Second Epistle of Peter

The Second Epistle of Peter is the 61st book of the Protestant Bible.

This page shows a translation from Greek undertaken with the help of an interlinear text by Jack Bradley in 2020.

pe'tlhoS nav QIn cha'DIch

'ay' wa'

1SI'mon pe'tlhoS—toy'wI', yeSu'a QIStoS Duy je—jIH. nuvoqmoHta' joH'a'. nuvoqmoHta' je yeSu'a QIStoS, toDwI''a'ma'. nobvam wIQejqu'. nobvam lulInbogh ghotpu'vaD QInvam vIngeH: 2tlhIHvaD pung'a' law', roj law' je nobjaj joH'a', yeSu'a QIStoS joH je. 3Hoch wIpoQbogh nobpu' HoSDaj ngar 'ej yInmey quv SIQmeH yap Hochvetlh, ghaH wISovmo'. wISovmeH nurIt 'ej wISov, ngay'Dajmo' ta'meyDaj povmo' je. 4batlh maHvaD lay'meH Dochmeyvam lo'ta'. DI'ruj ngar wIlInchoHlaH 'e' qaSmoH. maqal 'e' wImev 'ej nuSIghHa'choH qo'mey tlhu'moHwI'mey mIgh. 5meqvammo', peHar 'ej HartaHghachrajDaq ghob QaQ yIchel. 'ej ghobraj QaQDaq Sov yIchel. 6'ej SovrajDaq Sun yIchel. 'ej SunrajDaq taHmeH laH yIchel. 'ej taHmeH laHrajDaq batlh yIchel. 7'ej batlhrajDaq muSHa'chuqghach yIchel. 'ej muSHa'chuqghachrajDaq muSHa'meH mIw yIchel. 8DI'onmeyvam bochIwchugh 'ej ghurtaHchugh DI'onmeyvam, SulI'Ha'be' 'ej SuvaQHa'be', yeSu'a QIStoS joH boSovtaHvIS. 9'a DI'onmeyvam Hutlhchugh vay', leghlaHbe'chu' pagh SumwI' neH leghlaH. yemmeyDajmo' bIjlu'be'meH Say'moHlu'ta' 'e' lIj. 10vaj, vInDa'pu'wI', borItlu'ta' 'ej bowIvlu'ta' 'e' yIwoq; yInIDqu'. DI'onmeyvam bochIwchugh, not Sutang 11'ej pe'vIl ru'Ha'chu'bogh wo'DajDaq lIma' yeSu'a QIStoS—joHma', toDwI''a'ma' je. 12vaj reH tlhIHvaD Dochmeyvam vIqawmoHtaH, vabDot bIH boSovchugh 'ej wejHa' Sucher'eghmeH vIt boyajbogh bolo'chugh. 13jo'ley' rurbogh porghvam'e' vIDabtaHvIS, waSHa' qawmoHmeH mIwvam 'e' vIDam. 14tugh porghvam vIlon 'e' vISovmo'. ngoDvam vIyaj 'e' qaSmoH yeSu'a QIStoS, joHma'. 15jItlheDpu'DI' reH Dochmeyvam boqawlaHtaH 'e' vIwoq 'e' vInIDqu'chu'. 16lutmey 'ong DI'oghta'be', pe'vIl paw yeSu'a QIStoS joH pIja'DI'. 'a ngay'Daj jantor maH. 17vav'a'vo' quv, ngay' je Hevpu', ngay' Dunvo' ghoSDI' ghogh 'ej jatlhDI' ghoghvetlh «puqloDwI' vISaHchu'bogh ghaHbej; mubelqu'moH.» 18chal'a'vo' ghoS ghogh 'e' wIQoypu', HuD quvDaq QIStoS wItlhejtaHvIS. 19vaj joH'a' Duypu' QIn wIvoqqu'laH 'ej QInvam boqImmo', Suchul. Daq Hurgh wovmoHbogh Sech'e' rur. yIqImtaH 'e' yImevQo' qaSpa' jajlo' 'ej tIqrajDaq Salpa' po Hov. 20'a ngoDvam yISovbej: ghItlhmey quvDaq vuDmeyDaj tlhIn qonta' pagh joH'a' Duy. 21jubbe'wI' ngoQ 'oH be' 'aqmeH mIw mung'e'. jubbe' joH'a' Duypu''e' 'a Duypu'Daj jatlhmoHta' joH'a' 'ej chaH DevmeH qa''a' quv lo'ta'.

