First Epistle of Peter

The First Epistle of Peter is the 60th book of the Protestant Bible.

This page shows a translation from Greek undertaken with the help of an interlinear text by Jack Bradley in 2020.

pe'tlhoS nav QIn wa'DIch

'ay' wa'

1pe'tlhoS, yeSu'a QIStoS Duy, jIH. pontoS, ghalatIya', qappaDoqya', 'aSya', bItnIya' je Dabbogh novpu' rurwI'vaD QInvam vIngeH. ghotpu'vam wIvta' joH'a'. 2chaH wIvmeH leSSovDaj lo' joH'a' 'ej yeSu'a QIStoSvaD chaH matlhmoHmeH quvmoHbogh qa''a' ta'mey lo'. nachDu'chajDaq QIStoS 'Iw ghaypu': pung'a', roj je boSIQqu'jaj. 3joH'a', yeSu'a QIStoS vav'a', naDlu'jaj. pung'a'Dajmo' nuboghqa'moHta' 'ej nutulqa'moHchu'meH yeSu'a QIStoS HeghHa'moHta' 4'ej maHvaD qengHoD 'atmoH. not ragh qengHoDvam. not nItHa'choH. not ngab. chal'a'Daq tlhIHvaD 'oH pollu'lI'. 5tlhIHvaD pollu'lI', Suvoqmo'. lIyoD joH'a' HoS 'ej bov Qav tlhIHvaD toD'a'Daj 'ang. 6Hochvammo' Sulopqu' 'a DaH chaq qaDmey Sarmo' SubechnIS. 7SuHarbej 'e' botobmeH qaDmey boSIQ—HarmeH laH lo'laH law' qol'om lo'laH puS. qol'om'e', nItmoH qul 'a ngablaH—bonaDlu' 'ej ngay' boSuq 'ej boquvmoHlu' 'ang'eghDI' yeSu'a QIStoS. 8ghaH boleghpu'be' 'a bomuSHa'; vabDot DaH boleghbe' 'a bovoq 'ej SuQuchqu'chu'. 9HartaHghachraj gher'ID boSIQ: qa'meyraj toD'a'. 10pung'a' boHevpu'bogh lurIchta' joH'a' Duypu'. toD'a'vam'e' lupaQqu'ta' je. 11toDwI''a' bepmey, cho'bogh ngay' 'aqta' QIStoS qa''a'; Dochmeyvam rarbogh poH, wanI' je yaj 'e' lunID Duypu'. 12lItoy' chaH; toy''egh 'e' qa' chaHvaD 'e' 'anglu', Dochmey 'otHa'bogh vep QaQ jatlhta'DI'. tlhIHvaD vepvam QaQ ja' qa''a' quv 'ej qa''a' quv'e', chalvo' ngeHlu'ta'. vabDot Dochmeyvam leghmeH boH HoSDo'pu'. 13vaj yabDu'raj tIghuHmoH 'ej qa'meyraj tIjotmoH. paw'ta'DI' yeSu'a QIStoS, pung'a' qemta'; pung'a'vammo' petul. 14lobbogh puqpu' tIDa. SujIvtaHvIS lIDev tlhu'moHwI'mey mIgh; DaH lIDev tlhu'moHwI'meyvetlh 'e' yIchaw'Qo'. 15quv rItwI'ra'; jaSHa' pequv'eghmoH. 16mu'meyvam lughItlhlu'ta': «pequv'eghmoH jIquvmo' jIH.» 17vav'a'vaD Sujatlh 'ej maychu'taHvIS ngIq ta'mey noH ghaH vaj qo'Daq tlhIHtaHvIS, batlh yIvuv. 18no'ra'vo' yInmeH Ho'DoS bo'at 'ej yInmeH Ho'DoSvetlh qeyvo' botoDlu'meH qol'om, SIrlIy, latlh ru'wI'mey je lulo'lu'pu'be' 'e' boSov. 19lItoDmeH 'IwDaj lo'laHqu' lo'ta' QIStoS—Duy', 'oDtu' je Hutlhbogh DI'raq puq'e' rur. 20chenpa' qo', wIvlu'ta' 'a qen tlhIHvaD narghta'. 21ghaHmo' joH'a' bovoq. QIStoS HeghHa'moHta' ghaH 'ej QIStoSvaD ngay' nobta' ghaH. 'ej vaj joH'a' bovoq 'ej lItulmoH joH'a'. 22vIt bolobta'mo', SuSaHchuqchu'meH Suwatlh'eghmoHta'. SumuSHa'qu'chuqmeH tIqDu'raj bolo'. 23Suboghqa'pu' 'e' yIqaw. lIboghqa'moHta' joH'a' QIn ru'Ha'; qaytu' ru'Ha' qa'. 24peqaw: «magh lurur Hoch ghotpu' 'ej yotlh 'InSongmey rur ngay'chaj; QaDchoH magh 'ej pum 'InSongmey 25'a Hochlogh taHtaH joH'a' QIn.» 'ej tlhIHvaD QInvam maqlu'ta'.

