey ghaj Qun’a’. ghaH jenqu’lu’!

bom 48

1 bomvam luqon qo'raH puqloDpu’.
Qun’a’ma’ vengDaq, HuDDaj quvDaq Dun joH’a’ ej naDqu’lu’!
2 ‘IH ‘ej jen veng; Quch tera’ Hoch, tlhI’yon HuD quvmo’; ta’’a’ veng ‘oH.
3 DuHmormeyDajDaq lulIgh Data’ joH’a’ .
4 yIqel: ghom ta’pu’ ‘ej nItebHa’ ghoS.
5 luleghDI’, Duq ‘ej lIm ‘ej Haw’.
6 pa’ jelqu’ ‘ej ‘oy’qu’; boghmoHlI’bogh be’ lurur.
7 tarSIS Dujmey Daghorchu’meH chan SuS Dalo’.
8 mangghom joH’a’ vangDaq wIQoypu’ ‘ej wIleghpu’. Qun’a’ veng ‘oH ‘ej reH ‘oH cher Qun’a’ma’. SelaH
9 chIrghlIjDaq pung’a’lIj wIqelpu’, ‘o Qun’a’.
10 ponglIjmo’, ‘o Qun’a’, tera’ HeHmey SIch naDmeylIj; nIHlIj ghop buy’moH ruv. 11 Quchjaj tlhI’yon HuD! yojmeylIjmo’ lopjaj yeHu’Da puqbe’pu’!
12 tlhI’yonDaq peyIt ‘ej yIbav. chalqachDaj tItogh.
13 Hub reDDaj yIqelqu’; DuHmorDaj tItol, vaj puq poH vebvaD bojatlh:
14 Hochlogh Qun’a’ma’ ghaH Qun’a’vam’e’; reH nuDev.

bom 49

1 QoQpInvaD bomvam luqon qo'raH puqloDpu’.
peQoy, Hoch ghotpu’! teS yInob, tera’ luDabbogh Hoch,
2 potlhwI’, ramwI’, mIpwI’, mIpHa’wI’ je!
3 mu’mey val jatlh nujwIj; yajmeH paQ tIqwIj.
4 vIttlheghDaq teSwIj vItlhe’moH; ngajrun vIpanmeH HurDagh vIlo’.
5 qaStaHvIS Seng jajmey, qatlh vIghIjlu’, muDechDI’ mungorbogh mIghwI’pu’? 6 mIpchaj luvoq ‘ej Huchchaj law’mo’ mIy chaH.
7 latlh je’qa’laHbe’bej vay’ ‘ej Qun’a’vaD voHDajbo’Daj noblaHbe’.
8 wagh qa’Daj voHDajbo’ ‘ej reH yapbe’ DIlmeH Huch.
9 reH yInlaHbe’; reH mol junlaHbe’.
10 vabDot jubbe’ valwI’pu’ ‘e’ legh. Hegh qoH, QIpwI’ je ‘ej latlhpu’vaD mIpchaj lulon.
11 reH juHchaj bIH molchaj’e’; qaStaHvIS Hoch puq poHmey, Daqmey Dabbogh bIH, ‘ach puHmeyvaD pongmeychaj tlhIn pongpu’ chaH.
12 Hem loD, ‘ach taHbe’ ghaH. Hegh; Ha’DIbaHmey rur.
13 qoHpu’ He ‘oH; mu’meychaj naDbogh ghotpu’ He ‘oH je. SelaH
14 Se’ol ‘oH Sanchaj’e’; DI’raqmey rur. QorghwI’chaj ‘oH Hegh. chaH che’ tIgh QaQ pabwI’pu’ qaSDI’ po. Se’olDaq ragh tu’qomchaj, HoptaHvIS juHchaj.
15 ‘ach Se’ol HoSvo’ qa’wIj toD Qun’a’, muHevmo’. SelaH
16 mIpchoHDI’ loD, DaghIjlu’jaj, ghurDI’ tuqDaj ngay’.
17 HeghDI’, pagh qem loDvetlh; tlhejmeH ghIrbe’ ngay’Daj.
18 yIntaHvIS, quvmoHlu’ ‘e’ Dam ‘ej DanaDlu’ bIchepDI’;
19 ‘ach ‘emrIghpu’Daj He ghoS qa’Daj. 20 Hem loD ‘ach yajbe’; Heghbogh Ha’DIbaHmey rur.

bom 50

1 bomvam qon ‘aSav.
jatlh Qunpu’ Qun’a’, joH’a’, ‘ej jajlo’ chum tlhom chum qubbID tera’ rIt.
2 ‘IHchu’bogh tlhI’yon HuDvo’ boch Qun’a’.
3 ghoS Qun’a’ma’; tamtaHbe’. ghaH tlhopDaq natlhbogh qul tu’lu’; jevqu’ Dechbogh muD.
4 ghotpu’Daj noHmeH chal puH je rIt:
5 “jIHDaq matlhwI’pu’wI’ tIghommoH; jIHvaD mab luchenmoHmeH ‘anmoHpu’ chaH!”
6 ruvDaj lumaq chalmey, noHwI’ ghaHmo’ Qun’a’’e’! SelaH
7 “peQoy, ‘o ghotpu’wI’, ‘ej jIjatlh. ‘o yISra’el, SaqaDmeH jInguH. Qun’a’ jIH, Qun’a’ra’.
8 Su’angmoHmo’ Saqunbe’; reH jIH tlhopDaq bIHtaH nobmeyraj’e’ lumeQlu’bogh.
9 juH qachrajvo’ tanqqa’mey vIlajQo’; yotlhrajvo’ gha’chermey vIlajQo’.
10 ngemDaq Hoch Ha’DIbaH vIghaj; wa’SaD HuDDaq tangqa’mey vIghaj.
11 HuDmeyDaq Hoch bo’Deghmey vISov ‘ej yotlhDaq vIHbogh Hoch Depmey vIghaj.
12 “jIghung net jalchugh, vaj Saja’Qo’, qo’, Hoch ngaSbogh je vIghajmo’.
13 tangqa’ ‘oynot vISop’a’? gha’cher ‘Iw vItlhutlh’a’?
14 Qun’a’vaD Su’anmoHmeH, tlho’ nobmey tInob; jenwI’’a’vaD ‘Ipraj tIpab;
15 qaSDI’ Seng jaj, HIrIt; vaj SatoD ‘ej jIHvaD ngay’ bonob.”
16 ‘ach jIvvo’vaD jatlh Qun’a’: “chutmeywIj DajatlhmeH, DIblIj yIngu’! wuSDu’lIjDaq mabwIj DalanmeH, DIblIj yIngu’!
17 Sun DamuS; SoH ‘emDaq mu’meywIj DawoD.
18 nIHwI’ Daleghchugh, ghaHmo’ Dabel; matlhHa’wI’pu’ Datlhej.
19 mIghmeH nujlIj DajonHa’ ‘ej nepmeH nab jatlIj.
20 bIba’ ‘ej loDnI’lI’ DaQIH bIjatlhDI’; SoSlI’ puqloD DarIchDI’ bInep.
21 ta’meyvam Data’pu’ ‘ej jItampu’; qarur ‘e’ DaQubpu’. ‘ach DaH qaqun ’ej qapum.
22 “mu’meyvam boqawbe’, ‘o Qun’a’ lIjwI’pu’, vaj Saghorchu’ ‘ej lItoD pagh.
23 mutlho’meH naD munobchugh vay’, ngay’ munob; tIghwIj pabchugh vay’, vaj vay’vetlhvaD Qun’a’ toD vI’ang.

bom 51

1 QoQpInvaD bomvam qon DawID, ghaH ghoSDI’ natan ‘aqwI’’a’, batSeba’ ‘elpu’DI’.
jIHvaD tlhoqtlhal yIturneS, ‘o Qun’a’, pung’a’lIjmo’; punglIj vItlhmo’ ta’meywIj mIgh yInge’neS.
2 jIwoghpu’mo’ HIwatlhmoHneS; jIyempu’mo’ HISay’moHneS.
3 jIwoghpu’ ‘e’ vISov ‘ej jIyempu’ reH ‘e’ vItu’.
4 SoH neH qaqaDpu’ jIyemDI’; mIgh ta’wIj ‘e’ Dalegh. vaj bIjatlhDI’ bIlugh net tu’ ‘ej bInoHDI’ DapIchlaHbe’lu’.
5 yIqelneS: jIboghpu’DI’ jImIgh ‘ej muyInmoHpu’DI’ SoSwI’ jIyem.
6 yIqelneS, qa’ qoDDaq vIt tu’lu’DI’ Dabel; tIq peghDaq jIvalmeH choghojmoH. 7 choyemHa’moHmeH chertIS SeQ yIlo’neS vaj jISay’; HISay’moHneS vaj jIH chIS law’ peDbogh muD chIS puS.
8 HIQuchmoHneS ‘ej HItIvmoHneS. lopjaj HomDu’ Daghorpu’bogh.
9 Hochlogh jIyemDI’ qablIj yISo’neS; Hoch ta’meywIj mIgh yInge’neS.
10 jIHvaD tIq Say’ yIchenmoHneS, ‘o Qun’a’, ‘ej jIHvaD qa’ matlh yIrIHqa’neS.
11 qablIjvo’ HIwoDneSQo'; jIHvo’ qa’’a’lI’ quv yInge’neSQo'.
12 QuchmoHbogh toDlIj HInobHa’neS ‘ej Dulobqangbogh qa’ HInobneS.
13 vaj woghwI’pu’vaD tIghlIj vIghojmoH ‘ej nIchegh yemwI’pu’.
14 muDIvmoHbogh ‘Iwvo’ HItoD, ‘o Qun’a’, ‘o toDwIj Qun’a’, ‘ej bomtaHvIS jatwIj, ruvlIj rIch.
15 ‘o joH’a’, wuSlIj tIpoSmoHneS, vaj naDlIj maq nujlIj.
16 ‘anmoHlu’mo’ DaneHbe’, ‘ach vInobqang; meQmeH nobmo’ bIbelbe’.
17 Qun’a’vaD ‘anmoHDI’ vay’, qa’ ghorlu’pu’bogh ghajnIS. tIq QoS ghorlu’bogh, ‘o Qun’a’, DamuSbe’.
18 tlhI’yon HuDvaD yIQaQneS bIbelDI’: yeru'Sala'yIm veng reDmey tImutlhneS.
19 ngugh batlh ‘anmoHlu’DI’ bIbel, meQmeH nobmeymo’, meQchu’meH nobmeymo’ je; ngugh ‘anmoHmeH raSlIjDaq tangqa’mey lunoblu’.

bom 52

1 QoQpInvaD maSqIlvam DawID ghoSDI’ Do’egh ‘eDomngan ‘ej Sa’ulvaD jatlhDI’: “‘aHI’meleq juH qach ghoSpu’ DawID.”
qatlh bImIgh ‘e’ DamIy, ‘o Sub’a’? qaStaHvIS yom Hoch taH Qun’a’ pung’a’.
2 QIH nam jatlIj; rol taj jej rur, ‘o nepwI’.
3 ta’mey mIgh qaq law’ ta’mey QaQ qaq puS ‘e’ DaDam. bInep ‘e’ DamaS; ruv Dajatlh ‘e’ DamaSbe’. SelaH
4 Hoch mu’mey jochqu’ DamuSHa’, ‘o jat tojwI’.
5 ‘ach reH DuQaw’ Qun’a’; Dujon ‘ej jo’ley’lIjvo’ Dunge’; yInwI’pu’ puHvo’ DuluH. SelaH
6 legh quvwI’pu’ ‘ej vuv. ghaHmo’ Hach chaH ‘ej jatlh:
7 “loDvam yIlegh; Qun’a’vaD lulIghDaj Dambe’ ‘ach mIpDaj law’ voqpu’ ‘ej HoS’eghmoHmeH QIHpu’.
8 ‘ach jIH’e’, Qun’a’ juH qachDaq Sor SuD vIrur. Hochlogh Qun’a’ pung’a’ vIvoq.
9 reH qatlho’, ‘oH Data’ta’mo’. ponglIj vIloS, QaQmo’, lutu’taHvIS quvwI’pu’.

bom 53

1 QoQpInvaD masqIlvam qon DawID; ma’Halat lo’lu’taHvIS [bomlu’].
jatlh qoH tIq: “Qun’a’ tu’lu’be’.” qal chaH; ta’mey mIgh muSqu’lu’bogh DIgh; ta’mey QaQ DIghbogh pagh’e’ tu’lu’.
2 chal’a’vo’ Humanpu’ bej Qun’a’. yajbogh, Qun'a' nejbogh je vay' tu'lu' 'e' legh neH ghaH. 3 Haw' Hoch; nItebHa' qalchoHpu'. ta' QaQ ta'bogh vay' tu'lu'be'. ghobe', pagh.
4 Sovbe''a' Hoch mIghwI'pu'? ghotpu'wI' Sop; tIr ngogh lurur ghotpu'wI' 'ej joH'a' lurItbe'.
5 pa' Hajqu' chaH, ‘ach pa’ HajmoHwI’ tu’lu’be’! jaghpu’lI’ HomDu’ ghomHa’ Qun’a’; chaH DatuHmoH, chaH lajQo’pu’mo’ Qun’a’.
6 tlhI'yon HuDvo' ghoSjaj yISra'el toD! ghotpu'Daj cheghmoHDI' joH'a', lopjaj ya'qov, Quchjaj yISra'el.

bom 54

1 QoQpInvaD maSqIlvam qon DawID, Sa’ul lughoSDI’ tlhI’vIynganpu’ ‘ej lujatlhDI: “maH jojDaq So’be’’a’ DawID?” HurDaghmey lulo’lu’taHvIS [bomlu’].
‘o Qun’a’, ponglIjmo’ HItoDneS; HoSlIjmo’ HIDIvHa’moHneS.
2 ‘o Qun’a’ HIQoyneS qatlhobDI’; nujwIj mu’meyvaD teSlIj yItlhe’moHneS.
3 muqaDmeH Hu’pu’ HujwI’pu’; yInwIj lutlhap ‘e’ lunID wIHwI’pu’; Qun’a’ luSaHbe’. SelaH
4 yIqel: QaHwI’wI’ ghaH Qun’a’’e’; yInwIj taHmoH joH’a’.
5 jaghpu’wI’ QIH tatlh; batlhlIjmo’ tISangneS.
6 SoHvaD jI’anmoHmeH nob poQbe’lu’bogh vInob. ponglIj vItlho’, ‘o joH’a’, QaQmo’.
7 Hoch Sengvo’ mutoDta’ ‘ej jaghpu’wI’ lucharghlu’ ‘e’ legh mInlIj.