'ay' cha'

1ghotpu'vaD much'egh joH'a' Duypu' ngeb. jaSHa' tlhIHvaD much'egh joH'a' Duypu' ngeb. tlhIHvaD vuyHa' paQDI'norgh ngeb much, ngoQna'chaj peghtaHvIS 'ej vabDot chaH je'ta'bogh pIn'a'chaj'e' lutemtaHvIS vaj nom Qaw''egh chaH. 2'ej batlhHa' chaH Da ghotpu' law' 'ej vIt He vuvHa'lu' ghotpu'vetlh. 3'e 3'ej qurmo' lIghongmeH lutmey ngeb 'ogh chaH. ret law' luqIchlu'ta' 'ej luQaw'lu'bej. 4yempu'DI' HoSDo'pu' bIjHa'Qo' joH'a' 'ej ghe'benHInomDaq chaH ngeHta'. wutlh pa'mey HurghDaq chaH baghta' 'ej pa' yojvaD pollI'. 5qo' tIQ bIjHa'Qo', SoD'a' luSIQ quvHa'wI'pu' 'e' qaSmoHta'DI'. 'a no'aH—ghob QaQ maqwI'—Soch latlhpu' je Qanta'. 6SoDom veng, 'amogha veng je qIchpu' 'ej tIpqan lumoj 'e' qaSmoH 'ej quvHa'ghach gher'ID ghantoH lumoj 'e' qaSmoH. 7'ej quvHa'wI'pu' Sun 'envo' lot quv toDta'. 8(quvwI'na' ghaH loDvetlh'e' 'ej Hoch jaj chaH tlhejtaHmo', qa'Daj quv lutoy' ta'meychaj mIgh. ta'meyvam leghpu' 'ej Qoypu')—9teHchugh Hochvam, qaDvo' quvwI'pu' toDlaH joH'a' 'ej noHmeH jaj bIjvaD quvHa'wI'pu' pollaH ghaH. 10'ej qalmoHbogh porgh yemmey turwI'pu'vaD, woQ muSwI'pu'vaD je teHqu' De'vam. jaq 'ej nguq. ngarwI'pu' tIch. 11HoSDo'pu' HoSghaj law' chaH HoSghaj puS 'ach vabDot ngarwI'pu' tIchQo' HoSDo', chaHvaD joH'a' yoj qemtaHvIS. 12'ach meqmey yajbe'bogh muS ghotpu'vam. meqbe'bogh Ha'DIbaH rur ghotpu'vam. Depmey'e' Devbogh Duj neH Da. lujonlu'meH 'ej luQaw'lu'meH neH boghpu'. Qaw' SIQ je; Ha'DIbaH rur. 13QIHta'mo', QIHlu'. bel'eghmoHmeH pem lop chaH. 'oDtu', quvHa'ghach rur. 'uQ'a' bolIntaHvIS, nep 'e' lutIv. 14tlhogh wem luchIw mInDu'chaj. yem not 'e' lumev; mISwI'pu' tlhu'moH. qurwI' po' chaH. 'Igh! 15ghob lugh lulonpu' 'ej Daqchaj luSovbe'. ta' mIgh parHa'qu'bogh bIlyam be'or puqloD luDa. 16'a batlhHa' vangpu', lajHa'pu' Sargh, jatlhlaHbe'bogh Ha'DIbaH. jatlhchoHlaH Sargh; ghogh lo'choH 'ej maw'wI' bot. 17bIQ Hutlhbogh bIQ Hal, vI'laS yuvtaHbogh SuS HoS je rur ghotpu'vam. QIbmey qIjDaq 'oH Daqchaj'e'. 18nguqHa' 'ej mu'mey lI'Ha' jatlh. QaghwI'pu'vo' narghta'DI' 'op, 'opvetlh tlhu'moHmeH porgh yemmey lo' 'e' lunID ghotpu'vam. 19tlhabmoH 'e' lulay'. 'a ghob qal toy'wI''a'pu' chaH. peqaw: «ghatlhwI'Daj toy'wI''a' ghaH nuv'e'.» 20qo' ghob qalvo' narghta'meH yeSu'a QIStoS joH luSovchoHta' ghotpu' ghIq ghotpu'vetlh vonqa' 'ej jeyqa' ghob qal net jalchugh, 'arghpu' ghu'chaj. 20ghob quv luSovbe' net jalchugh, nIv ghu'chaj 'ach ghob quv luSov 'ej rIchwIn'a' quv luHevpu'bogh lulon net jalchugh, QIv ghu'chaj. 21chaH rIchlu'meH mIt vIttlheghmeyvam: «quy'IpDaj tlhIn chegh qovIj» 'ej «lam yIQDaq ronqa' Suy' be'.»