'ay' cha'

1vaj pemIghHa''egh 'ej peyuqQo' 'ej petlhoch'eghQo' 'ej peghalQo' 'ej petIchQo'. 2ghupu' chu' tIDa; lInenmoHmeH toD'a'raj qa' nIm yIneHqu', 3joH'a' ta'mey QaQ boSIQpu'chugh. 4ghaH bocholtaHvIS yInbogh nagh tIrur. lIlajQo' jubbe'wI' 'a lIwIvta' joH'a' 'ej Sulo'laHqu' 'e' Dam ghaH—5yInbogh tIrur. qa' chIrgh chenmoHlu'meH bolo'lu'. maqlegh 'ISletlh bomuv 'ej joH'a'vaD vanmey mIt bonob, yeSu'a QIStoSmo'. 6ghItlhmey quvDaq mu'meyvam tu'lu': «peqIm! tlhI'yon HuDDaq nagh lo'laH vIlanta'. qappam nagh lo'laHqu' 'oH 'ej not tuHchoH 'oH wuvbogh nuv'e'. 7HarwI'vaD lo'laHqu' naghvam. 'a HarQo'wI'vaD QInvam'e' qonlu'ta': «qappam nagh mojpu' nagh lulajHa'pu'bogh mutlhwI'pu'.» 8'ej QInvam qonlu'ta' je: «ghotpu' tangmoHbogh nagh'e', ghotpu' pummoHbogh nagh'e' je rur.» tang, QIn lulobHa'mo'—Sanna'chaj 'oH Sanvam'e'. 9'a nugh wIvlu'ta'bogh tlhIH. chuQun maqlegh 'ISletlh bomuvta'. nugh quv rewbe' tlhIH. joH'a' qengHoD lo'laHqu' tlhIn tlhIH. ghaH bonaDmeH QIbmeyvo' lIlelta' 'ej tamghayDaj DunDaq lIlanta'. 10ben law' nugh wIvlu'ta'bogh tlhIH 'a DaH joH'a' nugh tlhIH. ben law' pung boHevpu'be' 'a DaH pung boHevpu'. 11juppu'wI', SatungHa': «SuchtaHwI', novpu' je tlhIHtaHvIS qa'meyraj QojtaHbogh porgh yemmey'e' tI'om. 12ta'meyraj QaQ tu'meH batlh pevangtaH, HarQo'wI'pu' botlhejtaHvIS, vabDot lItIchchugh. vaj nuSuchDI' joH'a', ghaH lunaD. 13joH'a' bobelmoHmeH Hoch qo' woQ yIlob. voDleH woQ yIlob 14qoj qumwI'pu' tIlob. ta'mey mIgh turwI'pu' bIjmeH 'ej ta'mey quv turwI'pu' naDmeH chaH ngeHta' voDleH. 15DoghwI'pu' jIv botammoHmeH batlh Suvang neH joH'a'. 16petlhabtaH 'a ta' mIgh boSo'meH tlhabraj yIlo'Qo'; joH'a' toy'wI''a'pu' tIgheS. 17batlh Hoch yIvuv. HarwI'pu' 'ISletlh yImuSHa'. joH'a'vaD penguqHa''eghmoH. voDleH yIquvmoH. 18'o toy'wI'pu', pIn'a'pu'ra' tIlob, chaH bovuvtaHvIS. QaQwI'pu', naHHa'wI'pu' je neH tIlobQo'; qejwI'pu' tIlob je. 19quv bepmey mayHa' SIQwI', joH'a' qelmo' ghaH. 20'ach chay' SuboQ'egh, yemrajmo' bIj boSIQDI'? 'ach batlh Suvangmo' bIj boSIQ net jalchugh, quv ta'vam 'e' Dam joH'a'. 21ngoQvamvaD borItlu'ta', tlhIHvaD bechpu'mo' je QIStoS. ghaH boDameH ghantoH gheSta'. 22yempu'be' 'ej nujDajvo' ghoS pagh De' ngeb.» 23pe'vI tIchlu'DI', noDQo'. bechDI', buQQo'. ghaH rang noHwI' may 'e' chaw'. 24 «yemmeymaj qengta'.» ta'vam turmeH me'cheDDaq porghDaj lo'ta'. maHvaD Heghpu'wI' Dam yem 'e' qaSmoHmeH 'ej quvvaD mayInmeH ta'vam turta' ghaH; «lIvorpu' HampongmeyDaj.» 25peqaw: «Daqchaj Sovbe'bogh DI'raq borur» 'ach DaH DI'raq jIHwI'—qa'meyraj 'avwI'—bocheghta'.