bom 55

1 QoQpInvaD maSqIlvam qon DawID. HurDaghmey lulo’lu’taHvIS [bomlu’].
qaqoy’DI’ teSlIj yInobneS, ‘o Qun’a’, ‘ej pung vItlhobDI’ yISo’’eghneSQo'.
2 HIqImneS ‘ej HIjangneS; jIleSlaHbe’ jIbepDI’ ‘ej jIghugh
3 jagh wabmo’, jIvvo’ QIHmo’ je. Seng muqem ‘ej muqeHmo’ mumuS.
4 jIH qoDDaq ‘oy’qu’ tIqwIj; muHajmoHpu’ Hegh.
5 vIghIjchoHlu’pu’ ‘ej jIjelchoHpu’ ‘ej munatlh Hajqu’ghach.
6 vIjatlh: “roj bo’Degh telDu’ vIghaj ‘e’ vIjIn! jIpuvlaH ‘ej jIleSlaH ‘e’ vIjIn;
7 HISlaH, chuq’a’Daq jIlenglaH ‘ej Deb vIDablaH ‘e’ vIjIn; SelaH
8 jImoDlaH ‘ej jevbogh SuSvo’ jInarghlaH ‘e’ vIjIn.”
9 tIQaw’neS, ‘o joH’a’, ‘ej jatDu’chaj tIwavneS; vengDaq rallu’ ‘ej ghoHlu’ ‘e’vIlegh.
10 qaStaHvIS pem, ram je reDmeyDaj bav; ‘oH qoDDaq mIghlu’ ‘ej Senglu’.
11 ‘oH qoDDaq lot tu’lu’; ngevmeH yaHDaq QIHlu’taH ‘ej tojlu’taH.
12 jagh ghaHbe’ muvaqbogh ghot’e’; jagh vIcherghlaH. ghol ghaHbe’ mutIchbogh ghot’e’; gholvo’ jISo’’eghlaH.
13 ‘ach ghaH SoH’e’. loD, qochwI’, vInDa’wI’, jup’a’wI’ je SoH.
14 nItebHa’ naHHa’ghach wItIvpu’; Qun’a’ juH qach mayIttaHvIS matlhejchuqpu’.
15 chaH jonjaj Hegh; Se’ol lughoSjaj yIntaHvIS; juHchajDaq, tIqchajDaq je mIgh chaH.
16 ‘ach Qun’a’ vIrIt ‘ej mutoD joH’a’.
17 qaStaHvIS tlhom, po, DungluQ je jIbep ‘ej jIghugh ‘ej ghoghwIj Qoy.
18 jIghobDI’ qa’wIj toD ‘ej Qan, muqaDmo’ ghotpu’ law’.
19 ‘Ij Qun’a’ ‘ej chaH nguqHa’moH—ben law’ DaH qubbID quS’a’ ba’—SelaH
choHbe’mo’ ‘ej Qun’a’ luvuvbe’mo’.
20 vInDa’wI’’e’, juppu’Daj maghmeH ghopDaj pep; mabDaj bIv.
21 Hab QIchDaj; nIm tlhagh rur, ‘ach tIqDajDaq Qoj. mu’meyDaj tun law’ watrIn tun puS, ‘ach yanmey luQIqlu’bogh rur.
23 joH’a’vaD ‘ughwI’lIj Danobchugh, vaj DutaHmoH; quvwI’pu’ luvIHmoHlu’ not ‘e’ chaw’.
24 ‘ach SoH’e’, ‘o Qun’a’, QIH QemjIqDaq chaH DajaD. jajmeychaj bID luSIQbe’ ‘Iw lu’ojbogh tojwI’pu’’e’. ‘ach qavoq jIH.

bom 56

1 QoQpInvaD mIqtamvam qon DawID, ghatDaq lujonDI’ velIStIynganpu’; yonat-’e’lem-reHo’qIm lo’lu’taHvIS [bomlu’].
jIHvaD tlhoqtlhal yIturneS, ‘o Qun’a’, mugho’taHmo’ loD; qaStaHvIS jaj Hoch, muQIH SuvwI’.
2 qaStaHvIS jaj Hoch, mugho’taH jaghpu’wI’ ‘ej muHIvDI’ nguq.
3 vIghIjlu’DI’ qavoq.
4 Qun’a’ mu’ vInaD; Qun’a’ vIvoq; vIghIjlu’be’; muqaDmeH nuq ta’laH jubbe’wI’?
5 qaStaHvIS jaj Hoch, mu’meywIj qalmoH; mIghmeH muqaD Hoch buSHachmeychaj.
6 ghom ‘ej ghach ‘ej jIyIttaHvIS mubej ‘ej muHoHmeH loS.
7 HeSchajmo’ nargh’a’? bIQeHDI’ ghotpu’ tIjaDneS, ‘o Qun’a’!
8 lengmeywIj Datoghpu’; balDaq mIn ‘onroSmeywIj Dalanpu’; paqlIjDaq bIHbe’’a’?
9 ghIq HeD jaghpu’wIj qarItDI’. vISov: jIHvaD vang Qun’a’.
10 Qun’a’ mu’ vInaD; joH’a’ mu’ vInaD.
11 Qun’a’ vIvoq; vIghIjlu’be’; muqaDmeH nuq ta’laH loD?
12 SoHvaD ‘IpmeywIj vIpabnIS, ‘o Qun’a’; SoHvaD tlho’meH nobmey vInob.
13 Heghvo’ qa’wIj DatoDta’; HISlaH, pum qamDu’wIj ‘e’ Dabotta’. vaj jIyIt tu’taHvIS Qun’a’; yInmoHbogh tamghaylIjDaq jIyIt.

bom 57

1 QoQpInvaD mIqtamvam qon DawID, DISDaq Sa’ulvo’ Haw’DI’; ‘al taSHet lo’lu’taHvIS [bomlu’].
jIHvaD tlhoqtlhal yIturneS, ‘o Qun’a’, tlhoqtlhal yIturneS; SoHvaD lulIgh Dam qa’wIj; telDu’lIj QIb jISo’’egh ‘ej SIbI’Ha’ mev lotmey.
2 Qun’a’ jenwI’’a’ vIrIt; jIHvaD ngoQDaj ta’ Qun’a’.
3 chal’a’vo’ ngeH ‘ej mutoD; mugho’taHbogh ghot tuHmoH. SelaH
pung’a’Daj, vIt je ngeH Qun’a’.
4 muDech vIghro’’a’mey; Ha’DIbaHmey qu’ jojDaq jIQop; Humanpu’ chaH ‘ej naQjej, naQjejHom je rur Ho’Du’chaj ‘ej yanmey jej rur jatDu’chaj.
5 chal DungDaq Dapepqu’lu’jaj, ‘o Qun’a’! tera’ Hoch veljaj ngay’lIj!
6 muvonmeH SIr’o’ lulanta’ jIyIttaHvIS; qa’wIj ‘eSmoHlu’pu’. HewIjDaq QemjIq lughawta’ ‘ach ‘oHDaq pumpu’ chaH. SelaH
7 matlh tIqwIj, ‘o Qun’a’, matlh tIqwIj! jIbom ‘ej ‘IngSav vIjatlh!
8 yIvem, ngay’wIj! pevem, HurDagh, tIngDagh je! jajlo’ vIvemmoH!
9 ghotpu’ jojDaq qatlho’, ‘o joH’a’; Sepmey jojDaq SoHvaD naDmey vIbom.
10 Dun pung’a’lIj; chal SIch. ‘engmey SIch vItlIj.
11 chal DungDaq Dapepqu’lu’jaj, ‘o Qun’a’! tera’ Hoch veljaj ngay’lIj!

bom 58

1 QoQpInvaD mIqtamvam qon DawID; ‘al taSHet lo’lu’taHvIS [bomlu’].
ruv bowuvbej’a’, ‘o Qunpu’? batlh Humanpu’ bonoH’a’?
2 ghobe’, tIqDu’rajDaq ta’mey mIgh bonab; tera’Daq ta’mey ral boDIgh.
3 chI’IDDaq jIvvo’pu’ luHujmoHlu’; boghDI’ lotlh ‘ej nep.
4 Ho’ tar lughaj; wam rur. QoylaHbe’bogh ‘ej teSDaj SoQmoHbogh ghargh’e’ rur. 5 vongwI’pu’ ghogh Qoybe’; ghargh SeHwI’ val Qoybe’.
6 ‘o Qun’a’, nujchajDaq Ho’ tIghorneS; vIghro’’a’mey Qup ghapqa’ tIwItlhneS, ‘o joH’a’.
7 ngabjaj; ghItbogh bIQ lururjaj. naQjejHomDaj QeqDI’ jejHa’choHjaj.
8 HuH mojbogh tera’ nagh DIr charwI’’e’ lururjaj. not jul leghbogh ‘ej boghHa’pu’bogh puq lururjaj.
9 pe’vIl chaH bI’; tugh meQbogh ‘unmey SuD, ‘unmey QaD je rur.
10 bortaS leghDI’ quvwI’, Quchqu’; qamDaj Say’moHmeH, jIvvo’ ‘Iw lo’.
11 jatlh Human: “quvwI’vaD pop tu’lu’bej; tera’Daq noHbogh Qun’a’ tu’lu’bej.”
bom 59

1 QoQpInvaD mIqtamvam qon DawID, ghaH luHoHmeH ‘ej juHDaj lubejmeH loDpu’ ngeHDI’ Sa’ul; ‘al taSHet lo’lu’taHvIS [bomlu’].
jaghpu’wI’vo’ HItoDneS, ‘o Qun’a’wI’; muqaDmeH Hu’wI’pu’vo’ HIQanneS.
2 ta’mey mIgh DIghbogh ghotpu’vo’ HIlupneS ‘ej ‘Iw lu’ojbogh loDpu’vo’ HItoDneS.
3 yIqelneS: muHoHmeH ghach; muqaDmeH ghom loDpu’ HoS, ‘ach jIyempu’mo’be’ ‘ej jIwoghpu’mo’be’, ‘o joHo’a’.
4 pIch vIghajbe’ ‘ach qet ‘ej ghuHchoH. yIvemneS, Ha’ HIHomneS, yIleghnes!
5 yISra’el Qun’a’, mangghom joH’a’ Qun’a’ SoH. Hoch nughmey DabIjmeH yIvemneS. woghwI’pu’ mIghvaD pung yInobneSQo'. SelaH
6 qaSDI’ Hoch ram chegh; ghughbogh targhmey rur ‘ej vengDaq ghachtaH.
7 yIqelneS: ruqmeH nujDu’chaj lo’ ‘ej wuSDu’chajDaq bIHtaH yanmey’e’— “nuQoy ‘Iv?” [‘e’ luQub].
8 ‘ach chaHmo’ bIHagh SoH, ‘o joH’a’; Hoch nughmey Davaq.
9 ‘o HoSwI’, qanejmeH jIbej, lulIghwIj SoHmo’, ‘o Qun’a’.
10 mughom tlhoqtlhal turbogh Qun’a’wI’’e’; jaghpu’wI’ lucharghlu’ ‘e’ vIlegh ‘e’ chaw’ Qun’a’.
11 tIHoHneSQo', vaj lIjbe’ ghotpu’wI’; HoSlIjmo’ tIghomHa’neS ‘ej tIDejmoHneS, ‘o joH’a’, yoDmaj!
12 yemmeH nuj lulo’mo’, wuSDu’chaj mu’meymo’, luvonlu’jaj nguqtaHvIS. mu’qaDmey jatlhmo’ ‘ej nepmo’,
13 tInatlhneS bIQeHtaHvIS; tInatlhneS ‘ej SIbI’Ha’ tu’lu’be’; vaj tera’ HochDaq ya’qov che’ Qun’a’ ‘e’ luSov. SelaH
14 qaSDI’ Hoch ram chegh; ghughbogh targhmey rur ‘ej vengDaq ghachtaH.
15 Soj lunejmeH qor ‘ej yonbe’chugh, vaj ghughugh.
16 ‘ach HoSlIjmo’ jIbom; qaSDI’ po, pung’a’lIjmo’ jIbomqu’. jIHvaD jem’IH DaDapu’ ‘ej qaSDI’ Seng jaj lulIgh DaDapu’.
17 ‘o HoSwI’, SoHvaD naDmey vIbom, lulIghwIj SoHmo’, ‘o Qun’a’. pung’a’ mu‘angbogh Qun’a’’e’ SoH.

bom 60

1 QoQpInvaD mIqtamvam qon DawID, ‘aram naHa’ra’yIm, ‘aram tlhobaH je SuvDI’ ‘ej qut na’ ngechDaq wa’netlh cha’SaD ‘eDomngan HoHDI’ yo’av cheghtaHvIS. ghojmoHmeH SuSan ‘eDut lo’lu’taHvIS [bomlu’].
‘o Qun’a’, julajQo’pu’ ‘ej Hubmeymaj Daghorpu’ ‘ej bIQeHpu’; DaH ghorIHqa’neS.
2 puH DaQommoHpu’; poSmeH DavIrgh; qungDaj tItI’neS, jelmo’.
3 letwI’mey juleghmoHpu’; matangmeH HIq jutlhutlhmoHpu’.
4 vuvwI’lI’vaD joqwI’ Dacherpu’, vaj ‘oHDaq naQjejHomvo’ Haw’. SelaH
5 bangpu’lI’ lutoDlu’meH nIHlIj ghop yIlo’neS ‘ej ghojangneS!
6 quvmo’ jatlhpu’ Qun’a’: “jIlop; Seqem vIwav ‘ej Suqqot ngech vIlochmoH.
7 jIHvaD ‘oH ghIl’aD’e’; jIHvaD ‘oH menaSSeH’e’; mIvwIj ‘oH ‘evra’yIm’e’; naQ’a’ ‘oH yeHu’Da’e’.
8 DoQmIvwIj ‘oH mo’av’e’; waqwIj vIlanmeH ‘eDom vIlo’; velIStIy vIcharghtaHvIS jIjach.
9 veng HoSDaq muqem ‘Iv? ‘eDomDaq muDev ‘Iv?
10 julajQo’pu’, ‘o Qun’a’, qar’a’? Mangghommaj Datlhejbe’, ‘o Qun’a’.
11 ghol wIqaDmeH ghoQaH, qeymo’ loD toD!
12 Qun’a’mo’ maSub; gholpu’ma’ gho’chu’ ghaH.

bom 61

1 QoQpInvaD bomvam qon DawID; HurDagh lulo’lu’taHvIS [bomlu’]. jIjachDI’ yIQoyneS, ‘o Qun’a’; jItlhobDI’ yI’IjneS.
2 tera’ HuHvo’ vIrIt, pujDI’ tIqwIj. naghDaq HIDevneS; ‘oH jen law’ jIH jen puS.
3 lulIghwIj DaDapu’; jagh qaDmeH chalqach HoS DaDapu’.
4 Hochlogh jo’ley’lIj HIDabmoHneS! telDu’lIj QIb bIngDaq HISo’neS! SelaH
5 ‘IpmeywIj DaQoypu’, ‘o Qun’a’; ponglIj vuvwI’pu’ quH HInobpu’.
6 ta’ yIn yInI’moHneS; qaStaHvIS Hoch puq poHmey, taHjaj DISmeyDaj!
7 reH quS’a’Daq ba’jaj tu’taHvIS Qun’a’; lu‘avjaj pung’a’lIj, vItlIj je!
8 reH ponglIjvaD naDmey vIbom; qaSDI’ Hoch jaj, ‘IpmeywIj vIpab.

bom 62

1 QoQpInvaD bomvam qon DawID; yeDu’tun lo’lu’taHvIS [bomlu’]. Qun’a’ neH loS qa’wIj tamtaHvIS; ghaHvo’ ghoS toDwIj.
2 naghwIj, toDwIj, lulIghwIj neH je ghaH; jIjelqu’be’.
3 qaStaHvIS puH ‘ar loD boHIv, muchotrupbogh Hoch? lavbogh tlhoy’, jelbogh reD je vIrur.
4 DaqwIj jenvo’ mupummoHmeH nab; nep ‘e’v lutIv. quvmoH nujchaj ‘ach mu’qaD buS. SelaH
5 Qun’a’ neH, ‘o qa’wIj, yIloS; ghaHmo’ jItul.
6 naghwIj, toDwIj, lulIghwIj neH je ghaH; jIjelbe’.
7 Qun’a’ luwuv toDwIj, ngay’wIj je; Qun’a’ ‘oH naghwIj HoS’e’, lulIghwIj’e’.
8 Hochlogh yIvoq, ‘o ghotpu’; ghaHvaD tIqraj yIlIch; maHvaD lulIgh ghaH Qun’a’’e’. SelaH
9 vI’laSHom neH chaH patlhwI’pu’ vItlhHa’’e’; mu’ nepwI’ ghaH patlhwI’pu’ vItlh’e’. juvmeH janDaq lulanlu’chugh, vaj nItebHa’ chaH tIS law’ tlhuH tIS puS.
10 SunIHchugh ‘ej SuHejchugh, vaj ta’meyvam yIvoqQo’ ‘ej peqey’eghmoHQo’; ghurchugh mIp, vaj chabal’a’raj yIDamQo’.
11 wa’logh jatlhpu’ Qun’a’; cha’logh vIttlheghvam vIQoypu’: HoS ghaj Qun’a’,
12 pung’a’ Daghaj, ‘o joH’a’. ta’meyDajmo’ loDvaD popDaj mIt Danob.

