Epistle to the Hebrews

Translated by Ester Lüken from a multitude of English, German and Swedish translations, chiefly King James' Version, Neuer Genfer Übersetzung and Svenska Kyrkobibeln 1917.

'ay' wa'

1) tuch rItwI' lo'taHvIS, pa'logh roD 'ej jaS no'ma'vaD jatlhpu' Qun'a'.

2) DaH, qaStaHvIS jajmey Qav, puqloDDaj lo'taHvIS maHvaD jatlhpu'. Hoch Dochmey HevmeH puqloD Sugh. qo' chenmoHDI' Qun'a' tlhej puqloD.

3) Qun'a' ngay' wewchu' puqloD, 'ej Qun'a' DI'on 'oSchu'. mu' HoSghaj lo'taHvIS qo' naQ taHmoH. mayemmo' nuSay'moHta' ghaH'e', ghIq DungDaq Dunqu'wI' nIHDaq ba'pu'.

4) quv Qun'a' QumwI'pu' 'ej quvqu' puqloD. jen QumwI'pu' pongmey 'ej jenqu' puqloD pong.

5) 'op ret ngIq QumwI'vaD jatlh'a' Qun'a': {puqloDwI' SoH. DaHjaj choboghpu'}? 'ach {vavDaj jIH, 'ej puqloDwI' ghaH}?

6) 'ej qo'Daq ghubDaQ lIH 'e' qelbogh ghItlhDaq jatlh: {ghaH tlhop peSIH'egh, Hoch Qun'a' QumwI'!}

7) QumwI''e' qelbogh jatlh: {QumwI'DajvaD SuS'a' mojmoH, 'ej toy'wI'DajvaD qul mojmoH.}

8) 'ach puqloD'e' qelbogh jatlh: {reH taH quS'a'lIj, 'o Qun'a'. ruv 'oH, woQlIj Degh'e'.

9) ruv DamuSHa'mo', 'ej vay' QIHlu' 'e' DamuSmo', 'o Qun'a', DuQuchqu'moHta' QunlI', 'ej chuDlIj DevwI' Dunumta'.}

10) jatlh je: {joH, qa'vam yav qappam Dajom, 'ej qo'mey jen chenmoH ghopDu'lIj.

11) ragh bIH, 'ach bItaH SoH. ngo'choH bIH; Sut Qop lurur.

12) DawolmoH; ngop wolmoHbogh ghot'e' DaDa, 'ej lutamlu'. 'ach bIchoH'eghbe' SoH, 'ej Dorbe' DISmeylIj.}

13) 'op ret ngIq QumwI'vaD jatlh'a' Qun'a': {wej qamDu'lIj bIngDaq jeghpu'lI' vIlanchugh, jIH nIHDaq yIba'!}

14) ghobe'. toybogh qa' chaH, QumwI''e'. QumwI' ngeH Qun'a', nuv'e' 'opleS toDlu'bogh toy'meH chaH.

'ay' cha'

1) vaj QIn wIQoy'pu'bogh wIbuSnISchu'. wIqImbe'chugh, vIt wIchIlmeH Qob wIbam.

2) taH chut'e' je maqbogh QumwI', 'ej chutvam bIvchugh qoj buSHa'chugh vay', bIj mIt Hev ghaH.

3) DaH toDmeH QIn le' wIbuSHa'chugh, chay' manargh? QInvam vep tagh joH'e', ghIq maHvaD maq jantor'e' Qoy'pu'bogh ghaH.

4) QInvam woqmeH maQmey, boqHarmey, ta'mey ngar je ta' Qun'a'. qa'a' quv nupeSqang je.

5) SIbI'Ha' SaHchoHbogh qo' mamaq. qo'vetlh che'meH QumwI' Sughbe' Qun'a'.

6) ghItlhDaq nguH vay', jatlhtaHvIS: {nuv nuq? qatlh DaSaH? nuv puqloD nuq? qatlh DaQorgh?

7) poH ngaj ghaH DaquvHa'moH, QumwI' bIngDaq DalumoHtaHvIS. 'a ghIq ghaHvaD ngay' quv je Danob, 'ej Hoch'e' chenmoHpu'bogh ghopDu'lIj joH DamojmoH.

8) qamDu'Daj bIngDaq Hoch Dalan.} ghaHvaD Hoch joH mojmoHmo' Qun'a', pagh chuv tu'lu' che'be'bogh ghaH. 'ach wej Hoch che' ghaH 'e' wIlegh.

9) 'ach poH ngaj QumwI' bIngDaq lumoHpu'bogh yeSuS'e' wIleghbej. bepDajmo' HeghDajmo' je, quv ngay' je ghajbogh ghaH wIlegh. Qun'a' pungmo' Hoch nuvvaD Heghpu'.