'ay' wej

1be'nalpu', jaSHa' loDnalpu'ra' tIlob. QIn'a' luHarQo'chugh, chaq HarchoHmoH vangmeH Ho'DoSraj; mu'meyraj qa'. 2Suwatlh 'ej Suvuv 'e' lutu'bej. mayqarmey, qol'om, paHmey joq neH bIHbe'jaj DI'onmeyraj 'IH'e'. 4'a DI'onmey raj 'IH bIHjaj tIq qoDraj'e'. naHHa'bogh qa' tam 'oH DI'on 'IH mung'e' 'ej lolaHqu' Dochvam 'e' Dam joH'a'. 5peqaw: pa'logh jaSHa' tuQ'eghmoH joH'a' voqtaHbogh be'pu' quv'e'. loDnalpu'chaj tlhIn lob. 6jaSHa' 'avraHam lob Sara 'ej ghaHvaD joH pong. puqbe'pu'Daj bomojpu', pe'vIl batlh Suvangchugh. 7loDnalpu', jaSHa' be'nalpu'ra'vaD penaHHa''eghmoH; chaHvaD qoch puj tIDam, be'pu' chaHmo'. mu'meyraj QoymeH joH'a' tIquvmoH; chaHvaD latlh yIn pung'a' lInwI' tIDam. 8tagha' rIchwInvam vIqon: qechmeyraj tIrapmoH. peboQchuq. pemuSHa'chuq. peSaHchuq. penguqHa''eghmoH. 9ta' mIgh boSIQDI', ta' mIgh yIta'Qo'. botIchlu'DI', petIchQo'. DopnIS vangmeH Ho'DoSraj: ta' mIgh boSIQDI', ta' mIgh turwI' yIquvmoH, quv bo'atmeH borItlu'ta'mo'. 10peqaw: «yIn SaHchugh 'ej QaQbogh jajmey law' SIQ neHchugh vay', mIghwI'vo' jatDaj HopnIStaH 'ej wuQDu'Daj jojvo' ghoS De' ngeb 'e' botnIS. 11ta' mIgh tIlon 'ej ta'mey QaQ tIturchoH. roj yInejtaH 'ej yIghoch. 12quvwI'pu' qIm joH'a' 'ej beychaj 'Ij. 'ach ta' mIgh turwI'pu' qaD joH'a'.» 13batlh SuvangmeH Suvawchugh, lI'oy'moH 'Iv? 14'a vabDot ta'mey quvmo' Subechchugh, SuquvtaH. «lIbuQchugh chaH, pebaw'Ha'Qo'. pejotHa'Qo'.» 15'ach yeSu'a QIStoS luvuvjaj tIqDu'raj. 16tulmeH meqraj Sov neHbogh vay'vaD pejangruptaH. 'a SujangDI', penaHHa''eghmoH 'ej ghelwI' yIvuv. 16vangmeH Ho'DoSraj SIghbogh QIStoS lutIch yuDwI'pu'. tuHmeH nuvpu'vetlh qa'meyraj tInItmoH. 17batlh SuvangtaHvIS Subech 'e' wuqchugh joH'a', nIv ghu'vam. batlhHa' SuvangtaHvIS Subech net jalchugh, QIv ghu'vam. 18yemmeymo' bechpu' je QIStoS 'e' yIqaw. quvHa'wI'pu'vaD bechta' quvwI'. joH'a'Daq nuqemmeH bechta'. Heghpu' porghDaj 'ach yIn qa'Daj. 19yInpu'DI', jaHpu' 'ej qa'pu' luweghlu'taHbogh Such. chaHvaD vep maq. 20ben law' no'aH bov lobHa'pu' qa'pu'vam, loSqu'taHvIS joH'a' 'ej bIQ Duj'a'Daj chenmoHtaHvIS no'aH. bIQ Duj'a'vamDaq chorgh nuvpu' neH lutoDlu' bIQmo'. 21'ej DaH lItoDbogh bIQ 'oS bIQvam'e'. porghvo' lam teqbe' neH. joH'a'vaD qa' nItmoHmeH 'Ip 'oS. lItoD bIQ, yInqa'ta'mo' yeSu'a QIStoS. 22QIStoS'e', chal'a' 'elta' 'ej joH'a' nIHDaq ba'. lulob HoSDo'pu', woQmey, HoSmey je.