bom 63

1 bomvam qon DawID, yeHu’Da DebDaq ghaHDI’.
‘o Qun’a’, Qun’a’wI’ SoH; pe’vIl qanej. SoHmo’ ‘oj qa’wIj; SoHmo’ vulchoH qa’wIj; Doy’bogh ‘ej bIQ Hutlhbogh puH QaD’e’ rur.
2 vaj Daq quvDaq qabejpu’, HoSlIj, ngay’lIj je vIleghtaHvIS.
3 pung’a’lIj qaq law’ yIn qaq puS, vaj nInaD wuSDu’wIj.
4 vaj jIyIntaHvIS qaquvmoH; ponglIjmo’ ghopDu’wIj vIpep.
5 yon qa’wIj; ‘eybogh Soj pI’ rur ghu’vam; DunaDmeH nujwIj, wuSDu’ Quchqu’ vIlo’,
6 QongDaqwIjDaq qaqawDI’ ‘ej qapaQDI’ qaStaHvIS ram Qu’ poH.
7 choQaHpu’; telDu’lIj QIbDaq jIbom ‘ej jIQuch.
8 Du’uch qa’wIj; mutaHmoH nIHlIj ghop.
9 ‘ach wutlh jaQ lughIr yInwIj luQaw’rupbogh ghotpu’’e’.
10 chaH jeymeH yan HoS lo’lu’. Deb targh Soj lumoj.
11 ‘ach Qun’a’mo’ lop ta’; Quchqu’ ‘Ip pabwI’pu’Daj, nepwI’pu’ lutammoHlu’mo’.

bom 64

1 QoQpInvaD bomvam qon DawID.
ghoghwIj yIQoyneS, ‘o Qun’a’, jIbemDI’; HajmoHbogh jaghvo’ yInwIj yIQanneS.
2 jIvvo’pu’ nabmey peghvo’, mIghwI’pu’ ghom’a’vo’ HISo’neS;
3 jatDu’chaj jejmoH; yan rur. mu’mey wIb Qeq; naQjejHom rur.
4 pIch ghajbe’bogh ghotDaq baHmeH ghach; SIbI’ lubaH ‘ej lughIjlu’be’.
5 mIghmeH tungHa’egh; vonmeH janmey pegh nab ‘ej lujatlh: “bIH legh ‘Iv?”
6 QIHmey nej ‘ej lujatlh: “pe’vIl manejta’,” ‘ongmo’ loD yab, tIq je.
7 ‘ach chaHDaq naQjejHom baH Qun’a’; SIbI’ rIQ.
8 luQaw’lu’ ‘ej magh jatDu’chaj tlhIn; nachDu’chaj tav leghbogh Hoch.
9 ngugh vuvqu’ Hoch loD; Qun’a’ ta’mey rIch ‘ej paQ.
10 joH’a’mo’ Quchqu’jaj quvwI’ ‘ej ghaHvaD lulIgh Damjaj! lopjaj Hoch tIgh QaQ pabwI’ tIq!

bom 65

1 QoQpInvaD bomvam qon DawID.
tlhI'yon HuDDaq DuloS naD, ‘o Qun’a’, ‘ej SoHvaD ‘Ipmey lupablu’.
2 bIQoy tlhoblu’DI’; nIghoS Hoch jubbe’pu’.
3 mucharghDI’ ta’mey mIgh ‘ej mawoghDI’ juDIvHa’moH.
4 ghot DawIvchugh ‘ej DaqlIj DabmeH DaghoSmoHchugh, vaj Quchqu’ ghotvetlh! QaQmo’ juH qachlIj ‘ej quvmo’ chIrghlIj mayon.
5 bIquvmo’ jujangmeH ta’mey Dun Dalo’, ‘o toDmaj Qun’a’; puH HeHmey, bIQ’a’mey Hopqu’ je chabal’a’ SoH.
6 HoSlIjmo’ HuDmey Dacherpu’; woQ DatuQ;
7 jachbogh bIQ’a’mey, yu’eghmey bey, ghotpu’ wab je DatammoH;
8 vaj boqHarmeylIjmo’ Duq Hoch tera’ HeHmey DabwI’pu’. qaStaHvIS po tlhom je qubbID, bommey Quch lubomlu’ ‘e’ DaqaSmoH.
9 tera’ DaSuch ‘ej DatlhutlhmoH ‘ej DamIpmoH; Qun’a’ bIQtIq buy’moH bIQ; chaHvaD tIr Danob Dacherpu’mo’.
10 taSmanmeyDaj DaHaH ‘ej puH Su’nImmeyDaj DaHabmoH; DatunmoHmeH bIQ Daghay ‘ej nenDaj DatungHa’.
11 DIS DaQaQmoH; mIv’a’ rur. vabDot tlhaghmo’ ghIt tawmey.
12 ghIt Debmey ‘ej Hoch lurghDaq Quchqu’ HuDmey.
13 DI’raqmey tuQ’eghmoH yotlhmey ‘ej ngechmey vel tIr; Quchqu’mo’ jach ‘ej bom.

bom 66

1 QoqpInvaD ‘oH bomvam’e’.
Qun’a’vaD pejach ‘ej peQuchqu’, tera’ Hoch; 2 pongDaj quvvaD pebom; quvmoHmeH yInaD!
3 Qun’a’vaD yIjatlh: “Dunqu’ ta’meylIj! qu’ HoSlIj vaj SoHmo’ jel jaghpu’lI’.
4 SoHvaD tor tera’ Hoch ‘ej DunaDmeH bom; ponglIj lunaDmeH bom.” SelaH
5 Ha’ Qun’a’ ta’mey tIlegh: Humanpu’vaD Dunqu’ ta’meyDaj.
6 puH QaD moj bIQ’a’ ‘e’ qaSmoH ghaH; bIQtIq lutolmeH qamDu’chaj lo’. pa’ ghaHmo’ maQuchqu’;
7 reH che’ HoSDajmo’ ‘ej nughmey bej mInDu’Daj. nguqbe’jaj lotlhwI’pu’. SelaH
8 Qun’a’ma’ yIquvmoH, ‘o ghotpu’; naDDaj wab Qoylu’jaj.
9 qa’maj yInmoHtaH ‘ej tang qammaj ‘e’ bot.
10 ‘o Qun’a’, junoHta’. juchovta’; SIrlIy wIrur.
11 vonmeH SIr’o’Daq juqemta’; DubDu’majDaq tapbogh ‘ughwI’ Dalanta’.
12 nachmajDaq lIgh loDpu’ ‘e’ Dachaw’; qul, bIQ je wItolpu’ ‘ach Daq mIpqu’Daq julupta’.
13 juH qachlIj vI’elDI’ meQmeH nobmey vIqem; SoHvaD ‘IpmeywIj vIpab.
14 jISotDI’ mu’ jatlhpu’ wuSwIj ‘ej ‘Ip jatlhpu’ nujwIj; DaH vIpab.
15 SoHvaD Ha’DIbaH tlhagh meQmeH nob, DI’raq loD ‘anmoHmeH tlhIch je vInob. tangqa’mey, gha’chermey je vI’anmoH. SelaH
16 Ha’ peQoy, ‘o Qun’a’ vuvwI’pu’, ‘ej qa’wIjvaD ta’meyDaj vIrIch.
17 ghaHvaD jIjachmeH nujwIj vIlo’pu’ ‘ej vInaDqu’meH jatwIj vIlo’pu’.
18 tIqwIjDaq ta’ mIgh vIQej net jalchugh, vaj ‘IjQo’ joH’a’.
19 ‘ach ‘Ijbejpu’ Qun’a’; vItlhobDI’ ghoghwIj Qoypu’.
20 Qun’a’ quvmoHlu’jaj, mulajpu’mo’ vItlhobDI’ ‘ej jIHvo’ pung’a’Daj teqbe’pu’!

bom 67

1 QoQpInvaD ‘oH bomvam’e’; HurDagh luto’lu’taHvIS [bomlu’].
2 maHvaD tlhoqtlhal turjaj Qun’a’ ‘ej nuquvmoHjaj ‘ej maHDaq qabDaj bochmoHjaj, SelaH
3 vaj tera’Daq tIghlIj Sovlu’ ‘ej nughmeyDaq toDmeH HoSlIj Sovlu’.
4 Quchqu’jaj nughmey ‘ej bomjaj, ghotpu’ DanoHmeH ruv Dalo’ ‘ej tera’Daq nughmey DaDev. SelaH
5 nInaDjaj ghotpu’, ‘o Qun’a’; nInaDjaj Hoch ghotpu’!
6 yobmeH naH lIng puH; nuquvmoH Qun’a’, Qun’a’ma’.
7 nuquvmoH Qun’a’; luvuvjaj Hoch tera’nganpu’!

bom 68

1 QoQpInvaD bomvam qon DawID.
Hu’ Qun’a’ ‘ej ghomHa’ jaghpu’Daj; ghaHvo’ Haw’ muSwI’pu’Daj!
2 chaH DaghomHa’; tlhIch lurur. jIvvo’pu’ luQaw’lu tu’taHvIS Qun’a’; qulDaq req tetlu’bogh lurur!
3 ‘ach Quch quvwI’pu’; lop chaH tu’taHvIS Qun’a’; Quchqu’mo’ bom.
4 Qun’a’vaD pebom, pongDajvaD naDmey tIbom; chalDaq lIghbogh Qun’a’ boQejmeH, pongDaj “yaH” yIlo’. peQuchqu’ tu’taHvIS ghaH!
5 vav Do’Ha’wI’pu’vaD vav Da; loDnal weSpu’bogh be’pu’vaD QanwI’ Da; Daq quvDajDaq ghaH Qun’a’’e’.
6 ‘ubwI’vaD juH DabmoH Qun’a’; chepmeH qama’pu’ Dev, ‘ach puH QaD luDab lotlhwI’pu’.
7 ‘o Qun’a’, ghotpu’lIj DaDevDI’, DebDaq bItlhajDI’, SelaH
8 Qom puH ‘ej SIS chal; ghu’vam tu’ Qun’a’, SIynay Qun’a’, yISra’el Qun’a’.
9 ‘o Qun’a’, bISISqu’moHpu’; quHlaj DarIHqa’pu’ Doy’qu’DI’.
10 pa’ luDabpu’ ghotpu’lIj; bIQaQmo’, ‘o Qun’a’, Do’Ha’wI’vaD bIpeSpu’.
11 mu’ nob joH’a’; mangghom’a’ chaH De’ QaQ lumaqbogh be’pu’’e’.
12 “Haw’; Haw’ mangghommey ta’pu’!” qengHoD luwav ratlhbogh be’pu’;
13 DI’raq pa’meyDaq SuQotchugh, SIrlIy luyugh roj bo’Degh telDu’ ‘ej qol’om luyugh bo.
14 pa’ ta’pu’ ghomHa’moHDI’ HoSjajwI’’a’, SalmonDaq peDjaj.
15 ‘o Qun’a’ HuD, ‘o baSan HuD, ‘o yormey law’ ghajbogh HuD, ‘o baSan HuD!
16 qatlh bIghal, ‘o yormey law’ ghajbogh HuD, Qun’a’ HuD DabejDI’? HuDvam Dab neH ghaH; HISlaH, reH pa’ Dab joH’a’.
17 cha’logh boq’egh wa’netlh; chen Qun’a’ Sargh Dujmey. SaDmey, SaDmey je bIH. pa’ SaH joH’a’. DaH qach quvDaq ‘oHtaH SIynay’e’.
18 Daq jen DaSalDI', qama'pu' law' Daqemta'; loDpu’vo’ nobmey law' DaHevpu’. vabDot mulwI’pu’vo’ nobmey DaHevpu’. ‘ej vaj chaH tlhejlaH Qun’a’, joH’a’.
19 quvjaj joH’a’; Hoch jaj nuqeng; toDmaj ghaH Qun’a’’e’. SelaH
20 toD Qun’a’ ghaH Qun’a’ma’’e’; Heghvo’ toD Qun’a’, joH’a’.
21 ‘ach jaghpu’Daj nachDu’ mup Qun’a’; DIvtaHwI’ DughrI’ mup.
22 jatlh joH’a’: “baSanvo’ chaH vIqemqa’; bIQ’a’ jaQvo’ vIqemqa’.
23 vaj jaghpu’ ‘IwDaq qamlIj Dalan ‘ej lulIn targhmey jat.
24 bIyItDI’ luleghpu’, ‘o Qun’a’, qach quvDaq yItDI’ Qun’a’wI’, voDleHwI’.
25 tlhopDaq chaH bomwI’pu’’e’ ‘ej ‘emDaq chaH muchwI’pu’’e’ ‘ej jojDaq chaH DIr’ InHommey weq’bogh be’pu’ Qup’e’.
26 “yej’a’Daq yISra’el bIQ ghItmoHwI’vo’ Qun’a’, joH’a’ yIquvmoH!”
27 pa’ Dev bInyamIn tuq mach; ghom’a’chajDaq chaH yeHu’Da tuq che’wI’pu’, Sebu’lun tuq che’wI’pu’, navtalIy tuq che’wI’pu’ je.
28 HoSlIj yIrItneS, ‘o Qun’a’; maHvaD bIta’meH HoSvam Dalo’pu’.
29 yeru’Sala’yImDaq chIrghlIjmo’ SoHvaD nobmey qem ta’pu’.
30 jagh nugh tIqunneS; SIyechmeyDaq ghachbogh Ha’DIbaH’a’mey rur; tanqa’Hommey jojDaq tangqa’’a’mey law’ rur. tInguqHa’moHneS ‘ej vanmeH SIrlIy ngoghmey qemjaj; veS lutIvbogh ghotpu’’e’ yIghomHa’neS.
31 mItlhra’yImvo’ ghoS chuQun; tugh Qun’a’vaD ghopDu’Daj pep quS nugh. 32 ‘o tera’ wo’mey, Qun’a’vaD pebom; joH’a’vaD naDmey tIbom; SelaH
33 chal’a’Daq, chal’a’ tIQDaq lIgh; yIqel: ghogh HoSghajDaj ngeH.
34 Qun’a’ HoS yImaq; yIsra’elDaq ngay’Daj tu’lu’; chalDaq HoSDaj tu’lu’.
35 qach quvDajDaq Dun Qun’a’; ghotpu’DajvaD HoS nob yISra’el Qun’a’. Qun’a’ quvmoHlu’jaj!