'ay' wej

1juppu'wI', DaH cha'logh tlhIHvaD nav QIn vIngeHta'. SaQubmoHchu'meH cha' nav QInmeyvam vIqonta'. 2tlhIHvaD mu'mey'e' jatlhta'bogh joH'a' Duypu' vIqawmoH vIneH. tlhIHvaD rIchwIn lumaqta'bogh joHma' vIqawmoH vIneH je. (rIchwInvam maqmeH toDwI''a'ma', Duypu'Daj lo'ta'.) 3jajmey Qav SaH nguypu' 'e' yIyaj. nguy chaH 'ej chaH Dev mIghbogh Dujchaj tlhIn. 4jatlh «nuqDaq ghaHtaH? paw 'e' lay'. 'emrIghpu'ma' Hegh, DaH je qubbID taHtaH Hoch. rap bovmaj, bov wa'DIch je.» 5'a ben law' chal chenmoH joH'a' QIn 'ej bIQvo' chen tera' 'ej tera' chenmoHlu'meH bIQ lo'lu'ta' chIch 'e' lulIj. 6bovvetlh qo' Qaw'pu' je SoD'a' 'e' qaSmoHlu'meH bIQvetlh lo'lu'. 7qulvaD bovmaj chal, bovmaj tera' je pollI' QInvetlh rap. yoj jajvaD, quvHa'wI'pu' Qaw'vaD je lupollI'. 8'a wa' Dochvam yIlIjQo', juppu'wI': joH'a' tlhejlu'taHvIS, wa'SaD DIS rur wa' jaj. 9Dochmey lay'ta'bogh turmeH QIt vangbe' joH'a'. jaS mu'vam yaj 'op. thIHvaD tuvtaH joH'a'. Qaw'raj bojun neH ghaH. yabraj bochoH neH ghaH. 10'a pawDI' yoj jaj; nIHwI' rur. ngab chal chuSqu'taHvIS. Hap Qaw' qul 'ej tera', ta'meyDaj je lumeQlu'chu'. 11vaj Hoch Qaw'lu'bejmo', chay' SuvangnIS? ghob QaQ yIpabtaH 'ej pequvHa'taH, 12joH'a' jaj boloStaHvIS 'ej jajvetlh borIttaHvIS. jajvetlh chal Qaw' qul 'ej Hap tet tuj'a'. 13'a Dochmey lay'ta'bogh joH'a' DIqeltaHvIS, nuSeymoH chal chu', tera' chu' je. pa' quv'e' tu'lu'. 14vaj, juppu'wI', ghu'vam bopIHmo', Supup 'e' yInIDqu'. pIch yIHutlh 'ej Surojchuq rIntaH tlhIH, ghaH je 'e' yISovbej. 15joH'a' tuvmeH mIwvaD toD'a' yIDam. jaSHa' lIqeSta' pawloS, vInDa'na'ma', chulmoHtaHvIS joH'a'. 16meqmeyvam'e', Qochbe' pawloS 'e' lu'agh Hoch nav QInmeyDaj. meqmey'e' muchbogh nav QInmeyDaj luyajlu'meH Qatlh Qu' 'ej chIch meqmeyvetlh lurIchHa' jIvwI'pu', mISwI'pu'. jaSHa' chIch latlh ghItlhmey quv rIchHa'mo', Qaw''egh. 17vaj, juppu'wI', lIQaghmoH Sun HutlhwI'pu' 'e' bobotmeH peDughtaH boghuHmoHlu'ta'mo'. lulIghraj HoS yIweSQo'. 18'a lInenmoHjaj pung'a''e', Sov'e' je nobta'bogh yeSu'a QIStoS, joHma' toDwI''a'ma' je. DaH ngay' ghaj 'ej Hochlogh ngay' ghaj! qaSjaj.
Category: (none)    Latest edit: 28 Dec 2020, by DeSDu96    Created: 28 Dec 2020 by DeSDu96
 
The Klingon Language Wiki is a private fan project to promote the Klingon language. See Copyright notice for details.