'ay' loS

1vaj porghDaq bechta'mo' QIStoS, ngoQ rap yIbuS. yem 'e' mev vay', bechchugh porghDaj. 2vaj jubbe'wI' tlhu'moHwI'vaD yInDaj SIQbe' vay'vetlh. joH'a' ngoQvaD yIn. 3ret ta'mey'e' turbogh HarQo'wI' botur 'e' yIqaw—porgh yemmey boturta'. Suchech'eghmoHta'. SujeSta' qaStaHvIS ghanqu'. 'ej latmey bonaDqu'ta'. 4SeH'eghbe'chu'taHvIS chaH bomuvQo'mo', bomer 'ej lIghongqu'taH. 5'a yInwI'pu', Heghpu'wI'pu' noHrupwI'vaD QIj'egh. 6meqvammo', vabDot Heghpu'wI'pu'vaD vep QaQ maqlu'ta'. porghchaj lunoHlu'meH jubbe'wI' chut'e' lulo'lu' 'ach qa'chaj yInmoH joH'a'. 7tugh Dor Hoch. vaj peDugh'eghmoH 'ej peQubchu' joH'a'vaD SujatlhtaHvIS. 8Dochvam yIqawqu': pemuSHa'qu'chuq, yemmey law' 'enmoHmo' muSHa'meH mIw. 9peboQchuq Subepbe'taHvIS. 10latlhpu' botoy'meH nobmeyraj le' boHevpu'bogh tIlob. joH'a' pung'a' Sarmey law' leHwI'pu' matlh tIgheS. 11jatlhchugh vay', joH'a' mu'mey jatlhwI' Dajaj. toy'chugh vay', HoS'e' peSbogh joH'a' lo'jaj. vaj yeSu'a QIStoSmo' joH'a' naDlu'. Hochlogh ngay', HoS je, woQ je ghaj. qaSjaj. 12juppu'wI', lImerbe'jaj Qugh boSIQbogh. qaSbe' wanI' Huj. 13pelop, QIStoS bepmey boSIQmo' je. ngay'meyDaj 'anglu'ta'DI', SuQuchqu'chu'. 14QIStoS pongmo' botIchlu'chugh, Suquv; lIDab ngay' qa''a'. lIDab joH'a' qa''a'. 15Subechchugh, chotwI', nIHwI' joq, latlh HeSwI' joq, latlh SengwI' joq tIrurQo'. 16'a QIStoS toy'wI' tlhIHmo' Subech net jalchugh, petuHQo'. joH'a' yInaD, tlhIHvaD QIStoS toy'wI' ponglu'mo'. 17joH'a' juHDaq tagh yoj. joH'a' vep QaQ loblu'Qo'chugh, nuq SIQlu'? 18'ej «Qatlhchugh quvwI' toDmeH mIw, nuq luSIQ quvHa'wI', yemwI' je?» 19vaj joH'a' ngoQvaD bechchugh vay', chenmoHwI''a'chaj matlh lobnIStaH 'ej ta'mey QaQ turnIStaH vay'vetlh.