bom 69

1 QoQpInvaD bomvam qon DawID; Su’Sanmey lulo’lu’taHvIS [bomlu’].
HItoDneS, ‘o Qun’a’! yInwIj lubuQ bIQmey.
2 DabqI’ jaQDaq jI’oq; pa’ leSmeH qam Daq tu’lu’be’; bIQ jaQ vIghoS ‘ej mubI’chu’ SoD.
3 jIDoy’ jIjachtaHmo’; QaD HughwIj. pujchoH mInDu’wIj, Qun’a’wI’ vIloStaHmo’.
4 mumuSmeH meq luHutlhbogh muSwI’pu’ law’ law’ jIbwIj law’ puS. HoSghaj muQaw’qangbogh ghotpu’; muHIvmeH nep. vInIHbe’pu’bogh Doch vInobHa’nIS?
5 ‘o Qun’a’, QaghwIj DaSov; jIyemDI’, SoHvo’ So’be’ wanI’vam.
6 tuHbe’jaj loSwI’pu’lI’ jIHmo’, ‘o mangghom joH’a’, Qun’a’; quvHa’be’jaj nejwI’pu’lI’ jIHmo’, ‘o yISra’el Qun’a’.
7 SoHmo’ vIvaqlu’pu’ ‘ej jItuHpu’; qabwIj velpu’.
8 jIHvaD HujwI’ luDam loDnI’pu’wI’; jIHvaD nov luDam SoSwI’ puqloDpu’.
9 juH qachlIjmo’ jInong; munatlhpu’ wanI’vam. DaH muvaq vaqwI’pu’lI’.
10 jISaQDI’ ‘ej jISopQo’DI’ vIvaqchoHlu’.
11 weSjech ghegh vItuQmoHDI’, jIHvaD mu’qaD luDamchoH.
12 veng lojmItDaq murIch ba’wI’pu’ ‘ej mubopbogh bommey qon chechwI’pu’.
13 ‘ach jIH’e’, ‘o joH’a’, qatlhob. qaSDI’ poH mIt, ‘o Qun’a’, pung’a’lIj law’mo’ HIjangneS, vIt toDlIjmo’.
14 DabqI’Daq jI’oqbe’meH HItoDneS; jaghpu’wI’vo’, bIQmey jaQvo’ je vIluplu’jaj.
15 mubI’chu’be’jaj SoD ‘ej mughupbe’jaj bIQ’a’ ‘ej nujDaj SoQmoHbe’jaj mungaSbogh QemjIq’a’.
16 HIjangneS, ‘o joH’a’, QaQmo’ pung’a’lIj; punglIj law’mo’ jIHDaq yItlhe’neS.
17 toy’wI’lI’vo’ qablIj yISo’neSQo', jISotmo’; tugh HIjangneS.
18 qa’wIjDaq yISumneS, HItoDneS; voHDajbo’wIj yIDIlneS jaghpu’wI’mo’!
19 vIqunlu’ ‘e’ DaSov; jItuH ‘ej jIquvHa’ ‘e’ DaSov; Hoch gholpu’wI’ DaSov.
20 vIqunlu’mo’ tIqwIj ghorlu’, vaj jIQIl. vupwI’ vInej ‘ach pagh tu’lu’. baw’moHwI’pu’ vInej ‘ach pagh vISam.
21 tar munob; Soj qa’. jI’ojDI’ HIq wIb munob.
22 jonmeH jan mojjaj raSchaj; vonmeH jan mojjaj chepDI’.
23 HurghchoHjaj mInDu’chaj, vaj leghlaHbe’ ‘ej jeltaHjaj qoDchaj.
24 chaHDaq belHa’ghachlIj yIlIchneS; chaH ‘uchjaj meQbogh QeHlIj.
25 chImchoHjaj raQchaj; jo’ley’meychaj Dabjaj pagh.
26 vay’ DamupDI’, vay’vetlh lutlha’. vay’ DarIQmoHDI’, vay’vetlh ‘oy’ lurIch.
27 HeSmeychaj tIvI’moHneS ‘ej ruvlIj lughoSbe’jaj.
28 yInwI’pu’ paqvo’ luteylu’jaj; quvwI’pu’ jojDaq qI’be’jaj.
29 ‘ach vIQeHlu’ ‘ej jI’oy’; muSalmoH toDlIj, ‘o Qun’a’!
30 Qun’a’ pong vInaDmeH bom vIlo’; vIquvmoHmeH vItlho’.
31 joH’a’vaD ta’vam qaq law’ pu’Du’, lemDu’ je ghajbogh tangqa’ qaq puS.
32 ta’vam luleghDI’ nguqHa’wI’pu’, Quchqu’. Qun’a’ bonejchugh, tIqDu’raj lurIHqa’lu’jaj.
33 Do’Ha’wI’pu’ Qoy joH’a’ ‘ej qama’pu’Daj muSbe’.
34 lunaDjaj chal, puH, bIQ’a’, Hoch vIHwI’meyDaj je.
35 tlhI’yon toD Qun’a’ ‘ej yeHu’Da vengmey mutlh ‘ej pa’ luDab ghotpu’ ‘ej lu’at.
36 lu’at toy’wI’pu’Daj nortlhampu’ ‘ej luDab pongDaj muSHa’wI’pu’.

bom 70

1 QoQpInvaD bomvam qon DawID; qawmoHmeH [bomlu’].
tugh, ‘o Qun’a’, HItoDneS! tugh, ‘o joH’a’, HIQaHneS!
2 tuHchoHjaj ‘e’ mISchoHjaj yInwIj lunejbogh ghotpu’’e’! DoHjaj ‘ej quvHa’jaj QIHwIj lutIvbogh ghotpu’’e’!
3 DoHjaj tuHmo’. jatlh: “toH! toH!”
4 SoHmo’ lopjaj ‘ej Quchjaj nInejbogh Hoch. Hochlogh “Dun Qun’a’” lujatlhjaj toDlIj muSHa’wI’pu’.
5 ‘ach jImIpHa’ ‘ej jIHutlh; jIHDaq yImoDneS, ‘o Qun’a’! QaHwI’wI’, toDwI’wI’ je SoH; ‘o joH’a’, yImImneSQo'!

bom 71

1 SoHvaD, ‘o joH’a’, lulIgh vIDam; not vItuHmoHlu’!
2 ruvlIjmo’ HIlupneS ‘ej HItoDneS; jIHDaq teSlIj yItlhe’moHneS ‘ej HItoDneS!
3 jIHvaD lulIgh nagh yIDaneS; vaj qaghoStaH. vItoDlu’meH bIra’ta’, naghwIj, jem’IHwIj je SoHmo’.
4 jIvvo’ ghopvo’ HItoDneS, ‘o Qun’a’, mu’uchDI’ QIHbogh loD.
5 chabalwIj SoH, ‘o joH’a’, ‘ej HojnIy jIHDI’ qavoq.
6 jIboghpu’pa’ qawuv; SoSwI’ chI’IDvo’ cholelpu’. qanaDtaH.
7 jIHvaD maQ luDam ghotpu’ law’ ‘ach lulIgh HoS SoH.
8 nujwIj buy’moH naDlIj ‘ej buy’moH ngay’lIj qaStaHvIS jaj Hoch.
9 DaH vIqanDI’ HIwoDneSQo'. HoSwIj natlhlu’DI’ HIlonneSQo'.
10 murIch jaghpu’wI’; ja’chuq yInwIj luloSbogh vay’pu’’e’.
11 jatlh: “ghaH lonpu’ Qun’a’; yItlha’ ‘ej yIjon, toDmeH pagh tu’lu’.”
12 ‘o Qun’a’, jIHvo’ yIHopneSQo'; ‘o Qun’a’wI’, tugh HIQaHneS!
13 tuHchoHjaj pumwI’pu’wI’ ‘ej lunatlhlu’jaj; quvHa’jaj muQIHrupbogh vay’pu’ ‘ej luvaqlu’jaj.
14 ‘ach jIturtaH jIH; qanaDtaH ‘ej qanaDqa’taH.
15 ta’meylIj quv rIch nujwIj; qaStaHvIS jaj Hoch toDmeH ta’meylIj rIch. law’ bIH; vItoghlaHbe’.
16 joH’a’ Qun’a’ ta’mey HoSghaj vImaqmeH jIghoS; SoHvo’ neH ‘oH ruv’e’ chaHvaD ‘e’ vIqawmoH.
17 ‘o Qun’a’, HojnIy jIHDI’ choghojmoH; DaH ta’meylIj Dun vImaqqa’taH.
18 jIqanDI’ ‘ej qIjchoHDI’ jIbwIj ‘ej wovchoHDI’, ‘o Qun’a’, HIlonneSQo'; ghIq latlh puq poHvaD HoSlIj vImaq; ghotpu’ vebvaD nguplIj vImaq.
19 jenqu’ ruvlIj, ‘o Qun’a’; ta’mey Dun Data’ta’; Durur ‘Iv?
20 jIHvaD Sengmey law’ DaleghmoHpu’ ‘ach chorIHqa’moH. wutlh jaQvo’ choqemqa’.
21 choquvqa’moH ‘ej chobaw’qa’moH.
22 vItlIjmo’ qanaDmeH HurDagh vIchu’, ‘o Qun’a’wI’; SoHvaD jIbommeH tIngDagh vIchu’, ‘o yIsra’el quvwI’’a’.
23 jIQuchmo’ jach wuSDu’wIj, SoHvaD jIbomDI’; jach qa’wIj DatoDpu’bogh je.
24 qaStaHvIS jaj Hoch ruvlIj rIch jatwIj, tuHchoHmo’ ‘ej mISchoHmo’ muQIHbogh ghotpu’.

bom 72

1 [bomvam qon] Selo’moH.
ta’vaD ruvlIj yInobneS, ‘o Qun’a’; che’bogh puqloDvaD batlhlIj yInobneS!
2 batlh vangjaj, ghotpu’lI’ noHDI’; ruv turjaj, mIpHa’wI’pu’lI’ noHDI’!
3 ghotpu’ chepmoHjaj HuDmey; ruv lulIngjaj HuDHommey.
4 ghotpu’ mIpHa’wI’pu’vaD noH; Do’Ha’wI’pu’ puqpu’ toD; QIHwI’ tap!
5 taHtaHvIS jul maS je nIvuv, taHtaHvIS Hoch puq poHmey!
6 maghDaq chIplu’pu’bogh SISbogh muD Dotlh rurjaj ghaH; puH ghaybogh bIQ rurjaj!
7 qaStaHvIS jajmeyDaj chepjaj quvwI’; taHtaHvIS maS law’jaj roj!
8 bIQ’a’ bIQ’a’ je qubbIDDaq che’jaj; bIQtIq, puH HeHmey je qubbIDDaq che’jaj!
9 ghaHvaD torjaj Deb DabwI’pu’; Say’qIS luroSjaj jaghpu’Daj!
10 luvanjaj tarSIS ta’pu’, bIQ’a’ HeH ta’pu’ je; nobmey muchjaj cheva’ ta’pu’, Seva’ ta’pu’ je.
11 ghaHvaD torchu’jaj ta’pu’; lutoy’jaj Hoch nughmey!
12 Do’Ha’wI’, mIpHa’wI’, QaHwI’ Hutlhbogh nuv’e’ je toD rItDI’.
13 pujwI’, Do’Ha’wI’ je vup; Do’Ha’wI’pu’ yIn toD.
14 luQIHlu’DI’ ‘ej rallu’DI’, qa’chaj toD; ‘Iwchaj Qej.
15 yIn nI’ SIQjaj; ghaHvaD cheva’ qol’om noblu’jaj! reH tlhobtaHlu’jaj ‘ej qaStaHvIS jaj Hoch naDlu’jaj!
16 puHDaj law’jaj tIr; HuDmey yorDaq joqjaj; leva’non rurjaj nuHDaj. chepjaj veng ghotpu’; yotlh magh lururjaj!
17 reH taHjaj pongDaj! noytaHjaj; jul rurjaj! ghaHmo’ ghotpu’ luquvmoHlu’jaj; luquvmoHjaj Hoch nughmey!
18 joH’a’, yISra’el Qun’a’ quvmoHlu’jaj. ta’mey Dun ta’ ghaH neH.
19 reH ngay’Daj pong quvmoHlu’jaj; tera’ Hoch buy’moHjaj ngay’Daj! qaSjaj ‘ej qaSjaj!
20 rIn DawID, yeSay puqloD bommey.

paq 3 bom 73

1 bomvam qon ‘aSav.
yISra’elvaD QaQbej Qun’a’; tIq watlh lughajbogh vay’pu’’e’vaD QaQbej.
2 ‘ach jIH’e’, tlhoS tangpu’ qamDu’wIj; tlhoS jIpumpu’ jIyIttaHvIS.
3 nguqwI’pu’ vIghal, cheptaH jIvvo’pu’ ‘e’ vIlegh.
4 yIntaHvIS ‘oy’be’; pIv porghDu’chaj ‘ej HoS.
5 Sotbe’; latlhpu’ rurbe’. luQIHlu’be’; latlh nuvpu’ rurbe’.
6 vaj Ha’qujchaj ‘oH le’yo’’e’. chaH vel ta’mey ral; Sut rur.
7 lun mInDu’chaj rormo’; tIqchajvo’ ghIt ta’mey Dogh.
8 nguy ‘ej naH jatlhDI’; QIHmeH buQDI’ nguq.
9 chalvaD mIymeH nujDu’chaj lo’; puH chIq jatDu’chaj.
10 vaj chaH chegh ghotpu’chaj; chaHmo’ buy’bogh HIvje’vo’ bIQ natlhlu’chu’.
11 lujatlh: “chay’ SovlaH Qun’a’? pagh Sov’a’ jenwI’’a’?”
12 yIqel: jIvvo’pu’ chaH nuvpu’vam’e’. reH churHa’ ‘ej ghur mIpchaj.
13 Say’ tIqwIj ‘e’ vIqaSmoHtaH ‘ej jIchunmeH ghopDu’wIj vISay’moH ‘ach qey wanI’vam.
14 qaStaHvIS jaj Hoch vIQIHlu’; Hoch po, vIqunlu.
15 jIjatlhmeH Ho’DoSvam vIlo’ net jalchugh, vaj puqpu’lI’ vImagh.
16 ‘ach ghu’vam vIyaj ‘e’ vInIDDI’ Qatlhqu’law’ Qu’vam.
17 ‘ach ghIq Qun’a’ qach quv vI’el. ghIq Sanchaj vIyajchoH.
18 Daqmey ‘IchDaq chaH Dalanbej. lotDaq DapummoH.
19 pay’ luQaw’lu’; pe’vIl bI’chu’ lotmey!
20 qechmeychaj rorgh Davaq bIHu’DI’, ‘o joH’a’; vemlu’DI’ Suchtuv rur.
21 wIbchoHDI’ qa’wIj ‘ej tIqwIj nuQlu’DI’
22 jIDogh ‘ej jIjIv; Ha’DIbaH vIDa ‘e’ Datu’.
23 ‘ach qatlhejtaH; nIHwIj ghop Da’uch.
24 choDevmeH qeS Danob. SIbI’Ha’ ngay’ SanD chopawmoH.
25 chalDaq qaghajbe’chugh, vaj ‘Iv vIghaj? puHDaq chabalwIj SoH; latlh chabal vIghajbe’.
26 luj ‘oynotwIj, tIqwIj je ‘ach Hochlogh tIqwIj HoS, popwIj je ghaH Qun’a’’e’.
27 yIqelneS: SoHDaq Hopbogh vay’pu’’e’ luQaw’lu’; ‘opuHmeH Dulonbogh Hoch’e’ DaSang.
28 ‘ach Qun’a’ vIcholDI’ QaQ ghu’vam; joH’a’ Qun’a’vaD lulIghwIj vIDampu’. vaj Hoch ta’meylIj vImaq.

bom 74

1 maSqIlvam qon ‘aSav.
‘o Qun’a’, qatlh reH juwoD? qatlh yotlhlIj DI’raqmey meQ QeHlIj?
2 ghom’a’lIj yIqawneS; ben law’ Daje’. quHlIj tuq mojmeH DatoDpu’. tlhI’yon HuD yIqawneS; pa’ DaDabpu’.
3 taHbogh pIghDaq yIyItneS; qach quvDaq Hoch Qaw’pu’ jagh!
4 ghom’a’lIj qoDDaq yay bey jachpu’ ghollI’; pa’ Degh DameH joqwI’chaj lanpu’.
5 ngemDaq ‘obmaQ Qachbogh nuv’e’ rur.
6 DaH Hoch Sor Hap ghItlhlu’bogh lughorchu’meH jey’naSmey, mupwI’mey je lo’.
7 qachlIj quv meQmeH qul lulo’; Daq’e’ Dabbogh ponglIj luwatlhHa’moH ‘ej luDejmoH.
8 jatlh’egh: “DIQaw’chu’jaj!” puHDaq Hoch Qun’a’ ghom Daqmey meQ.
9 maQmeymaj DIleghbe’; DaH ‘aqwI’’a’ tu’lu’be’. ghorgh Dor ghu’vam? maH jojDaq Sov pagh.
10 qaStaHvIS puH ‘ar, ‘o Qun’a’, Hagh ghol? reH ponglIj vaq’a’ jagh?
11 qatlh nIHlIj ghop Da’ot? buqlIjvo’ yIlelneS ‘ej tIQaw’neS!
12 ben law’ voDleHwI’ ghaH Qun’a’’e’. puHDaq toD ta’taH.
13 HoSlIjmo’ bIQ’a’ Dawav ‘ej bIQ’a’ tlhapraghmey nach Daghor.
14 lIvyatan nach Datap; Deb Ha’DIbaHmeyvaD Soj DamojmoH.
15 ghItmoHwI’, SoD je DarIv; bIQtIqmey HoS DaQaDmoH.
16 SoHvaD ‘oH pem’e’. SoHvaD ‘oH je ram’e’. chal wovmoHwI’mey, jul je Dacherpu’.
17 Hoch tera’ veHmey Dalanpu’; qImroq tuj, qImroq bIr je DachenmoHpu’.
18 wanI’vam yIqawneS, ‘o joH’a’: Hagh jagh ‘ej ponglIj luvaq qoHpu’.
19 Ha’DIbaHmeyvaD roj bo’DeghlIj qa’ yIlupneSQo'; reH mIpHa’wI’pu’lI’ yIn yIlIjneSQo'.
20 mab yIqelneS. puHDaq Daqmey Hurgh buy’moH juHmey ral.
21 DoHbe’jaj ‘ej tuHbe’jaj ghotpu’ luQIHlu’bogh. ponglIj lunaDjaj mIpHa’wI’, Do’Ha’wI’ je.
22 yIHu’neS, ‘o Qun’a’, ‘ej DIblIj yIHubneS; qaStaHvIS jaj Hoch nIvaq qoHpu’ ‘e’ yIqawneS!
23 jaghpu’lI’ ghogh yIlIjneSQo'. ghurtaH nIqaDbogh lotlhwI’pu’ wab!