10) Hoch mung ghaH, 'ej Hoch chIl ghaH je, Qun'a''e'. puqDajvaD law' batlhDaj nob neHDI', bepmey lo'taHvIS toDwI'chaj Dubchu'. Qun'a'vaD mIt nabvam.

11) wa' vav lughajmo' quvmoHwI' quvwI'pu' je, loDnI' be'nI' ghap per yeSuS 'ej tuHbe',

12) jatlhtaHvIS: {loDnI'pu'wI'vaD ponglIj vImaq. muDechtaHvIS vInDa'wI' qanaD.}

13) jatlhtaHvIS je: {ghaH vIvoq vIneH}, jatlhtaHvIS je: {naDev jISaH, 'ej naDev SaH puqpu''e' munobpu'bogh Qun'a'.}

14) 'oynot 'Iw je yughmo' puqpu' porghmey, 'oynot 'Iw je yughbogh porgh'e' laj ghaH. vaj HeghDajmo' Hegh HoS ghajbogh veqlargh'e' Qaw'laH.

15) qaStaHvIS yInchaj naQ Hegh ghIjbogh Hoch toy'wI''a''e' tlhabmoHlaH je.

16) teH: QumwI' QaHbe', 'ach 'abraham puqpu' QaHbej.

17) vaj loDnI' be'nI' je rurnISchu' ghaH, noDHa'bogh maqlegh'a' matlh mojmeH 'ej Qun'a' toy'laHmeH, yempu'bogh nuvpu''e' Qun'a' je rojlaHtaHvIS.

18) bechpu'mo' 'ej tlhu'pu'mo' ghaH'e', tlhu'bogh nuv QeHlaH.

'ay wej

1) vaj yeSuS yIbuS, loDnI' quv be'nI' quv je rItbogh Qun'a'. lalDanmaj Duy maqlegh'a' je ghaH, yeSuS'e'.

2) reH matlh ghaH 'ej SughwI'Daj toy'. moySeS rur. {matlh moySeS 'ej Qun'a' tuq naQ toy'.}

3) quv moySeS 'ej quvqu' yeSuS, jasHa' quv qach 'ej quvqu' qach mutlhwI'.

4) mutlhwI' ghaj Hoch qach, 'ach Hoch chenmoHta' Qun'a'.

5) teH: {matlh moySeS 'ej Qun'a' tuq naQ toy'.} toywI' matlh ghaH, SIbI'Ha' maqbogh QIn nguHmeH.

6) 'ach puqloD matlh joH matlh je ghaH yeSuS'e'. tuqDaj maHmabaw'taHchugh 'ej matulmo' maHemtaHchugh.

7) 'e'mo' jatlh qa'a' quv: {DaHjaj ghoghDaj boQoy'chugh,

8) tIqraj yIletmoHQo'! DebDaq no'ra' yIrurQo'! qaStaHvIS poHvetlh, lotlh 'ej muQeHmoH chaH.

9) qaStaHvIS loSmaH DIS ta'meywIj jantor chaHpu'.'ach muqaD 'ej mu'ol,

10) vaj muberghmoH puqpoHvetlh. vIjatlh: {reH tIqrajDaq QaghtaH, 'ej tIghmeywIj Sovbe'.}

11) tagha' jIQeH 'ej jI'Ip, jatlhtaHvIS: {not rojwIj bo'el!} }

12) vaj peqIm, lodnI'wI' be'nI'wI' je! voqbe'bogh tIqDu' mIgh yIghajQo', 'ej yInbogh Qun'a' yIlonQo'!

13) pagh tojlu'meH 'ej yemmeH pagh, jatlhlaHtaHvIS {DaHjaj}, Hoch jaj petungHa'chuq!

14) mabaw'taHchugh 'ej not 'e' mamevchugh, matay' maH 'IHrIStoS je.

15) ghItlh wIQoy'qa': {DaHjaj ghoghDaj boQoy'chugh, tIqraj yIletmoHQo'! qaStaHvIS poHvetlh, lotlh 'ej muQeHmoH chaH.}

16) Qun'a' ghogh Qoy'pu' 'Iv, 'ach lotlh? maSIrvo' mejpu'bogh, moySeS Devbogh Hoch chuDpu''e' chaHbe''a'?

17) qaStaHvIS loSmaH DIS Qun'a' QeHmoH 'Iv? yempu'mo' DebDaq yInDaj ghanglu'bogh nuvpu''e' chaHbe''a'?

18) 'Ivmo' 'Ip Qun'a', jatlhtaHvIS: {not rojwIj 'el!}? Qun'a' Qoy'Qo'bogh nuvpu''e' chaH.

19) voqbe'mo' 'ellaHbe' chaH 'e' wIlegh.