'ay' vagh

1vaj quppu'ra' vItungHa'. qup jIH je 'ej QIStoS bepmey vInguHpu' 'ej ngay'mey lIb vIlIn je. 2joH'a' DI'raqmey tIjIH 'ej tIQorgh. Qu'vam boturmeH boraDlu'be'. Qu'vam yItur, Qu'vam botur boneHmo'. ghu'vam neH joH'a'. SuSeymo' petoy'; batlhHa' pevawQo' 'ej peyuDHa'Qo'. 3vInDa'pu'ra'vaD pemIyQo' woQrajmo'. HarwI' ghomrajvaD ghantoH tIgheS. 4'ej narghDI' jIHwI''a', ngabbe'bogh ngay' mIv'a' boHevbej. 5jaSHa' quppu'ra' tIlob, QupwI'pu'. penguqHa'taH; Sutraj rurjaj nguqHa'meH Duj. peqaw: «nguqwI' qaD joH'a' 'a nguqHa'wI' Qorgh.» 6vaj joH'a' ghop HoSghaj bIngDaq penguqHa''eghmoH 'ej mItDI' poH, lIchepmoH. 7lIbaw'Ha'moHbogh Dochmey rangchoH 'e' yItlhob, lISaHmo'. 8peDughtaH 'ej peQubchu'taH. ghachlI' jaghra'— mIghwI''a'; gheD wamlI'bogh 'ej jachbogh vIghro''a' rur. 9ghaH yI'om. joH'a' yIvoqchu'taH, qo' HochDaq bepmey rap SIQ HarwI' tuq 'e' boSovmo'. 10'ej ru'Ha'chu'bogh pung'a' bolInmeH lIrIt joH'a'. pung'a'vam DuHmoHta' QIStoS. qubbID ngaj SuSIQpu'DI', lIpupmoH 'ej lIrach 'ej lIHoSmoH 'ej lIHu'moH. 11Hochlogh HoStaH ghaH. qaSjaj. 12SatungHa'meH 'ej joH'a' pung'a'na' vInguHmeH QInvam vIqonta' 'ej nav QInvam ngaj vIqonmeH muboQta' SIlwanoS. ghaHvaD vInDa' matlh vIDam. lIHoSmoHjaj joH'a' pung'a'na'. 13lIvan bavel Dabbogh be''e'— vInDa'lI'. lIvan je puqloDwI', marqoS. 14SumuSHa'chuq 'e' boghaSmeH pechopchuq SughomDI'. roj boSIQjaj, 'o QIStoS toy'wI'pu'.
Category: (none)    Latest edit: 28 Dec 2020, by DeSDu96    Created: 28 Dec 2020 by DeSDu96
 
The Klingon Language Wiki is a private fan project to promote the Klingon language. See Copyright notice for details.