bom 75

1 QoQpInvaD bomvam qon ‘aSav. ‘al taSHet lo’lu’taHvIS [bomlu’].
pItlho’, ‘o Qun’a’; matlho’, Summo’ ponglIj. ta’meylIj Dun lumaqlu’.
2 “qaSDI’ puH vIcherbogh jInoHmeH ruv vIlo’.
3 QomDI’ puH, Hoch nganpu’Daj je, tutmeyDaj vIngaDmoH jIH’e’. SelaH
4 mIybogh vay’pu’vaD vIjatlh: “pemIyQo’.” jIvvopu’’vaD vIjatlh: “pu’raj yIpepQo’;
5 pu’raj yIpepqu’Qo’ ‘ej penguqQo’ pejatlhDI’.””
6 chanvo’ ‘evvo’ tIngvo’ je num’eghlu’be’
7 ‘ach yoj tur Qun’a’’e’. nuv ‘eSmoH ‘ej latlh jenmoH.
8 joH’a’ ghopDaq HIvje’ tu’lu’. HIvje’vamDaq Doq HIq DuDchu’lu’bogh tu’lu’. lIch ghaH ‘ej lutlhutlhnIS Hoch tera’ jIvvo’pu’. vabDot yubHommey natlhnIS.
9 ‘ach Hochlogh vImaq jIH’e’. ya’qov Qun’a’vaD naDmey vIbom.
10 Hoch jIvvo’pu’ pu’mey lupe’lu’chu’ ‘ach quvwI’pu’ pu’mey lupeplu’.

bom 76

1 QoQpInvaD bomvam qon ‘aSav. HurDaghmey lulo’lu’taHvIS [bomlu’].
yeHu’Da SepDaq Qun’a’ Sovlu’. yISra’el SepDaq Dun pongDaj.
2 Salem vengDaq jo’ley’Daj cherlu’pu’; tlhI’yon HuDDaq DabmeH Daqjaj cherlu’pu’.
3 pa’ barbogh naQjejHommey, yoD, yan, neS nuHmey je ghor. SelaH
4 bIboch; SoH Dun law’ HuDmey’e’ buy’moHbogh gheDmey Dun puS.
5 yoHwI’pu’ qengHoD lutlhaplu’pu’. QongchoH chaH. ghop peplaHbe’ SuvwI’.
6 bIqun, ‘o ya’qov Qun’a’, Duq lIghwI’, Sargh je.
7 ‘ach SoH’e’, Davuvlu’. QamlaH ‘Iv bIQeHchoHDI’?
8 chal’a’vo’ yoj Dajatlh; tera’ ghIjlu’ ‘ej vIHbe’
9 Hu’DI’ Qun’a’ ‘ej yoj cherDI’. Hoch tera’ nguqHa’wI’pu’ toDmeH wanI’vam ta’. SelaH
10 vabDot Qay’choHDI’ nuv, DanaDlu’. Qay’DI’ chuv DatuQmoH; Ha’quj rur.
11 joH’a’ Qun’a’ra’vaD ‘Ip yI’Ip ‘ej yIpab. Qun’a’vaD vuvlu’bogh nobmey nobjaj luDechbogh Hoch.
12 che’wI’pu’ qa’ pe’chu’ ‘ej luvuv tera’ ta’pu’.

bom 77

1 QoQpInvaD bomvam qon ‘aSav. yeDu’tun lo’lu’taHvIS [bomlu’].
ghoghwIj vIlo’; Qun’a’vaD jIjachmeH ghoghwIj vIlo’ ‘ej muQoy.
2 qaSDI’ Seng jaj, joH’a’ vInej; qaStaHvIS ram ghopwIj vIpeptaH ‘ach baw’Qo’ qa’wIj.
3 Qun’a’ vIqawDI’ jISot; jIpaQ ‘ej vulchoH qa’wIj. SelaH
4 mInyoDDu’wIj DapoSmoHtaH. jISotqu’ vaj jIjatlhlaHbe’.
5 jajmey Deq vIqel; DISmey ngo’ vIqel.
6 vIjatlh: “qaStaHvIS ram, bomwIj vIqawjaj. paQjaj tIqwIj.” vaj nejqu’ qa’wIj:
7 “reH woD joH’a’? not tlhoqtlhal Daturqa’?”
8 reH mevpu’ pung’a’Daj? Hochlogh lujpu’ ‘IpmeyDaj?
9 tlhoqtlhal tur ‘e’ lIjpu’ Qun’a’? pungDaj SoQmoHpu’ QeHmo’? SelaH
10 ‘ej vIjatlh: “Dochvam vItlhob: jenwI’’a’ nIH ghop DISmey.”
11 joH’a’ ta’mey vIqaw; boqHarmeylIj tIQ vIqawbej.
12 Hoch ta’meylIj vIpaQ ‘ej chavmeylIj vIrIch.
13 quv tIghlIj, ‘o Qun’a’. Dun Qun’a’; rapbogh Qun yIngu’.
14 boqHarmey ta’bogh Qun’a’’e’ SoH. ghotpu’vaD HoSlIj DaSovmoHta’.
15 ghotpu’lIj, ya’qov yo’Sev je puqpu’ DatoDmeH DeSlIj Dalo’ta’. SelaH
16 nIleghDI’ bIQmey, ‘o Qun’a’, nIleghDI’ bIQmey lughIjlu’. jelbej bIQ’a’.
17 bIQ lulIch ‘engmey; tuD chal. Hoch lurghDaq bar naQjejHommeylIj.
18 SuS’a’Daq tuD ghoghlIj; qo’ luwovmoH be’bIlmey; Qom puH ‘ej jel.
19 bIQ’a’Daq ‘oH HelIj’e’; bIQmey law’Daq ‘oH tawlIj’e’ ‘ach bem vemmeylIj luleghlu’be’.
20 ghotpu’lI’ DaDevpu’; DI’raq ghom rur. MoSe, ‘aHeron je ghop Dalo’pu’.

bom 78

1 maSqIlvam qon ‘aSav.
chut’a’wIj yI’Ij, ‘o ghotpu’wI’; nujwIj mu’meyvaD teSraj tItlhe’moH.
2 SorHa’meH lut vIjatlh; nujwIj vIpoSmoH. tIQbogh vIttlheghmey Hurgh vIjatlh.
3 DIQoypu’ ‘ej DISovpu’; maHvaD jatlhpu’ no’ma’.
4 puqpu’chajvo’ DISo’be’ ‘ach puq poH veb wIja’. joH’a’ ta’mey Dun, HoSDaj, boqHarmeyDaj je DIrIch.
5 ya’qovDaq nguHta’ ghaH; yISra’elDaq chut cherta’. puqpu’chaj ghojmoH vavpu’ma’ ‘e’ ra’ta’.
6 vaj Sov puq poH veb, wej boghpu’ puqpu’, ‘ej Hu’ ‘ej puqpu’chaj ja’.
7 vaj Qun’a’ luloS ‘ej Qun’a’ ta’mey lIjbe’ ‘ej rIchwInmeyDaj pab.
8 vaj no’chaj rurbe’, lotlhbogh puq poH mul chaHmo’. ngaDbe’ tIqchaj ‘ej Qun’a’vaD matlhbe’ qa’chaj.
9 naQjejHom nuH qeng ‘evra’yIm puqpu’ ‘ach che’ron DoH qaSDI’ may’ jaj.
10 Qun’a’ mab lupabbe’ ‘ej chutDaj lulobQo’.
11 ta’meyDaj lIj ‘ej boqHarmeyDaj ‘angta’bogh lIj.
12 boqHarmey ta’. mItlhra’yImDaq tlho’an yotlhDaq ghu’vam lutu’ no’ma’.
13 bIQ’a’ wav ‘ej chaHvaD luchIqmoH. bIQmey QammoH; Doj lurur.
14 qaStaHvIS pem, DevmeH ‘eng lo’; qaStaHvIS ram, DevmeH qul wovmoHwI’ lo’.
15 DebDaq naghmey rIv ‘ej chaHvaD tlhutlhmoH; bIQ jaQ rur.
16 naghvo’ bIQtIqHommey ghoSmoH ‘ej bIQmey ghItmoH; bIQtIq’a’ rur.
17 ‘ach luqaDmeH yem chaH ‘ej yemqa’. DebDaq jenwI’’a’ luqaDmeH lotlh.
18 Qun’a’ lutlhu’moH tIqDu’chaj ‘ej Soj luneHqu’bogh lupoQ.
19 Qun’a’ lurIchHa’ ‘ej lujatlh: “DebDaq raS cherlaH’a’ Qun’a’?
20 nagh mup; vaj ghIt bIQ ‘ej bI’ bIQtIqHom. ghotpu’vaD tIr ngogh, Ha’DIbaH joq noblaH’a’ je?”
21 vaj QoyDI’ joH’a’, QeHqu’choH. ya’qovmo’ meQchoH qul; yISra’elmo’ ghur QeHDaj.
22 qaS wanI’vam, Qun’a’ luHarbe’mo’ ‘ej toDbogh HoSDaj luvoqbe’mo’.
23 ‘ach chalmey ra’ ‘ej chal’a’ lojmItmey poSmoH.
24 ‘ej SopmeH chaHvaD man SISmoH ‘ej chaHvaD chal tIr nob.
25 HoSDo’ tIr ngogh Sop loD; Soj law’ ngeH.
26 chalDaq chan SuS qaSmoH ‘ej HoSDajmo’ tIng SuS qaSmoH.
27 chaHvaD Ha’DIbaH SISmoH; Say’qIS rur. bo’Deghmey ngeH; bIQ’a’ Do’ol rur.
28 raQchaj qoDDaq bIH pummoH. juH qachmeychaj Dech.
29 Sop chaH ‘ej buy’choHchu’, chaHvaD chabalchaj nobmo’.
30 ‘ach yonchoHchu’pa’, nujDu’chajDaq ‘oHtaHvIS Soj,
31 chaHmo’ QeHqu’choH Qun’a’ ‘ej HoSqu’wI’pu’ HoH ‘ej yISra’el loDpu’ Qup jey.
32 ‘ach yem ‘ej yemqa’ chaH. boqHarmeyDaj buSHa’ ‘ej HarQo’.
33 vaj jajmeychaj ngabmoH; tlhuHHom rur. DISmeychaj ngabmoH lughIjqu’lu’taHvIS.
34 chaH HoHDI’, ghaH lunej. DIS ‘ej tlhe’ ‘ej pe’vIl Qun’a’ lunej.
35 naghchaj ghaH Qun’a’’e’ ‘e’ luqaw. toDwI’chaj ghaH Qun’a’ jenwI’’a’’e’.
36 ‘ach mu’mey qey jatlh nujDu’chaj; lunep jatDu’chaj.
37 ghaHvaD ngaDbe’ tIqDu’chaj ‘ej mabDaj lupabbe’.
38 ‘ach vup ghaH. yemDI’ chaH, DIvHa’moHmeH vel ghaH ‘ej chaH Qaw’be’. pIj QeHDaj vuS ‘ej Qay’be’.
39 ‘oynot neH chaH ‘e’ qaw; juSbogh ‘ej cheghbe’bogh SuS lurur.
40 pIj HatlhDaq lulotlh ‘ej DebDaq lunuQ!
41 Qun’a’ lutlhu’moH ‘ej lutlhu’moHqa’. yISra’el quvwI’’a’ luSuj.
42 ghopDaj luqawbe’. gholvo’ chaH toD; jajvetlh luqawbe’.
43 mItlhra’yImDaq ta’mey Dun ta’; tlho’an yotlhDaq boqHarmey ta’.
44 bIQtIqmeychajvaD ‘Iw mojmoH, vaj tlhutlhlaHbe’.
45 ghIlab ghew ‘engmey ngeH; chaH natlh bIH. mabebmey ngeH ; chaH Qaw’ bIH.
46 SupwI’ ghewvaD naH yotlhmeychaj nob. yobmeH vum chaH ‘ach Sop SupwI’ ghew.
47 ghIrep naH yotlhmeychaj Qaw’meH muD Dotlh HeqmoH. naH Sormeychaj Qaw’meH muD Dotlh taDmoH.
48 tangqa’meychaj HeghmoH Heqmo’ ‘ej DI’raqmeychaj HeghmoH tuDmo’.
49 chaHDaq QeH’a’Daj, belHa’ghachDaj, SengDaj je lIch. Qaw’bogh HoSDo’ ngeH.
50 QeHDajvaD taw chenmoH; Heghvo’ chaH Qanbe’ ‘ach rop’a’vaD yInchaj nob.
51 mItlhra’yImDaq Hoch ghubDaQ mupchu’; Ham jo’ley’meyDaq HoSchaj wa’DIch mupchu’.
52 ghIq ghotpu’Daj lup ‘ej DebDaq Dev; DI’raqmey rur.
53 chaH Qan vaj ghIj pagh ‘ach jaghpu’chaj vIQmoH bIQ’a’.
54 puHDaqj quvDaq chaH qem. HuDDaq’e’ je’bogh nIHDaj ghop qem.
55 nughmey vuj ghaH; ghu’vam lutu’ chaH. puH lu’atmeH chaH, wav ghaH. yISra’el tuqmeyvaD jo’ley’meychaj DabmoH.
56 ‘ach Qun’a’ jenwI’’a’ lutlhu’moH ‘ej lulotlh ‘ej chutmeyDaj pabQo’.
57 ghaHvo’ tlhe’ ‘ej matlhHa’; no’chaj rur. SIH; naQjejHom nuH Duy’ lurur.
58 Daqmeychaj jenmo’ luQeHmoH; latmeychajmo’ lughalmoH.
59 QoyDI’ Qun’a’, Qay’ ‘ej yISra’el woDchu’.
60 SIloHDaq DabmeH Daq lon. Humanpu’ jojDaq jo’ley’Daj lanpu’; ghIq jo’ley’ lon.
61 DerlIq’a’Daj jonlu’ ‘e’ chaw’; ghol ghopDaq ngay’Daj jeghlu’ ‘e’ chaw’.
62 yanvaD ghotpu’Daj nob ‘ej quHDajDaq QeHDaj lIch.
63 loDpu’chaj Qup natlh qul; tlhogh bom luHutlh be’pu’chaj Qup.
64 yanmo’ pum maqleghpu’chaj. SaQlaHbe’ loDnal luweSbogh be’pu’’e’.
65 ghIq vem joH’a’; ‘Iw tlhutlhpu’bogh SuvwI’ jachwI’’e’ rur.
66 gholpu’Daj mup ‘ej Hochlogh chaH tuHmoH.
67 yoSev jo’ley’ lajQo’; ‘evra’yIm tuq wIvbe’.
68 ‘ach yeHu’Da tuq wIv; tlhI’yon HuDvaD bangDaj Dam.
69 DaqDaj quv mutlh; chal’a’ rur. reH tera’ chenmoHpu’bogh rur.
70 DawID, toy’wI’Daj wIv ‘ej DI’raq pa’meyvo’ ghaH tlhap.
71 tagha’Ha’ SoS DI’raq Qorgh DawID; ghIq ya’qov ghotpu’Daj, yISra’el quHDaj QorghmeH DawID wIv joH’a’.
72 chaH QorghmeH tIgh QaQ pab ‘ej chaH DevmeH ghopDaj po’ lo’.

bom 79

1 bomvam qon ‘aSav.
‘o Qun’a’, quHlIj lu’elpu’ nughmey; chIrghlIj quv luwatlhHa’moHpu’. yeru’Sala’yImvaD pIgh lumojmoHpu’.
2 SopmeH chal bo’DeghmeyvaD toy’wI’pu’lI’ lommey nobpu’; puH Ha’DIbaHmeyvaD matlhwI’pu’lI’ ‘oynot lunobpu’.
3 yeru’Sala’yIm HochDaq ‘Iwchaj ghItmoHpu’; bIQ rur. molbogh pagh tu’lu’.
4 nunuSchoH jIlpu’ma’; nuvaq ‘ej nutIch nuDechbogh ghotpu’.
5 qaStaHvIS poH ‘ar qaS ghu’vam, ‘o joH’a’? Hochlogh bIQeH? bIghal; meQ’a’? qul rur’a’?
6 nISovbe’bogh nughmeyDaq, ponglIj lurItbe’bogh wo’meyDaq je QeHlIj yIlIchneS!
7 ya’qov luSoppu’; DabmeH DaqDaj lupejpu’.
8 yem puq poHmey Deq; ghopIchneSQo’. nom maHvaD punglIj yIturneS, wItuHmoHqu’lu’mo’.
9 ghoQaHneS, ‘o toDmaj Qun’a’, ponglIj ngay’mo’. gholupneS ‘ej ghoyemHa’moHneS, ponglIj quvmo’.
10 qatlh lujatlhnIS nughmey: “nuqDaq ghaH Qun’a’chaj’e’?” nughmeyDaq toy’wI’pu’lI’ ‘Iwmo’ bortaSlIj net Sovjaj; ghu’vam wItu’jaj.
11 ghughDI’ qama’pu’, DughoSjaj wanI’vam. HoS’a’lIjmo’, ghotpu’ luqIchlu’bogh tIchoqneS.
12 nInuSDI’ jIlpu’ma’, Sochlogh tInuSqa’neS, ‘o joH’a’!
13 ‘ach reH pItlho’, maH, ghotpu’lI’, yotlhlIj DI’raqmey. Hoch puq poHvaD naDlIj wImaq ‘ej wImaqqa’.

bom 80

1 bomvam qon ‘aSav. Su’Sanmey lulo’lu’taHvIS bomlu’. nguHmeH vep ‘oH.
teSlIj yInobneS, ‘o yISra’el QorghwI’. yoSev DaDev; DI’raq ghom rur. qeruvpu’Daq bIba’; yIbochneS.
2 HoSlIj yIrIHneS ‘ej ghotoDneS! wanI’vam lutu’jaj ‘evra’yIm, benyamIn, menaSSeH je!
3 ghorIHqa’neS, ‘o Qun’a’; qablIj yIbochmoHneS, vaj wItoDlu’!
4 ‘o mangghom joH’a’, Qun’a’, qaStaHvIS poH ‘ar bIQeH nItlhobDI’ ghotpu’lI’?
5 tIr ngoghchajvaD mIn ‘onroSmey DamojmoHta’; mIn ‘onroSmey DatlhutlhmoHchu’ta’.
6 jIlpu’ma’ Seng jumojmoH; Hagh jaghpu’ma’.
7 ghorIHqa’neS, ‘o mangghom Qun’a’; qablIj yIbochmoHneS, vaj wItoDlu’!
8 mItlhra’yImvo’ ghIrep naH San’emDer Dalel. nughmey Davuj ‘ej ‘oH Dapoch.
9 ‘oHvaD puH DaHuvmoH. puH lubuy’moH ‘oQqarmeyDaj ‘e’ DaqaSmoH.
10 HuDmey vel QIbDaj; qet’uy Sor’a’mey vel bartIqmeyDaj.
11 bIQ’a’Daq bartIqmey ngeH; bIQtIqDaq bartIqHommey ngeH.
12 qatlh reDmeyDaj Daghorchu’ta’? naHDaj nIH juSbogh Hoch.
13 ‘oH Qaw’ ngem targh; Sop yotlh Ha’DIbaH.
14 yIcheghneS, ‘o mangghom Qun’a’! chal’a’vo’ yIbejneS ‘ej yIleghneS. ghIrep naH San’emDervam yIqelneS.
15 ghIrep naH yotlh pochpu’ nIHlIj ghop. SoHvaD puqloD DaHoSmoHpu’; ghaH yIqelneS.
16 ‘oH meQmeH qul lulo’pu’. ‘oH lu’pe’chu’pu’. chaH qunDI’ qablIj, luQaw’lu’jaj!
17 ‘ach nIHlIj loDDaq ghoplIj yIlanneS! SoHvaD Human puqloDvam DaHoSmoHpu’.
18 ghIq SoHvo’ matlhe’Qo’. maHvaD yIn Danobchugh, vaj ponglIj wIrIt!
19 ghorIHqa’neS, ‘o mangghom joH’a’, Qun’a’! qablIj yIbochmoHneS, vaj wItoDlu’!

bom 81

1 QoQpInvaD bomvam qon ‘aSav. ghIttIt lo’lu’taHvIS [bomlu’].
pe’vIl Qun’a’vaD, HoSmajvaD pebom; ya’qov Qun’a’vaD pejach!
2 bom yIpep; DIr ‘InHom, HurDagh, tIngDagh je tIlo’. 3 qaSDI’ maS So’lu’chu’bogh, qaSDI’ maS’e’ So’bogh pagh, qaSDI’ lop jaj je, nItlh gheb yISuS.
4 yISra’elvaD rIchwIn ‘oH; ya’qov Qun’a’ chut ‘oH.
5 yoSev tuqDaq vepvam cher, mItlhra’yIm puH HIvDI’. Hol vIyajbe’bogh vIQoy:
6 “volchaHlIjvo’ ‘ughwI’ vIteqpu; ‘unwatvo’ ghoplIj tItlhabmoHpu’.
7 Sotlaw’ DangeH, qhIq qalup. tuDbogh ‘engvo’ qajang; merI’va bIQmeyDaq qanuD. SelaH
8 peQoy, ‘o ghotpu’wI’, SaquntaHvIS! ‘o yISra’el, cho’Ij ‘e’ vIjIn!
9 tlhIHDaq Qun Huj tu’lu’be’jaj. nov QunvaD yItorQo’.
10 joH’a’, Qun’a’lI’ jIH. mItlhra’yIm puHvo’ qalup. nujlIj DapoSmoHchugh, vaj vIbuy’moH.
11 “‘ach ghoghwIj lu‘IjQo’ ghotpu’wI’; mulobqangbe’ yISra’el.
12 vaj tIqDu’chaj mulvaD chaH vInob; qeSchaj tlhIn pab.
13 mu’Ij ghotpu’wI’ ‘e’ vIjIn! tIghwIj pab yISra’el ‘e’ vIjIn!
14 vaj tugh jaghpu’chaj vIjey; tugh gholpu’chaj qaD ghopwIj.
15 vaj jel joH’a’ lumuSbogh vay’pu’’e’ ‘ej reH taH Sanchaj.
16 ‘ach tIr QaQqu’ DuSopmoH; qayonmoHmeH naghvo’ na’ran rurbogh rebmugh’e’ vIlo’.

bom 82

1 bomvam qon ‘aSav.
Qun yejDaq Qam Qun’a’; Qunpu’ jojDaq noH.
2 “qaStaHvIS poH ‘ar bInoHHa’ ‘ej jIvvo’pu’ DamaS? SelaH
3 pujwI’vaD, vav Hutlhbogh puqvaD je yInoHneS; mIpHa’wI’vaD, Do’Ha’wI’vaD je ruv yInobneS.
4 pujwI’, Do’Ha’wI’ je tItoDneS; jIvvo’pu’ ghopvo’ tIlupneS.
5 Sovbe’ ‘ej yajbe’ chaH; QIbDaq yIt; Qom puH Hoch qappam.
6 vIjatlh: “Qunpu’ tlhIH; jenwI’’a’ puqloDpu’ tlhIH, Hoch;
7 ach SuHegh; loDpu’ borur. Supum; che’wI’pu’ borur.”
8 yIHu’neS, ‘o Qun’a’, ‘ej tera’ yInoHneS; Hoch nughmey Da’at!”

bom 83

1 bomvam qon ‘aSav.
‘o Qun’a’, yItamtaHneSQo’; yIghanHa’neSQo’ ‘ej yIvIHHa’neSQo’, ‘o Qun’a’!
2 yIqelneS: ghughugh jaghlI’; nachchaj peppu’ nImuSbogh ghotpu’.
3 ghotpu’lI’ qaDmeH nab ‘ong lu’ogh; bangwI’pu’lI’ luqaDmeH QuS.
4 lujatlh: “Ha’, Sep wISangjaj; not yISra’el pong qawqa’lu’jaj!”
5 nItebHa’ QuS chaH; nIqaDmeH mab luchenmoH.
6 ‘eDom jo’ley’mey, yISma’elnganpu’, mo’av, HaghrI’nganpu’,
7 gheval, ‘amon, ‘ama’leq, velIStIynganpu’, tlhor Sungpu’ je;
8 chaH muv ‘aSur je; lot puqpu’ DeS HoS chaH.
9 tIjeyneS; mIDyanDaq ta’meylIj rurjaj. qISon bIQtIqDaq SISra’, yavIn je DajeyDI’, wanI’vam rurjaj.
10 ‘enDorDaq ghotpu’vam luQaw’lu’; puHvaD qeQ lumoj.
11 chuQunchajvaD ‘orev, Se’ev je tIrurmoHneS; Hoch che’wI’pu’chaj SebaH, tlhalmunna’ je tIrurmoHneS.
12 lujatlh ghotpu’vam: “maHvaD Qun’a’ yotlhmey DItlhapjaj.”
13 ‘o Qun’a’wI’, chaHvaD Say’qIS rutlh yIrurmoHneS; chaHvaD SuSDaq yub yIrurmoHneS.
14 ngem natlhbogh qul rurjaj; HuDmey meQbogh qul rurjaj.
15 vaj chaH tlha’meH jevbogh muDlIj yIlo’neS; chaH ghIjqu’meH vungbogh muDlIj yIlo’neS.
16 qabchaj buy’moHjaj quvHa’ghach; vaj ponglIj lunej, ‘o joH’a’.
17 reH tuHjaj ‘ej Sotjaj; webmo’ luQaw’lu’jaj.
18 vaj joH’a’ ‘oH ponglIj’e’ ‘e’ luSov ‘ej tera’ Hoch che’bogh jenwI’a’’e’ SoH ‘e’ luSov.

bom 84

1 QoQpInvaD bomvam luqon qo'raH puqloDpu’. ghIttIt lo’lu’taHvIS [bomlu’].
Dunqu’ jo’ley’’a’lIj, ‘o mangghom joH’a’!
2 joH’a’ pa’mey ‘oH qa’wIj chabal’e’. bIHmo’ vulchoH je. yInbogh Qun’a’vaD bom tIqwIj, ‘oynotwIj je.
3 vabDot ‘anmoHmeH raSmeylIjDaq juH Sam borghel; pa’ puqmeyDaj lanmeH yanwo’ Sam yatqap, ‘o mangghom joH’a’, voDleHwI’, Qun’a’wI’ je.
4 Quchqu’ juH qachlIj luDabbogh ghotpu’’e’, reH naDlIj lubomtaHvIS! SelaH
5 Quchqu’ HoSDaj DuDambogh nuv’e’. [tlhI’yon] tawmey leng neH tIqDaj.
6 baqa’ ngech lutoltaHvIS, bIQ lughItmoH. DoQmIv’a’mey buy’moHmeH SIS je.
7 ghurtaH HoSchaj; tlhI’yonDaq Hoch nuv tu’ Qun’a’.
8 ‘o joH’a’, mangghom Qun’a’, qatlhobDI’ HIQoyneS; HI’IjneS, ‘o ya’qov Qun’a’! SelaH
9 yoDmaj yIleghneS, ‘o Qun’a’; ‘atwI’’a’lI’ qab yIbejneS!
10 pa’meylIjDaq wa’ jaj qaq law’ latlh vogh wa’SaD jaj qaq puS. Qun’a’wI’ juH qach lojmIt ‘avwI’ vIgheS qaq law’ jIvvo’ jo’ley’ vIDab qaq puS.
11 jul, yoD je ghaH joH’a’’e’, Qun’a’’e’. tlhoqtlhal tur joH’a’ ‘ej quvmoH. tIgh QaQ lupabchugh nuvpu’, vaj nuvpu’vetlhvo’ pagh QaQ ‘ot.
12 ‘o mangghom joH’a’, Duvoqchugh vay’, vaj Quchqu’ vay’vetlh!

bom 85

1 QoQpInvaD bomvam luqon qo'raH puqloDpu’.
‘o joH’a’, puHlIjvaD tlhoqtlhal Daturpu’. ya’qov mIp DanobHa’pu’.
2 ghotpu’lI’ DaDIvHa’moHpu’; yemDI’, Hoch Davelpu’. SelaH
3 Hoch QeHlIj Dange’pu’; bIQay’ ‘e’ Damevpu’.
4 ghorIHqa’neS, ‘o toDmaj Qun’a’, ‘ej maHvaD belHa’ghachlIj yInge’neS!
5 reH maHmo’ bIQeH’a’? qaSDI’ Hoch puq poH QeHlIj DataHmoH’a’?
6 juyInqa’moHbe’’a’? vaj SoHmo’ Quch ghotpu’lI’.
7 pung’a’lIj gholeghmoHneS, ‘o joH’a’, ‘ej toDlIj ghonobneS.
8 Qun’a’, joH’a’ QIch vI’Ij. ghotpu’DajvaD, quvwI’pu’DajvaD roj jatlh. ‘ach Doghqa’jaj chaH.
9 ghaH vuvchugh vay’, vaj Sumbej toDDaj. vaj puHmaj Dab ngay’.
10 ghom pung’a’, vIt je; chopchuq ruv, roj je.
11 puHvo’ Hu’ vIt; chalvo’ bej ruv.
12 vay’ QaQ nobbej joH’a’ ‘ej naH vey’ lIng puHmaj.
13 ghaH nung ruv; gho’meH qamDaj, taw chenmoH.

bom 86

1 bomvam qon DawID, Qun’a’ tlhobDI’.
teSlIj yItlhe’moHneS, ‘o joH’a’, ‘ej HIjangneS, jImIpHa’mo’ ‘ej jIDo’Ha’mo’.
2 yInwIj yIchoqneS, jIquvmo’; toy’wI’lI’ yItoDneS, Duvoqmo’. Qun’a’wI’ SoH.
3 jIHvaD tlhoqtlhal yIturneS, ‘o joH’a’. qaStaHvIS jaj Hoch, SoHvaD jIjach.
4 toy’wI’lI’ qa’ yIQuchmoHneS. SoHvaD, ‘o joH’a’, qa’wIj vIpep.
5 bIQaQ, ‘o joH’a’, ‘ej bIDIvHa’moH. DurItchugh vay’, vaj vay’vetlhvaD pung’a’ law’ Datur.
6 HIQoyneS, ‘o joH’a’, qatlhobDI’. tlhoqtlhal vItlhobDI’ HI’IjneS.
7 qaSDI’ SengwIj jaj, qarIt, chojangmo’.
8 Qunpu’ jojDaq Durur pagh. ta’meylIj rurbogh ta’mey tu’lu’be’.
9 ghoS Hoch nughmey DachenmoHpu’bogh; SoHvaD tor, ‘o joH’a’, ‘ej ponglIj luquvmoH.
10 bIDun ‘ej ta’mey Dun Data’. Qun’a’ SoH ‘ej latlh pagh tu’lu’.
11 tIghlIj HIghojmoHneS, ‘o joH’a’, vaj vItlIj vIpab. tIqwIj yIwatlhmoHneS, vaj ponglIj vIvuv.
12 qatlho’meH, ‘o joH’a’, Qun’a’wI’, tIqwIj Hoch vIlo’. Hochlogh ponglIj vIquvmoH.
13 jIHvaD Dun pung’a’lIj; Se’ol jaQvo’ qa’wIj Daluppu’.
14 ‘o Qun’a’, muqaDmeH Hu’pu’ loDpu’ nguq. muHoHrup loDpu’ ral ghom ‘ej nIqelQo’.
15 ‘ach pung, tlhoqtlhal turbogh Qun’a’’e’ SoH, ‘o joH’a’. QIt bIQeHchoH ‘ej pung’a’, vIt vey’ je Daghaj.
16 HItlhe’neS ‘ej jIHvaD tlhoqtlhal yIturneS; toy’wI’lI’ yIHoSmoHneS; Dutoy’bogh be’ puqloD yItoDneS.
17 jIHvaD maQ QaQ yIta’neS. vaj wanI’vam lulegh mumuSbogh ghotpu’ ‘ej tuHchoH, choQaHpu’mo’, ‘o joH’a’, ‘ej chobaw’moHpu’mo’.

bom 87

1 bomvam luqon qo’raH puqloDpu’.
HuD quvDaq Qam veng cherpu’bogh;
2 tlhI’yon lojmIt qaq law’ Hoch ya’qov Daqmey qaq puS ‘e’ Dam joH’a’.
3 nIbopbogh mu’mey Dunqu’ lujatlhlu’, ‘o Qun’a’ veng. SelaH
4 muSuvbogh ghotpu’vaD raHav, bavel je vIqawmoH; velIStIy, tlhor, quS je tIqel. lujatlh: “pa’ boghpu’ nuvvam.”
5 tlhI’yon’e’ rIchlu’ ‘ej jatlhlu’: “‘oHDaq boghpu’ nuvvam, nuvvetlh je,” ‘oH chermo’ jenwI’’a’.
6 ghotpu’ togh joH’a’, ghItlhtaHvIS: “pa’ boghpu’ nuvvam.” SelaH
7 jatlh bomwI’pu’, mI’wI’pu’ je: “SoHDaq bIH Hoch ghItwI’meywIj.”

bom 88

1 QoQpInvaD bomvam luqon qo’raH puqloDpu’. maHa’lat le’annot lo’lu’taHvIS bomlu’. Heyman, ‘eSraH tuq, maSqIl ‘oH.
‘o joH’a’, toDwIj Qun’a’, qaStaHvIS pem, ram je SoHvaD jIjach.
2 DughoSjaj tlhobmeH QInwIj; jIjachDI’ teSlIj yItlhe’moHneS!
3 Sengmeymo’ buy’ qa’wIj ‘ej Se’ol chol yInwIj.
4 QemjIq’a’ lughIrbogh ghotpu’’e’ vItlhej net qel. HoS Hutlhbogh loD’e’ jIH.
5 HeghwI’pu’Daq vIlonlu’; molDaq Qotbogh lommey vIrur. not nuvpu’vam Daqawqa’. ghoplIjvo’ lupe’lu’chu’.
6 QemjIq ‘eSqu’Daq cholanpu’. Hurgh Daqvam ‘ej jaQ.
7 QeHlIj ‘ugh vISIQ. muQIH Hoch yu’eghmeylIj. SelaH
8 chuDpu’wI’ DaHopmoHta’. jI’upchu’ ‘e’ luDam. jISoQ ‘ej jIghoSlaHbe’.
9 pujchoH mInwIj jI’IQmo’. qaSDI’ Hoch jaj, qarIt, ‘o joH’a’; SoHvaD ghopwIj tIpep.
10 HeghwI’pu’vaD boqHarmey Data’’a’? nInaDmeH Hu’’a’ HeghwI’pu’? SelaH
11 molDaq pung’a’lIj maqlu’’a’? QIH wo’Daq vItlIj maqlu’’a’?
12 QIbDaq boqHarmeylIj luSovlu’’a’? lIjmeH puHDaq ruvlIj Sovlu’’a’?
13 ‘ach SoHvaD, ‘o joH’a’, jIjach. qaSDI’ po DughoS tlhobmeH QInwIj.
14 ‘o joH’a’, qatlh qa’wIj DawoD? qatlh jIHvo’ qablIj DaSo’?
15 jIQupDI’ vIQIHlu’ ‘ej tlhoS jIHegh; DaH raptaH ghu’. HajmoHbogh ta’meylIj vISIQ ‘ej jISot.
16 mujuS QeH’a’lIj. muQaw’ ghummeylIj.
17 qaStaHvIS jaj Hoch muDech; bIQ rur. nItebHa’ mubav.
18 bangwI’, jIlwI’ je DaHopmoHpu’. DaH wa’ jup vIghaj: QIb‘a’ ‘oH.

bom 89

1 maSqIlvam qon ‘eytan, ‘eSraH tuq.
Hochlogh joH’a’ pung’a’ vIrIch jIbomDI’. Hoch puq poHmeyvaD vIt’a’lIj vISovmoH.
2 vIjatlh: “reH pung’a’ cherlu’; chal’a’Daq vIt’a’lIj Dacher.”
3 Dajatlh: “nuv vIwIvpu’; nuvvamvaD mab vIchenmoHpu’. toy’wI’wI’, DawIDvaD jI’Ippu’: 4 “reH nortlhamlIj vIcher; qaStaHvIS Hoch puq poHmey, quS’a’lIj vIcher.”” SelaH
5 boqHarmeylIj naDjaj chal’a’, ‘o joH’a’! quvwI’ yejDaq vIt’a’lIj naDlu’jaj!
6 chal’a’Daq joH’a’, ‘Iv je lupatlhmoHlu’? Qun puqloDpu’Daq joH’a’ rur ‘Iv?
7 quvwI’ yejDaq Qun’a’ vuvqu’lu’; ghaH Dun law’ Dechbogh Hoch Dun puS.
8 ‘o joH’a’, mangghom Qun’a’, HoSghaj ‘Iv? Durur ‘Iv, ‘o joH’a’? DuDech vIt’a’.
9 lunqu’bogh bIQ’a’ Dache’; ghanchoHDI’ yu’eghmeyDaj, DaghanHa’moH.
10 raHav Datappu’; lom rur. jaghpu’lI’ DaghomHa’meH DeSlIj HoSghaj Dalo’pu’.
11 chal Daghaj; puH Daghaj je. qo’, Hoch yagh je Dacherta’.
12 chan, ‘ev, tIng je DachenmoHta’; ponglIj lunaD tavor, Hermon je.
13 DeS HoSghaj Daghaj; HoS ghoplIj; jen nIHlIj ghop.
14 quS’a’lIj qappam bIH quv’e’, ruv’e’ je. nInung pung’a’, vIt’a’ je.
15 lopmeH bey SeQ luSovchugh ghotpu’, vaj Quchqu’ ghotpu’vetlh. qablIj tamghaymo’ yIt chaH, ‘o joH’a’.
16 qaStaHvIS jaj Hoch, lop chaH; ruvlIjmo’ Hem.
17 HoSchaj ngay’ SoH; jumaSmo’ ghebmaj peplu’.
18 yoDmaj ghaj joH’a’, ta’ma’ ghaj yISra’el quvwI’’a’.
19 ben law’ quvwI’lI’vaD HaSta ngar Da’ang ‘ej Dajatlh: “nuv HoSghajvaD QaH vInobta’; ghotpu’vo’ wa’ vIwIvta’.
20 DawID, toy’wI’wI’, vISamta’; ghaHDaq watrIn SeQ vIlIchta’.
21 vaj ghaHvaD ghoplIj cherlu’; ghaH HoSmoH DeSwIj je.
22 yuqbe’ jagh; quvHa’moHbe’ jIvvo’.
23 gholpu’Daj vItap ‘ej wanI’vam tu’ ghaH. lumuSbogh ghotpu’ vImupchu’.
24 ghaH lutlhej vIt’a’wIj, pung’a’wIj je. pongwIjmo’ ghebDaj peplu’.
25 bIQ’a’Daq ghopDaj vIlan; bIQtIqmeyDaq nIHDaj ghop vIlan.
26 jIHvaD jach: “vav’a’wI’, Qun’a’wI’, toDwIj nagh je SoH.”
27 ghaHvaD ghubDaQ vImojmoH; tera’ ta’pu’’e’ ghaH potlh law’ Hoch potlh puS.
28 reH ghaHvaD pun’a’wIj vIchoq ‘ej mabwIj vIpab.
29 reH nortlhamDaj vIcher; chal’a’ jajmey rur quS’a’Daj.
30 chutwIj lulonchugh puqpu’Daj, ruvwIj vepmey lobQo’chugh,
31 rIchwInmeywIj wemchugh, jIra’DI’ pabQo’chugh,
32 vaj wemchajmo’ vIbIjmeH naQ vIlo’. yemmo’ Henjun vIlo’.
33 ‘ach ghaHvo’ punq’a’wIj vInge’Qo’ ‘ej vIt’a’wIj vImaghQo’.
34 mabwIj vIwemQo’ ‘ej wuSwIj mu’mey vIchoHQo’.
35 wa’logh quvwIjmo’ jI’Ipta’; DawID vIjatlhDI’ jInepbe’.
36 Hochlogh taH nortlhampu’Daj. taH quS’a’Daj; jul rur. ghu’vam vItu’.
37 reH cherlu’; chalDaq nguHbogh maS matlh rur.” SelaH
38 ‘ach DaH bIwoDpu’ ‘ej bIlajpu’Qo’; ‘atwI’’a’lI’ bIQeHqu’.
39 toy’wI’lI’ mab Dalajpu’Qo’; Say’qISDaq mIv’a’Daj DalammoHpu’.
40 Hoch reDmeyDaj Daghorpu’; jem’IHDajvaD pIgh DamojmoHpu’.
41 qengHoD lunIH tolbogh Hoch. ghaH luvaq jIlpu’Daj.
42 gholpu’Daj nIH ghop Dapeppu’; Hoch jaghpu’Daj DalopmoHpu’.
43 yanDaj HeH Datlhe’moHpu’; may’Daq DaQapmoHpu’be’.
44 ngay’Daj DamevmoHpu’; ravDaq quS’a’Daj Davo’pu’.
45 jajmeyDaj vaQ DangajmoHpu’; vel quvHa’ghach ‘e’ DaqaSmoHpu’ SelaH
46 qaStaHvIS poH ‘ar qaS ghu’vam, ‘o joH’a’? reH DaSo’’a’? qaStaHvIS poH ‘ar meQbogh qul rur QeHlIj?
47 ngaj poHwIj ‘e’ yIqawneS! meq qeymo’ Hoch Humanpu’ DachenmoHpu’!
48 yInbogh ‘ej not Heghbogh loD yIngu’. Se’ol HoSvo’ qa’Daj toDlaH ‘Iv? SelaH
49 joH’a’, nuqDaq ‘oH pung’a’lIj Deq’e’? DawIDvaD pung’a’vam Da’Ippu’ vIt’a’lIjmo’.
50 toy’wI’pu’lI’ luvaqlu’ ‘e’ yIqawneS, ‘o joH’a’. mutIch nughmey law’; wanI’vam SIQ tIqwIj.
51 muvaQ jaghlI’, ‘o joH’a’; yIttaHvIS ‘atwI’’a’lI’, luvaQ jaghpu’lI’.
52 Hochlogh joH’a’ quvmoHlu’jaj! qaSjaj ‘ej qaSjaj.

paq 4

bom 90

1 tlhobmeH QInvam qon moSe, Qun’a’ loD.
joH’a’, lulIghmaj SoH qaStaHvIS Hoch puq poHmey.
2 chenpa’ HuDmey ‘ej tera’, qo’ je DachenmoHpa’, Hochlogh Qun’a’ SoH.
3 Say’qISDaq loD DacheghmoH ‘ej Dajatlh: “pechegh, ‘o Humanpu’!”
4 wa’SaD DIS rur wa’Hu’ ‘e’ DaDam; ram Qu’ poH rur.
5 chaH DabI’chu’; Suchtuv lurur. po magh chu’ lurur.
6 qaSDI’ po, baQ; qaSDI’ tlhom, QaD ‘ej Hegh.
7 QeHlIjmo’ wInatlhlu’ ‘ej bIQay’DI’ maSot.
8 wemmeymaj DanuDpu’; peghmeymaj DawovmoHpu’.
9 Hoch jajmeymaj DISIQ bIQeHtaHvIS; DISmeymaj DIDormoH; tlhuH rur.
10 SochmaH DIS DISIQ; maHoSchugh, vaj chorghmaH DIS DISIQ. ‘ach vumqu’taHghach, Seng je ‘oH qubbIDchaj’e’. tugh Dor ‘ej mapuv.
11 QeHlIj HoS qel ‘Iv? Davuvlu’meH DIblIj nel QeH’a’lIj.
12 jajmeymaj DItogh ‘e’ ghoghojmoHneS, vaj tIq val wISuq.
13 yIcheghneS, ‘o joH’a’! qaStaHvIS poH ‘ar qaS ghu’vam? toy’wI’pu’lI’ tIvupneS!
14 qaSDI’ po, juyonmoHmeH pung’a’lIj yIlo’neS, vaj malop ‘ej maQuch qaStaHvIS Hoch jajmeymaj.
15 law’ jajmey wIQIHlu’taHvIS. law’ DISmey, Qugh wISIQtaHvIS. law’jaj je jajmey maQuchtaHvIS.
16 toy’wI’pu’lI’vaD ta’meylIj luleghmoHlu’jaj; puqpu’chajvaD ngay’lIj leghmoHlu’jaj.

bom 91

1 jenwI’’a’ Daq pegh Dabchugh vay’, vaj HoSghajwI’’a’ QIbDaq taH vay’vetlh.
2 joH’a’vaD vIjatlh: “lulIghwIj, jem’IHwIj je, Qun’a’wI’, qavoq.”
3 vonwI’ janvo’, HeghmoHbogh rop’a’vo’ je DutoD.
4 DuvelmeH bomeyDaj lo’; telDu’Daj bIngDaq lulIgh DaSam. yoD, may’ Sut je ‘oH vIt’a’Daj’e’.
5 qaSDI’ ram DughIjbe’ HajmoHwI’; qaSDI’ pem DughIjbe’ puvbogh naQjejHom.
6 DughIjbe’ QIbDaq ghachbogh rop’a’; DughIjbe’ DungluQ QIH.
7 chaq SoH retlhDaq pum wa’SaD ghot, SoH nIHDaq pum wa’netlh, ‘ach Ducholbe’ wanI’vam.
8 mInlIj tIpoSmoH neH; jIvvo’ popqoq yIlegh.
9 joH’a’ Daq DaDabmo’—jenwI’’a’, lulIghwIj—
10 pagh mIgh DaSIQ; jo’ley’lIj cholbe’ rop’a’.
11 SoHmo’ HoSDo’Daj ra’. vaj Dat Du’av.
12 nIqengmeH ghopchaj lo’, vaj nagh mupbe’ qamlIj.
13 ghotI’’a’, tar ghargh je Dagho’; ghotI’’a’ Qup, wam je DabeQmoH.
14 “mumuSHa’taHmo’ ghaH vItoD; vIQan, pongwIj Sovmo’ ghaH.
15 murItDI’, vIjang; SotDI’, vItlhej; vItoD ‘ej vIquvmoH.
16 vIyonmoHmeH yIn nI’ vInob ‘ej toDwIj vIleghmoH.”

bom 92

1 lojmItjajvaD bomvam bomlu’.
joH’a’ tlho’lu’DI’, QaQ wanI’vam. ponglIj naDlu’DI’, QaQ wanI’vam, ‘o jenwI’’a’.
2 qaSI’ po, pung’a’lIj maqlu’; qaSDI’ ram, vIt’a’lIj maqlu’.
3 HurDagh, tIngDagh je lulo’lu’; Supghew lo’lu’.
4 ‘o joH’a’, choQuchmoHpu’ ta’lIjmo’; jIbom ghoplIj ta’meymo’.
5 Dunqu’ ta’meylIj, ‘o joH’a’! bIQubchu’!
6 SovlaHbe’ loD QIp; wanI’vam yajlaHbe’ qoH.
7 nom nenchoH magh lurur jIvvo’pu’; chep Hoch mIghwI’pu’. ‘ach reH QIH ‘oH Sanchaj’e’.
8 ‘ach reH bIjen, ‘o joH’a’.
9 jaghlI’ tIqelneS, ‘o joH’a’; jaghlI’ luQaw’lu’ ‘e’ yIqelneS; ghomHa’ mIghwI’pu’.
10 ‘ach ghebwIj Dapeppu’; tangqa’ rur. jIHDaq watrIn baQ DalIchpu’.
11 jaghwI’ lujeylu’ ‘e’ lulegh mInwIj; Hu’bogh jIvvo’ lujeylu’ ‘e’ luQoy teSwIj.
12 chep quvwI’pu’; ghaptal Sor lurur. leva’non Sor’a’ lurur.
13 joH’a’ juH qachDaq lupochlu’; Qun’a’ma’ pa’meyDaq chep.
14 qanDI’, naH lulIngtaH; reH buy’moH vIychorgh ‘ej SuDqu’.
15 QaQ joH’a’ ‘e’ lumaq. naghwIj ‘oH; ruv ‘en ghajbe’.

bom 93

1 che’ joH’a’; ngay’ mop tuQ. joH’a’ qogh ‘oH HoS’e’. HISlaH, qo’ cherlu’; not vIHmoHlu’.
2 ben law’ quS’a’lIj cherlu’; poH Hayvo’ SoH.
3 peppu’ SoDmey, ‘o joH’a’; ghoghchaj lupeppu’ SoDmey; yu’eghmeychaj peppu’ SoDmey.
4 jenqu’bogh joH’a’ HoSghaj law’ tuDbogh bIQmey HoSghaj puS; bIQ’a’ yu’eghmey HoSghaj puS!
5 vepmeylIj luvoqlaHlu’; reH juH qachlIjDaq mIt quv, o joH’a’.

bom 94

1 ‘o joH’a’, noD Qun’a’, noD Qun’a’, yIbochneS!
2 yIHu’neS, ‘o tera’ noHwI’; nguqHa’wI’vaD popqoqDaj yInobneS!
3 ‘o joH’a’, qaStaHvIS poH ‘ar lop jIvvo’pu’? qaStaHvIS poH ‘ar lop jIvvo’pu’?
4 mu’mey nguq jatlh; mIy Hoch mIghwI’pu’.
5 ghotpu’lI’ tap, ‘o joH’a’; quHlIj luQIH.
6 Heghpu’bogh loD be’nal, nov je luHoH. Heghpu’bogh loD puq luchot.
7 lujatlh: “leghbe’ joH’a’; jembe’ ya’qov Qun’a’.”
8 peyaj, ‘o ghotpu’ Doghqu’! qoHpu’, ghorgh Suval?
9 Qoybe’’a’ teS chenmoHwI’? leghbe’’a’ mIn chenmoHwI’?
10 nughmeyvaD Sun ghojmoH; qunbe’’a’? loDvaD Sov ghojmoH.
11 loD buSHachmey Sov joH’a’; vI’laSHom neH lurur.
12 nuvvaD Sun DaghojmoHchugh, ‘ej nuvvvaD chut’a’lIj DaghojmoHchugh, vaj Quchqu’ nuvvetlh.
13 qaSDI’ Seng jajmey, DaleSmoH; ghIq jIvvo’ vonmeH QemjIq ghawlu’.
14 ghotpu’Daj lonQo’ joH’a’; quHDaj woDQo’.
15 quvwI’ chegh ruv; lutlha’ tIgh QaQ pabwI’pu’.
16 jIHvaD jIvvo’pu’ qaDmeH Hu’ ‘Iv? jIHvaD mIghwI’pu’ qaDmeH Qam ‘Iv?
17 muQaHbe’ joH’a’ net jalchugh, vaj tugh mol tam Dab qa’wIj.
18 vIQub: “tang qamwIj.” ngugh muQammoH pung’a’lIj, ‘o joH’a’.
19 law’DI’ tIq’wIj Sengmey, qa’wIj DaQuchmoH ‘ej Dabaw’moH.
20 DuboqlaH’a’ quS’a’ mIgh? ruv ‘en chenmoHmeH chut lo’.
21 quvwI’ luHoHmeH ghom chaH; ‘Iw chun luqIch.
22 ‘ach jem’IHwIj mojpu’ joH’a’; lulIghwIj nagh mojpu’ Qun’a’wI’.
23 ruvchaj ‘enmo’ chaH DIlmoH; ta’meychaj mIghmo’ chaH Sang. chaH Sang joH’a’, Qun’a’ma’.

bom 95

1 Ha’, joH’a’vaD mabomjaj; toDmaj naghvaD majachjaj!
2 wItlho’meH qabDaj wIcholjaj; wInaDmeH mabomjaj ‘ej majachjaj!
3 Qun’a’ Dun ghaH joH’a’’e’; voDleH Dun ghaH; Hoch Qunpu’ moch ghaH.
4 ghopDajDaq bIH wutlhmey jaQ’e’; HuDmey jen ghaj je.
5 bIQ’a’ ghaj, chenmoHpu’mo’. puH QaD chenmoHpu’ ghopDaj.
6 Ha’, matoy’jaj ‘ej matorjaj; joH’a’, chenmoHwI’ma’vaD qIvmaj wISIHmoHmaj.
7 Qun’a’ma’ ghaH ‘ej yotlhDaj ghotpu’ maH; ghopDaj DI’raqmey maH. DaHjaj ghoghDaj boQoychugh,
8 tIqraj tIletmoHQo’; merI’vaDaq wanI’ rurbe’jaj. maSSe DebDaq wanI’ rurbe’jaj.
9 ngugh mutlhu’moH no’ra’ ‘ej muwaH, ‘ach ta’meywIj leghpu’.
10 qaStaHvIS loSmaH DIS, puq poHvetlh vImuS ‘ej vIjatlh: “Der ghotpu’vam tIq ‘ej tIghwIj luSovpu’be’.”
11 vaj jIQeHmo’ vI’Ip: “leSmeH DaqwIj lu’elbe’.”

bom 96

1 joH’a’vaD bom chu’ yIbom; joH’a’vaD yIbom, tera’ Hoch!
2 joH’a’vaD yIbom; pongDaj yIquvmoH; Hoch jaj toDDaj yIrIch.
3 nughmeyDaq ngay’Daj yImaq; Hoch ghotpu’Daq ta’mey Dun tImaq!
4 Dun joH’a’ ‘ej naDlu’chu’; Hoch Qunpu’ moch ghaHmo’ vuvlu’.
5 lo’laHbe’bogh latHommey bIH Hoch ghotpu’ Qunmey’e’ ‘ach chal chenmoH joH’a’.
6 batlh, ngay’ je ghaj; qachDaj quvDaq ‘oH HoS ‘IH’e’.
7 joH’a’vaD, ‘o ghotpu’, joH’a’vaD ngay’, HoS je tInob!
8 joH’a’vaD ngay’’e’ qotlhbogh pongDaj yInob; nob yImuch ‘ej pa’meyDaj yI’el!
9 'IHqu'mo' quvDaj joH'a' yInaD; ghaHmo’ yIQom, tera’ Hoch!
10 nughmeyDaq yIjatlh: “che’ joH’a’! HISlaH, tera’ cherlu’; not vIHmoHlu’. ghotpu’ noHmeH ruv lo’.”
11 Quchjaj chal; lop jaj puH. jachjaj bIQ’a’, Hoch DebmeyDaj je.
12 lopjaj yotlh, Hoch Debmey je. vaj bom Hoch ngem Sor Quchmo’.
13 ghu’vam tu’ joH’a’. ghoS. tera’ noHmeH ghoS. qo’ noHmeH ruv lo’; ghotpu’ noHmeH vIt’a’Daj lo’.

bom 97

1 che’ joH’a’; lopjaj tera’! Quchjaj bIQ’a’ HeHmey law’!
2 luDech ‘engmey Hurgh; quS’a’Daj qappam bIH ruv’e’, quv’e’ je.
3 ghaH nung qul ‘ej Dat gholpu’Daj meQ.
4 qo’ luwovmoH pe’bIlDaj; legh puH ‘ej Qom.
5 HuD lutetlu’ ‘e’ tu’ joH’a’; req lurur. ghu’vam tu’ tera’ naQ joH’a’.
6 ruvDaj lumaq chal; ngay’Daj lulegh Hoch ghotpu’.
7 tuHchoH mIllogh toy’bogh ghot’e’; lo’laHbe’bogh latmo’ mIy. ghaH yItoy’, Hoch Qunqoqpu’!
8 Qoy tlhI’yon ‘ej Quch; lop yeHu’Da puqbe’pu’, yojmeylIjmo’, ‘o joH’a’.
9 ‘o joH’a’, tera’ HochDaq jenwI’’a’ SoH. SoH Dun law’ Hoch Qun Dun puS net Dam.
10 ‘o joH’a’ lumuSHa’bogh ghotpu’, mIghwI’ yImuS! quvwI’pu’Daj yIn choq. jIvvo’pu’ ghopvo’ lup.
11 quvwI’vaD tamghay pochlu’; Quch tIgh QaQ pabwI’.
12 joH’a’mo’ peQuch, ‘o quvwI’pu’; pongDaj quv yItlho’!

bom 98

1 bom
joH’a’vaD bom chu’ yIbom, ta’mey Dun ta’ta’mo’! ghaHvaD toD DIghmeH nIHDaj ghop, DeSDaj quv lo’ta’.
2 toDDaj SuvmoHta’ joH’a’; ruvDaj ‘angta’ ‘ej ghu’vam lutu’ nughmey.
3 yISra’el tuqvaD pung’a’Daj, vIt’a’Daj qawpu’. Qun’a’ma’ toD luleghpu’ Hoch tera’ HeHmey.
4 joH’a’vaD peIjach, tera’ Hoch; penaD ‘ej pelop ‘ej pebom!
5 joH’a’ bonaDmeH tIngDagh yIchu’; tIngDagh yIchu’ ‘ej ‘IngSav yIbom!
6 voDleHvaD, joH’a’vaD SubommeH nItlh gheb, buq’ach je tIchu’!
7 jachjaj bIQ’a’, Hoch DebmeyDaj je; jachjaj qo’, nuvmeyDaj je!
8 ‘evjaj bIQtIq; nItebHa’ bomjaj HuDmey!
9 ghu’vam tu’jaj joH’a’, tera’ noHmeH ghoSmo’. qo’ noHmeH quv lo’; ghotpu’ noHmeH ruv lo’.

bom 99

1 che’ joH’a’; jeljaj ghotpu’! qeruv quS’a’Daq ba’; Qomjaj puH!
2 tlhI’yonDaq Dun joH’a’; ghaH Dun law’ Hoch ghotpu’ Dun puS.
3 ghIjbogh ponglIj Dun lunaDjaj! quv ghaH!
4 yoj muSHa’ voDleH HoSghaj. ruv Dacherpu’; ya’qovDaq yoj, quv je Data’pu’.
5 joH’a’, Qun’a’ma’ yIDunmoH; qam quSDaj yInaD! quv ghaH!
6 maqleghpu’Daj chaH moSe, ‘aHeron je. pongDaj rItbogh wa’’e’ ghaH Semu’el’e’. joH’a’ lurIt ‘ej jang ghaH.
7 ‘eng tutDaq chaHvaD jatlh; chaHvaD chut, rIchwIn nob ‘ej pab chaH.
8 ‘o joH’a’, Qun’a’ma’, Dajang; chaHvaD DIvHa’moHbogh Qun’a’ SoH ‘ach ta’meychaj mIghmo’ bInoD.
9 joH’a’, Qun’a’ma’ yIDunmoH ‘ej HuDDaj quvDaq yInaD, quvmo’ joH’a’, Qun’a’ma’!

'ay' 110

mughwI': Kyle Dillon

1 DavID bom.
joHwI'vaD jatlh joH'a': jIH nIHDaq yIba', qamDu'lIj bIngDaq jaghpu'lI' vIlanpa'.
2 tlhI'yonvo' naQlIj HoSqu' ngeH joH'a'.
jaghpu'lI'Daq yIche'!
3 ta'DI' WoQlIj jaj much'eghchu' chuDlI' Sut quv tuQvIS
po chorvo' SoHvaD ghaH QuptaHghachlIj pobIQ'e'
4 'Ipta' joH'a' 'ej yablIj choHbe': reH melHI'tlheDeq 'obe'Daq chIrghpIn SoH.
5 jIHlIj niHDaq ba' joH'a'; qaSDI' QeH'a'wIj jaj ta'pu' ghorchu'.
6 SepmeyDaq yoj tur, ghaHmo' buy'moH lommey; puHDaq vItlh DevwI'pu' ghorchu'.
7 bIQtIQHomvo' taw retlhDaq tlhutlh; vaj nachDaj pep.

'ay' 117

mughwI': Joel Anderson

joH'a' yInaD Hoch qorDu'pu'
yIquvmoH Hoch ghotpu'
numuSHa'qu'mo'
'ej reH taHtaH vItDaj.

joH'a' yInaD !

'ay' 122

"joH'a' juHDaq maghoS" mujatlh chaH jIQuchDI'

yeru'Sala'yIm lojmItmeywIjDaq qamDu'maj Qamjaj

veng chenta' yeru'Sala'yIm 'e' Subqu'ta'

pa'Daq ghoS qorDu'pu' chaH joH'a' qorDu'pu''e' joH'a' pongDaq tlho'laHmo'

noHghach quS'a'mey cherta' 'e' quS'a'meyvam ghaj David juH

yeru'Sala'yIm rojvaD yItlhob : nImuSHa'taH 'e' cheptaH

roj ngaSjaj qachlIj 'ej cheptaHghach ngaSjaj juH'a'meylIj

loDnI'pu'wI'vaD juppu'wI'vaD je DaH "roj DangaSjaj" vIjatlhtaH

joH'a' juHmo' QaQtaHghachlIj vInej


1 "joH'a' juHDaq maghoS" mujatlh chaH jIQuchDI'

2 yeru'Sala'yIm lojmItmeywIjDaq qamDu'maj Qamjaj

3 veng chenta' yeru'Sala'yIm 'e' Subqu'ta'

4 pa'Daq ghoS qorDu'pu' chaH joH'a' qorDu'pu''e' joH'a' pongDaq tlho'laHmo'

5 noHghach quS'a'mey cherta' 'e' quS'a'meyvam ghaj David juH

6 yeru'Sala'yIm rojvaD yItlhob : nImuSHa'taH 'e' cheptaH

7 roj ngaSjaj qachlIj 'ej cheptaHghach ngaSjaj juH'a'meylIj

8 loDnI'pu'wI'vaD juppu'wI'vaD je DaH "roj DangaSjaj" vIjatlhtaH

9 joH'a' juHmo' QaQtaHghachlIj vInej
Category: Appearance    Latest edit: 29 Apr 2022, by KyleDillon    Created: 05 Jun 2019 by MelanieRoney
History: r15 < r14 < r13 < r12 - View wiki text
 
The Klingon Language Wiki is a private fan project to promote the Klingon language. See Copyright notice for details.